រាជធានីភ្នំពេញ ៖ យោងតាមសេចក្ដីប្រកាសព័ត៌មានពីស្ថានទូតអាមេរិកប្រចាំកម្ពុជាដែលចេញផ្សាយជាសាធារណៈកាលពីថ្ងៃទី២០ កញ្ញា ឆ្នាំ២០១២បានឲ្យដឹងថា នៅវេលាម៉ោង៤រសៀលថ្ងៃទី២១ កញ្ញា នេះ នៅទីស្តីការគណៈរដ្ឋមន្ត្រី តំណាងរាជរដ្ឋាភិបាលកម្ពុជា និងតំណាងរដ្ឋាភិបាលសហរដ្ឋអាមេរិកនឹងចុះហត្ថលេខាទទួលជំនួយមនុស្សធម៌សម្រាប់ឆ្នាំ២០១២ពីរដ្ឋាភិបាលសហរដ្ឋអា
រាជធានីភ្នំពេញ ៖ យោងតាមសេចក្ដីប្រកាសព័ត៌មានពីស្ថានទូតអាមេរិកប្រចាំកម្ពុជាដែលចេញផ្សាយជាសាធារណៈកាលពីថ្ងៃទី២០ កញ្ញា ឆ្នាំ២០១២បានឲ្យដឹងថា នៅវេលាម៉ោង៤រសៀលថ្ងៃទី២១ កញ្ញា នេះ នៅទីស្តីការគណៈរដ្ឋមន្ត្រី តំណាងរាជរដ្ឋាភិបាលកម្ពុជា និងតំណាងរដ្ឋាភិបាលសហរដ្ឋអាមេរិកនឹងចុះហត្ថលេខាទទួលជំនួយមនុស្សធម៌សម្រាប់ឆ្នាំ២០១២ពីរដ្ឋាភិបាលសហរដ្ឋអាមេរិក តាមរយៈ ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិ ហៅកាត់ជាភាសាអង់គ្លេសថា USAID នូវទឹកប្រាក់ចំនួន១៨,៥លានដុល្លារ ដើម្បីគាំទ្រដល់វិស័យអាទិភាពរួមគ្នារបស់រដ្ឋាភិបាលអាមេរិក និងរាជរដ្ឋាភិបាលកម្ពុជា លើផ្នែកកំណើនសេដ្ឋកិច្ច កសិកម្ម សន្ដិសុខស្បៀង ការបំរែបំរួលអាកាសធាតុសកល និងការកាត់បន្ថយផលប៉ះពាល់របស់វា ។
សេចក្ដីប្រកាសព័ត៌មានបានបន្ថែមថា កិច្ចព្រមព្រៀងទ្វេភាគីនេះ បានផ្ដល់ការគាំទ្រដល់កម្មវិធីរបស់ USAID លើគម្រោងជួយដោះស្រាយភាពងាយរងគ្រោះនៅតាមជនបទ និងស្ថិរភាពនៃប្រព័ន្ធអេកូឡូស៊ី HARVEST រួមទាំងគម្រោងផ្សេងៗទៀត ដែលនឹងគាំទ្រដល់យុទ្ធសាស្ដ្រអភិវឌ្ឍន៍ជាតិរបស់រាជរដ្ឋាភិបាលកម្ពុជា ដោយលើកកម្ពស់ផលិតកម្មកសិកម្មពង្រឹងសមត្ថភាពគ្រប់គ្រងក្រោយការប្រមូលផល បង្កើនលទ្ធភាពប្រើប្រាស់ស្បៀង និងជួយដល់កសិករកម្ពុជាក្នុងការសម្របទៅនឹងបំរែបំរួលអាកាសធាតុ ។
គម្រោងទាំងនោះ ក៏នឹងជួយពង្រឹងសមត្ថភាពរបស់សង្គមស៊ីវិល វិស័យឯកជន និងរាជរដ្ឋាភិបាល ដើម្បីដោះស្រាយការប្រឈមស្តីពីសន្ដិសុខស្បៀង និងការបំរែបំរួលអាកាសធាតុនៅកម្ពុជា ។ ការផ្តល់ថវិកាសម្រាប់សកម្មភាពទាំងនេះ បានមកពីកម្មវិធីស្តីពីគំនិតផ្ដួចផ្តើមដើម្បីចិញ្ចឹមអ្នកជំនាន់ក្រោយ Feed the Future និងការប្រែប្រួលអាកាសធាតុសកលលោក ។ គំនិតផ្តួចផ្តើមសម្រាប់ការប្រែប្រួលអាកាសធាតុសកលធ្វើការដើម្បីការពារព្រៃឈើអភិរក្សជីវៈចម្រុះ និងកាត់បន្ថយការបញ្ចេញឧស្ម័នផ្ទះកពា្ចក់ ។
ទាំងនេះជាសកម្មភាពដ៏សំខាន់ ដើម្បីការពារបរិស្ថានរបស់កម្ពុជា និងលើកកម្ពស់ជីវភាពរស់នៅ ក៏ដូចជាចំណូលរបស់ប្រជាពលរដ្ឋនៅតាមជនបទផងដែរ ។ សេចក្ដីប្រកាសព័ត៌របស់ស្ថានទូតអាមេរិកប្រចាំកម្ពុជាដដែលក៏បានបញ្ជាក់ឲ្យដឹងដែរថា សហរដ្ឋអាមេរិកក៏គាំទ្រផងដែរនូវកម្មវិធីជាច្រើនផ្សេងៗទៀត សំដៅបម្រើផលប្រយោជន៍ដល់ប្រជាជន កម្ពុជាទាំងអស់ដូចជាកម្មវិធីសុខភាព ការអប់រំសិទ្ធិមនុស្ស នីតិរដ្ឋ អភិបាលកិច្ចល្អ និងការប្រឆាំងការជួញដូរមនុស្សជាដើម ។ USAID សង្ឃឹមថានឹងផ្ដល់ថវិកាសរុបចំនួន៦៥លានដុល្លារសហរដ្ឋអាមេរិក ជាជំនួយឧបត្ថម្ភដល់ប្រទេសកម្ពុជា ក្នុងឆ្នាំ២០១២នេះ។
នៅក្នុងសេចក្ដីប្រកាសព័ត៌មានបានឲ្យដឹងថា លោកជេហ្វ ដេហ្គល ភារធារីស្ថានទូតសហរដ្ឋអាមេរិកប្រចាំនៅកម្ពុជា នឹងអញ្ជើញចូលរួមនៅក្នុងពិធីចុះហត្ថលេខានេះ ក្នុងនាមជាសាក្សី ។ លោក ឧបនាយករដ្ឋមន្ត្រី សុខ អាន រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងលោក Flynn Fuller នាយកបេសកកម្មនៃទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្ដរជាតិ នឹងចុះហត្ថលេខា ក្នុងនាមរដ្ឋាភិបាលរបស់ខ្លួន៕
ចែករំលែកព័តមាននេះ