ខេត្តស្វាយរៀង ៖ មានការភ្ញាក់ផ្អើលយ៉ាងខ្លាំងមួយបានកើតឡើងនៅកណ្តាលក្រុងស្វាយរៀង បណ្តាលមកពីបុរសសរសៃប្រសាទម្នាក់យកដាវសាមូរ៉ៃដេញកាប់ប្រពន្ធ និងបងថ្លៃ ព្រមទាំងប៉ូលិសធ្វើឱ្យមានការភ្ញាក់ផ្អើលដល់អ្នកហាត់ប្រាណនាំគ្នារត់ទាំងព្រលឹងចុងសក់ ។ ករណីបុរសសរសៃប្រសាទដេញកាប់ប្រពន្ធនេះបានកើតឡើងកាលពីថ្ងៃទី២០ កញ្ញា ២០១២ វេលាម៉ោង៤និង៣០នាទីទៀបភ្លឺនៅភូមិវាលយន្ត សង្កាត់ស្វាយរៀង ក្រុងស្វាយរៀង។
លោកអនុសេនីយ៍ឯក ប្រាក់ ជុត អធិការរងនគរបាលក្រុងស្វាយរៀង បានប្រាប់ឱ្យដឹងថា ជនសរសៃប្រសាទឈ្មោះព្រំ សំណាង ភេទប្រុស អាយុ៤៥ឆ្នាំ មានលំនៅភូមិកើតហេតុខាងលើ ។ លោកប្រាក់ ជុត បន្តទៀតថា បើតាមស្ត្រីរងគ្រោះឈ្មោះភិន ដាវី អាយុ៤៨ឆ្នាំ ជាប្រពន្ធរបស់បុរសសរសៃប្រសាទប្រាប់សមត្ថកិច្ចថា ប្តីរបស់គាត់ធ្លាប់មានជំងឺសរសៃប្រសាទ៤ឆ្នាំ មកហើយត្រូវបានព្យាបាលដោយលោកវេជ្ជបណ្ឌិត សូរ បូរាណ «គ្រូពេទ្យសរសៃប្រសាទមន្ទីរពេទ្យខេត្តស្វាយរៀង» ក្រោយមកក៏បានធូរស្រាល និងលេបថ្នាំបន្តបានជាសះស្បើយបាន១ឆ្នាំមកហើយ ស្រាប់តែ៤ថ្ងៃមុននេះគឺថ្ងៃទី១៦ កញ្ញា ២០១២ ស្រាប់តែប្តីរបស់គាត់ (ព្រំសំណាង) មានអាការប្លែកៗ ពេលថ្ងៃអង្គុយសំកុក ពេលយប់អត់ដេកពួន អង្គុយនិយាយម្នាក់ឯងរអូ៊រទល់ភ្លឺ តែមិនដឹងនិយាយអ្វី លុះវេលាម៉ោង១២និង៣០នាទីរំលងអធ្រាត្រឈានចូលថ្ងៃទី២០ កញ្ញា បានដាស់ប្រពន្ធសួរនាំដោយចោទប្រកាន់ថា ប្រពន្ធផិតក្បត់ជាមួយបងថ្លៃ និងដេញកាប់ផ្អើលគេឯងតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ