ខេត្តព្រះសីហនុ ៖ កាលពីថ្ងៃទី១៥ ខែកញ្ញា ឆ្នាំ២០១២ នៅសាលាកងទ័ពជើងទឹកបានរៀបចំពិធីបិទវគ្គបញ្ជាការសេនាធិការទូទៅ ដោយនាយនាវីថ្នាក់បឋមជំនាន់ទី៦ និងបើកវគ្គបណ្តុះបណ្តាលនាវិកជំនាន់ទី៤ ។ ពិធីនេះបានប្រារព្ធធ្វើឡើងក្រោមអធិបតីភាពលោកឧត្តមនាវីឯក ទៀ វិញ ទីប្រឹក្សាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មេបញ្ជាការកងទ័ពជើងទឹក និងជាអគ្គលេខាធិការជាតិសន្តិសុខលំហសមុទ្រ ព្រមទាំងមានការចូលរួមពីអស់លោកអាជ្ញាធរមូលដ្ឋានយ៉ាងច្រើនកុះករនៅសាលាកងទ័ពជើងទឹក ស្ថិតនៅសង្កាត់រាម ក្រុងព្រះសីហនុ ខេត្តព្រះសីហនុ ។
ក្នុងរបាយការណ៍បូកសរុបលទ្ធផលបញ្ចប់វគ្គហ្វិកហ្វឺនបណ្តុះបណ្តាលបញ្ជាការសេនាធិការថ្នាក់បឋមជំនាន់ទី៦នេះបានដំណើរការរៀនសូត្រពីថ្ងៃទី២១ ខែមីនា ឆ្នាំ២០១២ ដល់ថ្ងៃទី១៥ ខែកញ្ញា ឆ្នាំ២០១២ ដែលមានសិក្ខាកាមសរុប៦១នាក់ មកពីទីបញ្ជាការដ្ឋានកងទ័ពជើងទឹក៤នាក់ កងនាវាល្បាតទន្លេ៣នាក់ វរសេនាតូចជើងទឹកវាយលើគោក៣នាក់ សាលាទ័ពជើងទឹក៥នាក់ មូលដ្ឋានសមុទ្រ២១នាក់ កងពលតូចលេខ៣១ ចំនួន២៥នាក់ ។ រយៈពេលរៀនសូត្រ១៨៤ថ្ងៃ សិក្សាតាមខ្លឹមសារមេរៀន លំហាត់របៀបផែនទីជើងគោក ប្រើប្រាស់ GPS ផែនទីជើងនាំផ្លូវ ការងារសេនាធិការ យុទ្ធវិធីជើងគោក ជើងទឹកចល័ត យុទ្ធវិធីជើងទឹក អាវុធលើនាវា វិទ្យុទាក់ទង កាំភ្លើងការពារអាកាស អនុវត្តលើភូមិសាស្ត្រជាក់ស្តែងភាសាអង់គ្លេស រំលឹកមេរៀនឆ្លងកាត់ការរៀនសូត្រ និងពុះពារការលំបាកគ្រប់បែបយ៉ាងទាំងទ្រឹស្តី និងការអនុវត្តលើទីលានជាក់ស្តែង ។
មានមតិសំណេះសំណាលនាឱកាសនោះ លោកទៀ វិញ មេបញ្ជាការកងទ័ពជើងទឹកបានពាំនាំនូវការផ្តាំផ្ញើសាកសួរសុខទុក្ខពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏ដូចជាក្រសួងការពារជាតិ អគ្គបញ្ជាការ ដែលសម្តេច និងលោកជំទាវ តែងតែគិតគូរអំពីសុខទុក្ខ និងជីវភាពរស់នៅរបស់កងទ័ពគ្រប់ពេលវេលា ។ ហើយដើម្បីឆ្លើយតបទៅនឹងគុណូបការៈ និងចក្ខុវិស័យនៃកងយោធពលខេមរភូមិន្ទ កងទ័ពជើងទឹកបានបំពេញភារកិច្ចការពារដែនទឹក ដី ឆ្នេរ កោះ សម្បត្តិធម្មជាតិ នៅលើទឹក ក្នុងទឹក ក្រោមបាតសមុទ្រ ព្រមទាំងលំហសមុទ្រ ដែលមានវិសាលភាពធំទូលាយ របស់មាតុភូមិយើង សហការការពារសន្តិសុខ សុវត្ថិភាព សណ្តាប់ធ្នាប់សង្គម កសាងពង្រឹងពង្រីកកងទ័ពជើងទឹកឱ្យមានសមត្ថភាពគ្រប់គ្រាន់ និងបើកវគ្គបណ្តុះបណ្តាលជាបន្តបន្ទាប់គ្រប់មុខវិជ្ជាទៅដល់យោធិនអាជីព និងមានជំនាញវិជ្ជាជីវៈ សមត្ថភាព ក្នុងការបន្ត
វេន ។
ក្នុងឱកាសនោះ លោកមេបញ្ជាការកងទ័ពជើងទឹក ក៏បានផ្តល់នូវថវិកា សម្ភារផ្សេងៗ ដែលជាអំណោយដ៏ថ្លៃថ្លារបស់សម្តេចតេជោ និងលោកជំទាវ ផ្តល់ជូនសាលាកងទ័ពជើងទឹករួមមានថវិកា២លានរៀល អង្ករ៥០០គីឡូក្រាម ស្កសរ៥០គីឡូក្រាម ទឹកស៊ីអីុវ២០យួរ ខ្ទឹមសរខ្ទឹមក្រហម២បាវ ប៊ីចេង៥០គីឡូក្រាម ប្រេងឆា៣០លីត្រ យោធាចារ្យ១៨នាក់ ក្នុងម្នាក់ៗថវិកា៣ម៉ឺនរៀន បុគ្គលិកបម្រើការ៤នាក់ ក្នុងម្នាក់ៗថវិការ៣ម៉ឺនរៀល សិក្ខាកាមវគ្គហ្វិកហ្វឺនបណ្តុះបណ្តាលបញ្ជាការសេនាធិការ នាយនាវីបឋមជំនាន់ទី៦ ចំនួន៦១នាក់ ក្នុងម្នាក់ៗថវិកា៣ម៉ឺនរៀល និងប្រកាសបើកវគ្គហ្វិកហ្វឺនបន្តទៀតផងដែរ ៕
ចែករំលែកព័តមាននេះ