ADផ្ទាំងផ្សព្វផ្សាយពាណិជ្ជកម្ម

ទូតម៉ាឡេស៊ី៖ ទំនាក់ទំនងការទូតកម្ពុជា-ម៉ាឡេស៊ីកាន់តែរឹងមាំ

12 ឆ្នាំ មុន

២១ ខែ កញ្ញា ឆ្នាំ ២០១២ ម៉ោង ០១:៣០

រាជធានីភ្នំពេញ ៖ ថ្លែងក្នុងពិធីរំលឹកខួបលើកទី៥៥ឆ្នាំបុណ្យឯករាជ្យនៃប្រទេសម៉ាឡេស៊ី និងខួបលើកទី៤៩ឆ្នាំនៃការបង្កើតប្រទេសម៉ាឡេស៊ី លោក Datuk Pengiram Mohd Hussein BinDatuk Pengiram Haji Mohd Tahiv Nasruddin ឯកអគ្គរាជទូតម៉ាឡេស៊ីប្រចាំកម្ពុជាបានបង្ហាញនូវមោទនភាពយ៉ាងខ្លាំងចំពោះទំនាក់ទំនងការទូតរវាងប្រទេសទាំង២ កម្ពុជា-ម៉ាឡេស៊ី ដែលពីមួយថ្ងៃទៅមួយថ្ងៃកាន់តែរីកចម្រើន និងរឹងមាំ ខណៈដែលកម្ពុជា-ម៉ាឡេស៊ីកំពុងតែប្តេជ្ញាធ្វើខ្លួនឱ្យក្លាយទៅជាប្រទេសអភិវឌ្ឍន៍ត្រឹមឆ្នាំ២០២០ ។

គួរបញ្ជាក់ថា កាលពីថ្ងៃទី១៨ កញ្ញា ឆ្នាំ២០១២ នៅស្ថានទូតម៉ាឡេស៊ីប្រចាំកម្ពុជា មានរៀបចំពិធីរំលឹកខួបលើកទី៥៥បុណ្យឯករាជ្យ និងខួបលើកទី៤៩នៃការបង្កើតប្រទេសម៉ាឡេស៊ី ដោយមានការចូលរួមពីលោកហោ ណាំហុង ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងឯកអគ្គរាជទូតម៉ាឡេស៊ីប្រចាំកម្ពុជា ។

លោកឯកអគ្គរាជទូតម៉ាឡេស៊ីប្រចាំកម្ពុជាបានថ្លែងថា ទន្ទឹមនឹងការប្រារព្ធខួបឯករាជ្យ និងថ្ងៃបង្កើតប្រទេសម៉ាឡេស៊ី យើងកំពុងតែប្រារព្ធផងដែរនូវទំនាក់ទំនងដ៏រឹងមាំនិងប្រកបដោយមិត្តភាពរវាងប្រទេសម៉ាឡេស៊ីនិងប្រទេសកម្ពុជា ។ យើងរីករាយដែលមើលឃើញថា ប្រទេសទាំង២កំពុងមានកំណើនដ៏ច្រើននៃទំនាក់ទំនងពាណិជ្ជកម្មនៅក្នុងឆ្នាំកន្លងមក និងកំណើនច្រើនបំផុតនៃការនាំចេញរបស់កម្ពុជាទៅម៉ាឡេស៊ី ហើយក្រុមហ៊ុនម៉ាឡេស៊ីកាន់តែច្រើនក៏បានមករកស៊ីនៅកម្ពុជា ។ លោកក៏បានថ្លែងដែរថា កន្លងមកមានមន្ត្រីកម្ពុជាជាង១.០០០នាក់ត្រូវបានបណ្តុះបណ្តាលនៅម៉ាឡេស៊ី ។

ចំណែកលោកឧបនាយករដ្ឋមន្ត្រី ហោ ណាំហុង មានប្រសាសន៍ថា ទំនាក់ទំនងកម្ពុជានិងម៉ាឡេស៊ីជាទំនាក់ទំនងដ៏ល្អដែលមានជាយូរមកហើយ ។ ចាប់តាំងពីឆ្នាំ១៩៩៣មក ទំនាក់ទំនងរវាងប្រទេសទាំង២មានការរីកចម្រើនជាលំដាប់ ដូច្នេះហើយកម្ពុជានិងម៉ាឡេស៊ីមិនត្រឹមតែជាអ្នកជិតខាងល្អប៉ុណ្ណោះទេ គឺថែមទាំងជាប្រទេសក្នុងគ្រួសារតែមួយ គឺអាស៊ាន ៕

ADផ្ទាំងផ្សព្វផ្សាយពាណិជ្ជកម្ម

ទូត​​ម៉ា​ឡេ​ស៊ី​៖ ​ទំនាក់​ទំនង​​​ការ​ទូត​កម្ពុជា​​-​​ម៉ា​ឡេ​ស៊ី​​កាន់​តែ​រឹង​មាំ​

អត្តបទផ្សេងៗទៀត

ទូតម៉ាឡេស៊ី៖ ទំនាក់ទំនងការទូតកម្ពុជា-ម៉ាឡេស៊ីកាន់តែរឹងមាំ