ខេត្តបន្ទាយមានជ័យ ៖ ក្នុងរយៈពេល២ថ្ងៃកន្លងមកនេះ ខណៈដែលជំនន់ទឹកភ្លៀងហូរមកពីប្រទេសថៃបណ្តាលឱ្យមានការជន់លិចស្រុក និងក្រុងមួយចំនួននោះ តាមព័ត៌មានឱ្យដឹងថា មានមនុស្សស្លា.ប់ដោយសារលង់ទឹកជំនន់ចំនួន២នាក់ ជាបន្តបន្ទាប់ ។
ខេត្តបន្ទាយមានជ័យ ៖ ក្នុងរយៈពេល២ថ្ងៃកន្លងមកនេះ ខណៈដែលជំនន់ទឹកភ្លៀងហូរមកពីប្រទេសថៃបណ្តាលឱ្យមានការជន់លិចស្រុក និងក្រុងមួយចំនួននោះ តាមព័ត៌មានឱ្យដឹងថា មានមនុស្សស្លាប់ដោយសារលង់ទឹកជំនន់ចំនួន២នាក់ ជាបន្តបន្ទាប់ ។
តាមរបាយការណ៍របស់ស្នងការដ្ឋាននគរបាលខេត្ត ឱ្យដឹងថា នៅវេលាម៉ោង៧ និង៣០នាទីព្រឹកថ្ងៃទី១៨ កញ្ញា ឆ្នាំ២០១២ មានក្មេងប្រុសម្នាក់ឈ្មោះម៉ី គា អាយុ៣ឆ្នាំ នៅភូមិបុសធំ ឃុំតាគង់ ស្រុកម៉ាឡៃ ត្រូវបានគេប្រទះឃើញលង់ទឹកស្លាប់ក្នុងប្រឡាយ ។ តាមប្រភពព័ត៌មានពីលោកវរសេនីយ៍ត្រី សៅ ប៊ុន អធិការនគរបាលស្រុកម៉ាឡៃ ប្រាប់ឱ្យដឹងថា ឪពុកកុមារារងគ្រោះជាមនុស្សមានសតិមិនគ្រប់លក្ខណៈ (ឆ្កួត) ចំណែកម្តាយក៏ដូចគ្នាដែរ ។ តាមការសន្និដ្ឋាន កុមារារងគ្រោះខ្វះការយកចិត្តទុកដាក់មើលថែទាំពីអាណាព្យាបាល ទើបបណ្តាលឱ្យលង់ទឹកស្លាប់ ។
ចំណែកមួយករណីទៀត គឺនៅវេលាម៉ោង៦ និង៣០នាទីព្រឹកថ្ងៃទី១៩ កញ្ញា ស្ត្រីម្នាក់ឈ្មោះឆន ហួត អាយុ៥១ឆ្នាំ នៅភូមិតាផោក ឃុំចង្ហារ ស្រុកអូរជ្រៅ ត្រូវបានគេប្រទះឃើញលង់ទឹកប្រឡាយស្លាប់ដែលធ្វើឱ្យមានការភ្ញាក់ផ្អើលទាំងព្រឹក ។ លោកវរសេនីយ៍ត្រី ឆេង អីុសុខា អធិការនគរបាលស្រុកអូរជ្រៅ បានឱ្យដឹងថា មូលហេតុដែលបណ្តាលឱ្យលង់ទឹកស្លាប់ គឺមុនពេលកើតហេតុ ស្ត្រីរូបនេះបានផឹកស្រាស្រវឹងទាំងព្រឹក លុះពេលដើរត្រឡប់មកផ្ទះក៏ធ្លាក់ទឹកប្រឡាយលង់ស្លាប់តែម្តង ។
គួរបញ្ជាក់ថា នៅខេត្តបន្ទាយមានជ័យ អ្នកស្លាប់ដោយសារលង់ទឹកនៅចុងសប្តាហ៍ទី២ និងដើមសប្តាហ៍ទី៣នៃខែកញ្ញានេះកើនដល់ចំនួន៣នាក់ហើយ ក្នុងរដូវទឹកជំនន់ដំបូងនេះ ៕
ចែករំលែកព័តមាននេះ