រាជធានីភ្នំពេញ ៖ នៅចំពោះមុខអ្នកបើកតាក់ស៊ីជាង២០នាក់ដែលត្រូវអាជ្ញាធរចាប់រថយន្តកាលពីសប្តាហ៍មុននៅអធិការដ្ឋានប៉ូលិសខណ្ឌសែនសុខ វេលាម៉ោង៩និង៣០នាទីព្រឹកថ្ងៃទី១៩ កញ្ញា ២០១២ លោកអភិបាលខណ្ឌសែនសុខ បានអំពាវនាវសូមឱ្យប្រជាពលរដ្ឋដែលមានអាជីពជាអ្នករត់តាក់ស៊ី កុំយកកំណាត់មហាវិថីសហព័ន្ធរុស្ស៊ីធ្វើជាចំណតរថយន្តឱ្យសោះ ព្រោះផ្លូវនេះជាភ្នែក និងមុខមាត់របស់ប្រទេសកម្ពុជា ដោយសារភ្ញៀវអន្តរជាតិបានធ្វើដំណើរលើមហាវិថីនេះ ។
ពិធីនេះធ្វើឡើងក្រោមអធិបតីភាពលោកលី សាវេត អភិបាលខណ្ឌសែនសុខ និងមានការចូលរួមដោយលោកម៉ក់ ហុង អធិការប៉ូលិសបានជួបជាមួយអ្នកបើកតាក់ស៊ីជាង២០នាក់ដែលអាជ្ញាធរបានចាប់រថយន្តរបស់ពួកគាត់មករក្សាទុកកាលពីសប្តាហ៍មុន ធ្វើជាការព្រមាន ហើយក្នុងជំនួបជាមួយអ្នកបើកបរតាក់ស៊ីនេះដែរ លោកអភិបាលខណ្ឌបានមានប្រសាសន៍ពន្យល់ប្រាប់ប្រជាពលរដ្ឋថា ព្រះរាជាណាចក្រកម្ពុជាក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន សព្វថ្ងៃនេះមិនខ្វះការងារ ឬក៏មុខរបរឱ្យប្រជាពលរដ្ឋប្រកបដើម្បីចិញ្ចើមជីវិតនោះទេ ។ផ្ទុយទៅវិញលោកសុំឱ្យប្រជាពលរដ្ឋកុំប្រកបអាជីវកម្មដែលធ្វើឱ្យប៉ះពាល់មុខមាត់ប្រទេសជាតិដូចជានៅលើមហាវិថីសហព័ន្ធរុស្ស៊ីដែលគិតត្រឹមពីព្រលានយន្តហោះ អន្តរជាតិភ្នំពេញមកដល់គល់ស្ពាន៧មករា មិនឆ្ងាយប៉ុន្មានទេ គួរតែប្រជាពលរដ្ឋចៀសវាងឱ្យឆ្ងាយដើម្បីទុកមហាវិថីនេះសម្រាប់ឱ្យភ្ញៀវជាតិអន្តរជាតិធ្វើដំណើរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ