ខេត្តព្រះសីហនុ ៖ កាលពីថ្ងៃទី១៥ កញ្ញា ឆ្នាំ២០១២ នៅអគារទីបញ្ជាការជួរមុខរបស់អគ្គលេខាធិការដ្ឋានគណៈកម្មាធិការជាតិសន្តិសុខលំហសមុទ្រ បានប្រារព្ធពិធីប្រកាសតែងតាំងផ្លាស់ប្តូរមុខងារនាយទាហាន និងប្រកាសតែងតាំងចាត់បញ្ជូនមន្ត្រីបម្រើការងារនៅទីបញ្ជាការជួរមុខរបស់អគ្គលេខាធិការដ្ឋានគណៈកម្មាធិការជាតិសន្តិសុខលំហសមុទ្រ ។ ពិធីនេះបានប្រារព្ធឡើងក្រោមអធិបតីភាពលោកឧត្តមនាវីឯក ទៀ វិញ ទីប្រឹក្សាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មេបញ្ជាការកងទ័ពជើងទឹក និងជាអគ្គលេខាធិកាជាតិសន្តិសុខលំហសមុទ្រ ។
លោកវរនាវីឯក ទន់ សារុន ប្រធានការិយាល័យគ្រប់គ្រងបុគ្គលិក នាយកដ្ឋានរដ្ឋបាលនៃអគ្គលេខាធិការគណៈកម្មាធិការជាតិសន្តិសុខលំហសមុទ្របានឡើងអានសេចក្តីប្រកាសដំឡើងឋានន្តរសក្តិ អានសេចក្តីប្រកាសតែងតាំងផ្លាស់ប្តូរមុខងារនាយទាហាននៃអគ្គលេខាធិការដ្ឋានគណៈកម្មាធិការជាតិសន្តិសុខលំហសមុទ្រទៅបម្រើការនៅទីបញ្ជាការជួរមុខនៃអគ្គលេខាធិការដ្ឋានគណៈកម្មាធិការជាតិសន្តិសុខលំហសមុទ្រ ។ ពិធីបំពាក់ឋានន្តរសក្តិ និងប្រគល់សេចក្តីប្រកាសតែងតាំងផ្លាស់ប្តូរមុខងារជូននាយទាហាននាឱកាសនោះបានការផ្តល់កិត្តិយសពីលោកឧត្តមនាវីឯក ទៀ វិញ មេបញ្ជាការកងទ័ពជើងទឹក ។
មានមតិសំណេះសំណាលនាឱកាសនោះ លោកទៀ វិញ បានសម្តែងនូវមោទនភាពក្រៃលែងចំពោះអស់លោកដែលបានទទួលឋានន្តរសក្តិ និងផ្លាស់ប្តូរមកបំពេញការងារនៅទីនេះ ដោយលោកបានលើកឡើងថា ដំណើរការសន្តិសុខលំហសមុទ្រនៃព្រះរាជាណាចក្រកម្ពុជា បានវិវឌ្ឍន៍យ៉ាងឆាប់រហ័ស ចាប់ពីដើមឆ្នាំ២០០៧ ក្រោមគំនិតផ្តួចផ្តើមប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលឈានទៅដល់ការបង្កើតគណៈកម្មាធិ
ការជាតិសន្តិសុខលំហសមុទ្រ ហៅកាត់ថា គ.ជ.ស.ស នៅខែធ្នូ ឆ្នាំ២០០៩ ស្ថិតក្រោមការចង្អុលបង្ហាញផ្ទាល់ពីសម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជា រួមនឹងការដឹកនាំផ្ទាល់ពីគណៈកម្មាធិការជាតិសន្តិសុខលំហសមុទ្រ ដែលមានលោកនាយឧត្តមសេនីយ៍ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិជាប្រធាន ។ គ.ជ.ស.ស ជាយន្តការថ្នាក់ជាតិ មានភារកិច្ចគ្រប់គ្រងទាំងស្រុងលើការងារសន្តិសុខ ដែលទើបតែមានអាយុជាង២ឆ្នាំប៉ុណ្ណោះ តែមានការលូតលាស់ហួសពីការរំពឹងទុក ។
ទីបញ្ជាការជួរមុខរបស់អគ្គលេខាធិការដ្ឋាន នៃគណៈកម្មាធិការជាតិសន្តិសុខលំហសមុទ្រដែលទើបតែបានសម្ពោធដាក់ឱ្យប្រើប្រាស់ជាផ្លូវការ កាលពីថ្ងៃទី១១ ខែសីហា ឆ្នាំ២០១២ កន្លងមក ក្រោមអធិបតីភាពលោកនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិសន្តិសុខលំហសមុទ្រ ។ ទីបញ្ជាការជួរមុខដែលកំពុងដំណើរការពេលនេះ ជាមជ្ឈមណ្ឌលនៃការដឹកនាំ បញ្ជា គ្រប់គ្រង និងសម្របសម្រួលកិច្ចប្រតិបត្តិការកម្លាំងចម្រុះ និងជាមជ្ឈមណ្ឌលនៃការគ្រប់គ្រងព័ត៌មាន ដែលជាប្រភពយ៉ាងសំខាន់នៅក្នុងការគ្រប់គ្រងសន្តិសុខលំហសមុទ្រ ។
ការក្តាប់បាននូវរាល់សភាពការណ៍ដែលកើតមានឱ្យបានទាន់ពេលវេលា គឺជាកត្តាយ៉ាងសំខាន់នៅក្នុងការរៀបចំផែនការ និងកិច្ចប្រតិបត្តិការឆ្លើយតបមានប្រសិទ្ធភាព ។ ទន្ទឹមនេះ ទីបញ្ជាការជួរមុខត្រូវប្រកបដោយសមត្ថភាពចម្បងមួយចំនួនរួមមាន សមត្ថភាពនៅក្នុងការប្រមូលព័ត៌មាន ការវិភាគ និងចម្រាញ់ព័ត៌មាន ព្រមទាំងការចែកចាយព័ត៌មាន ។ យោងតាមសភាពការណ៍ជាក់ស្តែងក្នុងការរក្សាសន្តិសុខលំហសមុទ្រ និងភារកិច្ចស្នូលរបស់គ.ជ.ស.ស អគ្គលេខាធិការដ្ឋាននៃ គ.ជ.ស.ស បានសម្រេចចាត់តាំង មន្ត្រី បុគ្គលិក នាយទាហាន នាយនាវី នាយនគរបាលរបស់អគ្គលេខាធិការដ្ឋាននៃគណៈកម្មាធិការសន្តិសុខលំហសមុទ្រ ដែលជាកិច្ចប្រតិបត្តិការកម្លាំងចម្រុះមកបំពេញភារកិច្ចរួមគ្នា ជាភារកិច្ចចម្បង ដើម្បីក្តាប់បានរាល់សភាពការណ៍ដែលកើតឡើងបានទាន់ពេលវេលា និងដើម្បីធ្វើកិច្ចប្រតិបត្តិការឆ្លើយតបមានប្រសិទ្ធភាពខ្ពស់ក្នុងការដោះស្រាយរាល់យថាហេតុដែលកើតឡើងនៅគ្រប់កាលៈទេសៈ តំបន់ក្នុងសមុទ្រកម្ពុជា
ចែករំលែកព័តមាននេះ