ខេត្តបាត់ដំបង ៖ រថយន្តក្រុងដឹកអ្នកដំណើរមួយគ្រឿងបានរេចង្កូតធ្លាក់ចូលក្នុងប្រឡាយទឹកខាងឆ្វេងដៃ កាលពីវេលាម៉ោង៣និង៣០នាទីរសៀលថ្ងៃទី១៧ កញ្ញា លើកំណាត់ផ្លូវជាតិលេខ៥ ត្រង់ចំណុចភូមិថ្មី ឃុំកំពង់ព្រៀង ស្រុកសង្កែ តែសំណាងល្អគ្មានមនុស្សគ្រោះថ្នាក់ ។ ឧប្បត្តិហេតុនេះមានការអះអាងផ្សេងៗគ្នា ដោយភាគីក្រុមហ៊ុនថា បណ្តាលមកពីរថយន្តរអិលកង់ពេលភ្លៀងធ្លាក់ ឯសាក្សីឃើញផ្ទាល់ភ្នែកប្រាប់ថា គ្មានការរអិលកង់ទេគឺរថយន្តនេះផ្ទុះកង់មុខខាងឆ្វេង ។
មន្ត្រីនគរបាលចរាចរនិយាយថា រថយន្តក្រុងនេះដឹកអ្នកដំណើរក្នុងទិសដៅពីកើតទៅលិច បើកបរដោយបុរសឈ្មោះប៊ុន នី អាយុ៣៤ឆ្នាំ រស់នៅសង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ ។ ប្រភពបន្តថា រថយន្តនេះបើកលឿន លុះមកដល់ចំណុចខាងលើស្រាប់តែរេចង្កូតទៅខាងឆ្វេងដៃធ្លាក់ចូលទឹកប្រឡាយតែម្តង រងការខូចខាតបែកកញ្ចក់ បែកកង់ខាងឆ្វេង និងក្រពឹតផ្នែកខាងមុខដោយសារបុកគល់ឈើប៉ុន្តែមិនមានគ្រោះថ្នាក់ធ្ងន់ធ្ងរដល់អ្នកដំណើរទេ ។
ជុំវិញករណីនេះភាគីរថយន្តក្រុងបានអះអាងទាំងលាក់លៀមកាលពីព្រឹកថ្ងៃទី១៨ កញ្ញាថា រថយន្តនោះបានរអិលធ្លាក់ចេញពីផ្លូវ ខណៈមានភ្លៀងធ្លាក់ពេលកំពុងធ្វើដំណើរ និងបានបដិសេធថា គ្មានការផ្ទុះកង់រថយន្តដូចការនិយាយពីប្រភពនានានោះទេ ។ ទោះជាមានការអះអាងបែបនេះក្តីសាក្សីដែលបានឃើញហេតុការណ៍ផ្ទាល់ភ្នែកនិយាយថា រថយន្តនោះបើកលឿនហើយបានបែកកង់មុខផ្នែកខាងឆ្វេងលាន់ដូចផ្ទុះគ្រាប់បែក ហើយរថយន្តរេចង្កូតទៅខាងឆ្វេងដៃធ្លាក់ចេញពីផ្លូវចូលទៅក្នុងទឹកប្រឡាយ រួចបុកគល់ឈើទាំងកំរោលធ្វើឱ្យក្រពឹតមុខ និងបែកកញ្ចក់ តែសំណាងល្អរថយន្តមិនក្រឡាប់ទើបមិនប៉ះពាល់អ្នកដំណើរ។ រថយន្តនេះផ្ទុះកង់មុនពេលធ្លាក់ប្រឡាយមិនមែនរអិលដូចការលើកឡើងនោះទេ ។
សូមបញ្ជាក់ថា កាលពីថ្ងៃទី១៣ កញ្ញា កន្លងទៅ មន្ត្រីជំនាញនៃមន្ទីរសាធារណការ និងដឹកជញ្ជូនបានសហការជាមួយមន្ត្រីការិយាល័យចរាចរណ៍ផ្លូវគោក ដឹកនាំដោយលោកឧត្តមសេនីយ៍ត្រី ស ថេត ស្នងការនគរបាលខេត្តបានចុះត្រួតពិនិត្យ លើបច្ចេកទេសយានយន្តនានាតាមបណ្តាចំណតរថយន្តធំៗ និងតាមយានដ្ឋានមួយចំនួនក្នុងក្រុងបាត់ដំបង ។ កិច្ចប្រតិបត្តិការនេះធ្វើឡើងក្នុងគោលបំណងដើម្បីពិនិត្យផ្នែកបច្ចេកទេសយានយន្ត និងអប់រំដល់ម្ចាស់ក្រុមហ៊ុនដឹកជញ្ជូននានាឱ្យធ្វើការពិនិត្យផ្លាស់ប្តូរសម្បកកង់ដែលសឹករិចរិល ដើម្បីធានាបាននូវសុវត្ថិភាពអ្នកដំណើរ ។ ការចុះពិនិត្យនេះលោកស្នងការក៏បានបញ្ជាឱ្យមានការអនុវត្តភ្លាមៗផងដែរដល់រថយន្តដឹកអ្នកដំណើរទាំងឡាយណាដែលមន្ត្រីជំនាញពិនិត្យឃើញថា ខុសលក្្ខណៈបច្ចេកទេស ឬសម្បកកង់សឹកក្រឡា ។
តែចំណាត់ការនេះហាក់ដូចជាមានការយកចិត្តទុកដាក់តិចតូចណាស់ពីម្ចាស់យានយន្ត ឬម្ចាស់ក្រុមហ៊ុនដឹកអ្នកដំណើរមួយចំនួន ។ ជាក់ស្តែងម្ចាស់រថយន្តក្រុងជាដើម ដែលកិច្ចប្រតិបត្តិការនេះបានបញ្ចប់ទៅមិនទាន់បាន១សប្តាហ៍ផង ស្រាប់តែរថយន្តក្រុងនេះផ្ទុះកង់តែម្តង ។ ទាំងនេះត្រូវមន្ត្រីជំនាញស្តីបន្ទោសថា បណ្តាលមកពីបច្ចេកទេសសុទ្ធសាធដែលម្ចាស់រថយន្តមិនបានយកចិត្តទុកដាក់ ។
មន្ត្រីជំនាញបានលើកឡើងថា រថយន្តដឹកអ្នកដំណើរត្រូវប្រុងប្រយ័ត្នខ្ពស់បំផុត ព្រោះមួយថ្ងៃៗរថយន្តដឹកតែមនុស្សមិនមែនដឹកទំនិញទេ ។ ដូច្នេះម្ចាស់ក្រុមហ៊ុននានាត្រូវតែពិនិត្យផ្នែកបច្ចេកទេសជាប្រចាំដើម្បីធានាសុវត្ថិភាពដល់អ្នកធ្វើដំណើរ ជាពិសេសសម្បកកង់រថយន្តដែលមិនអាចធ្វេសប្រហែសបានឡើយ ព្រោះវាងាយនឹងគ្រោះថ្នាក់បំផុត បើសិនជាសម្បកកង់នោះផ្ទុះពេលកំពុងធ្វើដំណើរ និងត្រូវហ៊ានទទួលខុសត្រូវចំពោះការពិត មិនគួរឆ្លើយបដិសេធនូវអ្វីដែលបានកើតឡើងទេ ។ រថយន្តដឹកអ្នកដំណើរខាងលើត្រូវបានអូសឡើងគោកវិញ កាលពីព្រឹកថ្ងៃទី១៨ កញ្ញា ក្រោយពីចុះត្រាំទឹកពេញមួយយប់រួចមក ៕
ចែករំលែកព័តមាននេះ