រាជធានីភ្នំពេញ ៖ លោកឆាំង យុ ប្រធានមជ្ឈមណ្ឌលឯកសារកម្ពុជា កាលពីថ្ងៃទី១៧កញ្ញា បានសរសេរនៅក្នុងអត្ថបទមួយដោយចាត់ទុកការដោះលែងលោកស្រី អៀង ធីរិទ្ធ ជា បណ្តោះអាសន្នកាលពីរសៀលថ្ងៃទី១៦ កញ្ញា ដោយសារជំងឺវង្វេងវង្វាន់នោះថា គឺភាពអយុត្តិធម៌នៅតែបន្តកើតឡើងក្នុងរបបប្រល័យពូជសាសន៍ខ្មែរក្រហមសម្រាប់ជនរងគ្រោះ ។
រាជធានីភ្នំពេញ ៖ លោកឆាំង យុ ប្រធានមជ្ឈមណ្ឌលឯកសារកម្ពុជា កាលពីថ្ងៃទី១៧កញ្ញា បានសរសេរនៅក្នុងអត្ថបទមួយដោយចាត់ទុកការដោះលែងលោកស្រី អៀង ធីរិទ្ធ ជា បណ្តោះអាសន្នកាលពីរសៀលថ្ងៃទី១៦ កញ្ញា ដោយសារជំងឺវង្វេងវង្វាន់នោះថា គឺភាពអយុត្តិធម៌នៅតែបន្តកើតឡើងក្នុងរបបប្រល័យពូជសាសន៍ខ្មែរក្រហមសម្រាប់ជនរងគ្រោះ ។
យោងតាមអត្ថបទដែលកោះសន្តិភាពបានទទួលនៅថ្ងៃទី១៧ កញ្ញា ឆ្នាំ២០១២ បានសរសេរថា កាលពីថ្ងៃទី១៦ កញ្ញា ឆ្នាំ២០១២ អង្គជំនុំជម្រះវិសាមញ្ញ ក្នុងតុលាការកម្ពុជា បានជូនដំណឹងថា ជនជាប់ចោទអៀង ធីរិទ្ធ ក្នុងសំណុំរឿង០០២ មិនមានសម្បទាគ្រប់គ្រាន់ក្នុងការចូលរួមកិច្ចដំណើរការតុលាការបានទេ ដោយសារតែជនជាប់ចោទរូបនេះមានជំងឺវង្វេងវង្វាន់ស្មារតី ក្នុងកម្រិតមួយដ៏ធ្ងន់ ។ ទោះបីជាមានការរំពឹងទុកបែបនេះជាយូរមកហើយក៏ដោយ ដំណឹងអំពីការមិនមានសម្បទាគ្រប់គ្រាន់របស់ជនជាប់ចោទបែបនេះនៅតែជាតថភាពមួយដែលជនរងគ្រោះនៃរបបខ្មែរក្រហមពិបាកនឹងទទួលយក ។
លោកឆាំង យុ បានសរសេរថា អៀង ធីរិទ្ធ មានលទ្ធភាពទទួលបានសេវាថែទាំសុខភាព លំដាប់ថ្នាក់ពិភពលោក និងទទួលបានការព្យាបាលពីវេជ្ជបណ្ឌិតជំនាញជាច្រើនរូបបែបនេះ គឺជាការផ្ទុយគ្នាស្រឡះទៅនឹងអ្វីដែល អៀង ធីរិទ្ធ ធ្លាប់បានធ្វើ និងអ្វីដែលខ្លួនធ្លាប់ហៅថា «ការថែទាំសុខភាព»នៅក្នុងរបបខ្មែរក្រហម។ បន្ថែមទៅនឹងសេវាសុខភាពយ៉ាងវិសេសវិសាលដែលអៀង ធីរិទ្ធ បានទទួល វាជាការលំបាកមួយសម្រាប់ជនរងគ្រោះ និងប្រជាជនកម្ពុជាទាំងអស់ ក្នុងការទទួលយកការលើកកម្ពស់សិទ្ធិរបស់អៀង ធីរិទ្ធ ដែលកើតឡើងនៅអង្គជំនុំជម្រះវិសាមញ្ញក្នុងតុលាការកម្ពុជា ។
ជនជាប់ចោទអៀង ធីរិទ្ធ ត្រូវបានដាក់ឈ្មោះជារឿយៗនៅក្នុងសារព័ត៌មានបរទេសថាជា «ស្ដ្រីទីមួយ» នៃរបបខ្មែរក្រហម ។ ការឲ្យឈ្មោះជា «ស្ដ្រីទីមួយ» បែបនេះ គឺឋានៈមួយមិនត្រឹមត្រូវទាល់តែសោះ ហើយធ្វើឲ្យមានការយល់ខុស ។ អៀង ធីរិទ្ធ មិនមែនជាបុគ្គលមួយរូបដែលបានចូលរួមពាក់ព័ន្ធក្នុងរបបខ្មែរក្រហមដោយសារតែឋានៈរបស់ខ្លួនជាប្រពន្ធរបស់ អៀង សារី និងជាប្អូនថ្លៃរបស់ប៉ុល ពត ទេ តែ អៀង ធីរិទ្ធ ជាសមាជិកាបក្សកុម្មុយនិស្ដកម្ពុជា ដ៏មានឥទ្ធិពលមួយរូបដែលមានអំណាចទូទាំង ប្រទេសក្នុងនាមជារដ្ឋមន្ដ្រីក្រសួងសង្គមកិច្ចនៃរបបកម្ពុជាប្រជាធិបតេយ្យ ។
អត្ថបទរបស់លោកឆាំង យុ បានបន្តថា ក្នុងអំឡុងរបបកម្ពុជាប្រជាធិបតេយ្យ (ខ្មែរក្រហម) បានប្រើអំពើហិង្សាប្រឆាំងនឹងអារម្មណ៍មនោសញ្ចេតនាជាមូលដ្ឋានរបស់មនុស្ស ហើយខ្មែរក្រហមបានចាត់ទុកអាការនៃរោគសញ្ញាសាមញ្ញដូចជា ឈឺក្បាលថាជា ភាពទន់ខ្សោយ និងថាជាជំងឺរបស់ចក្រពត្តិនិយម ។ អ្នកដែលមានបញ្ហាផ្លូវចិត្ដធ្ងន់ធ្ងរដូចអ្វីដែលអៀង ធីរិទ្ធ កំពុងទទួលរងសព្វថ្ងៃ នឹងត្រូវបានកម្ចាត់ចោលភ្លាមដោយរបបខ្មែរក្រហមដែលបានចាត់ទុកថាជាសញ្ញាណនៃភាពទន់ខ្សោយនៃសង្គមដែលត្រូវតែចាត់វិធានការ ។
លោកឆាំង យុ បន្តថា ពេលនេះអៀង ធីរិទ្ធ ត្រូវបានគេផ្ដល់នូវក្ដីមេត្ដា ករុណា ដែលក្ដីមេត្ដាករុណានេះ គាត់បានធ្វើការយ៉ាងសកម្មដើម្បីបំបាត់ចោលក្នុងនាមជារដ្ឋមន្ដ្រីខ្មែរក្រហមមួយរូប ។ ខណៈដែលការធ្វើបែបនេះ គឺជាទង្វើដ៏ឈឺចាប់មួយរបស់ជនរងគ្រោះ ស្របពេលជាមួយគ្នានោះដែរ យើងក៏មានក្ដីសង្ឃឹមយ៉ាងមុតមាំ ក្នុងផ្លូវដ៏វែងឆ្លាយទៅមុខថា ទង្វើនេះនឹងត្រូវបានមើលឃើញថា ជាភាពជោគជ័យដ៏តូចមួយ សម្រាប់ភាពយុត្ដិធម៌ និងភាពថ្លៃថ្នូររបស់មនុស្សជាតិ ៕
ចែករំលែកព័តមាននេះ