រាជធានីភ្នំពេញ ៖ កាលពីយប់ថ្ងៃទី១៦ កញ្ញា នៅហាងនំអប្សរា មានរៀបចំពីភ្លក្សនំអប្សរាប្រចាំឆ្នាំ ដោយមានអតិថិជនជាអ្នកលក់បន្តរាប់រយនាក់មកភ្លក្សរសជាតិនំ ។អ្នកស្រីច័ន្ទ អង្គារ៉ា អនុប្រធានហាងនំអប្សរានិយាយថា នេះជាឆ្នាំទី២ហើយ ដែលហាងនំអប្សរារៀបចំបង្កើតឱ្យមានព្រឹត្តិការណ៍ភ្លក្សនំអប្សរា ដើម្បីផ្តល់ឱកាសឱ្យអតិថិជនជាអ្នកលក់បន្តបានជួបជុំគ្នាភ្លក្សនំអប្សរាដែលកំពុងល្បី និងពេញនិយម ។
នំអប្សរាត្រូវបានបង្កើតឡើងរយៈពេល២៩ឆ្នាំមកហើយ ហើយក្នុងឆ្នាំ២០១២នេះ ហាងនំអប្សរាបានធ្វើការកែច្នៃរសជាតិ និងការវេចខ្ចប់បែបថ្មីប្រកបដោយភាពអនាម័យខ្ពស់ និងកាត់បន្ថយជាតិផ្អែម ដើម្បីតម្រូវទៅដល់អ្នកកើតជំងឺទឹកនោមផ្អែមឱ្យពិសាបានដែរ ។
អ្នកស្រីបញ្ជាក់ថា នំអប្សរាមាន២៩ប្រភេទ និងមានរសជាតិច្រើនមុខ ។ ពីមួយឆ្នាំទៅមួយឆ្នាំការផលិតនំមានការកើនឡើងដោយសារមានអតិថិជនក្នុងស្រុកពេញនិយម ហើយមានទាំងការនាំចេញទៅលក់នៅក្រៅប្រទេសផងដែរ ។ អ្នកស្រីសូមឱ្យអតិថិជនមានការប្រុងប្រយ័ត្នពិនិត្យឱ្យបានត្រឹមត្រូវនៅក្នុងការទិញនំអប្សរាយកទៅពិសា ព្រោះមានការផលិតនំនិងេវចខ្ចប់ដូចគ្នាជាមួយនំអប្សរានេះដែរ សំខាន់ គឺត្រូវមើលអក្សរដែលដាក់ថានំអប្សរា ៕
ចែករំលែកព័តមាននេះ