ខេត្តពោធិ៍សាត់ ៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុ ឯកូនស្រីបែកក្បាលរងរបួសធ្ងន់ដោយសារបើករថយន្តទៅបុកគូទគោយន្តដែលកំពុងធ្វើដំណើរស្របទិសគ្នា នៅលើផ្លូវជាតិលេខ៥ ត្រង់ចំណុចស្ពានសាលាគំរូ សង្កាត់ព្រៃញី ក្រុងពោធិ៍សាត់ កាលពីវេលាម៉ោង១និង១០នាទីរំលងអធ្រាត្រឈានចូលថ្ងៃទី១៨ កញ្ញា ។ ជនរងគ្រោះដែលស្លាប់ជាឪពុកឈ្មោះ សិទ្ធិ ឡឹប អាយុ៥៤ឆ្នាំ ឯកូនស្រីរបួសធ្ងន់ឈ្មោះ ឡឹប ចាវ អាយុ២០ឆ្នាំ ជាជនជាតិខ្មែរ-អ៊ិស្លាម រស់នៅភូមិព្រែកស្តី សង្កាត់លលកស ក្រុងពោធិ៍សាត់ ឯរថយន្តម៉ាកកាមរីពណ៌សស៊េរី៩១ ។
កូនស្រីដែលសម្រាកព្យាបាលនៅមន្ទីរពេទ្យបានរៀបរាប់ប្រាប់ថា ឪពុករបស់នាងរកស៊ីដឹកត្រីពីឃុំកំពង់លួង ស្រុកក្រគរទៅលក់នៅស្រុកមោងឫស្សី ខេត្តបាត់ដំបង ។ នៅថ្ងៃនោះឪពុកនាងបានក្រោកពីយប់ដឹកត្រីប្រាស្រស់ទៅលក់ដូចសព្វដងហើយនាងក៏ទៅជាមួយដែរ ។ ពេលធ្វើដំណើរទៅដល់ស្ពានសាលាគំរូ សង្កាត់ព្រៃញី ក្រុងពោធិ៍សាត់ ចាំងភ្លើងហ្វារថយន្តមកពីមុខមើលមិនឃើញផ្លូវក៏បុកគោយន្តកន្ត្រៃដឹកអុសដែលកំពុងធ្វើដំណើរស្របទិសគ្នាធ្លាក់ទៅចិញ្ចើមថ្នល់ ទើរជាប់នឹងដើមអាកាស្យា ឯរថយន្តខូចផ្នែកខាងមុខខ្ទេចហើយឪពុករបស់នាងត្រូវឈើបង្គោលក្រាក់បុកទម្លុះកញ្ចក់ចំខ្លួនបណ្តាលឱ្យស្លាប់ភ្លាមៗនៅនឹងកន្លែងកើតហេតុ ហើយនាងរងរបួសបែកក្បាលហូរឈាមដែរ ។ ចំណែកម្ចាស់គោយន្តកន្ត្រៃមិនស្គាល់ឈ្មោះមិនដឹងជារបួសធ្ងន់ ឬស្រាលនោះទេ ក្រោយកើតហេតុក៏គេចខ្លួនបាត់ ។
លោកវរសេនីយ៍ត្រី រស់ ចំរើន ប្រធានការិយាល័យនគរបាលចរាចរផ្លូវគោកខេត្តមានប្រសាសន៍ថា ទាំងរថយន្តដឹកត្រី និងគោយន្តដឹកអុសសុទ្ធតែមានកំហុសដូចគ្នា ពោលគឺគោយន្តដឹកអុសពុំមានស្តុប ឬបិទចំណាំងប្លាតជាសញ្ញាឱ្យគេឃើញ រីឯរថយន្តដឹកត្រីមិនគោរពច្បាប់ចរាចរណ៍បើកក្នុងល្បឿនលឿនពេលយប់ ហើយនៅពេលឃើញរថយន្តមកពីមុខមិនបន្ថយល្បឿន ។
លោករស់ ចំរើន បញ្ជាក់ថា គ្រោះថ្នាក់ចរាចរណ៍ដែលកើតមានរាល់ថ្ងៃនេះភាគច្រើនបណ្តាលមកពីកត្តាមនុស្សដូចជា មិនគោរពច្បាប់ចរាចរណ៍ មិនយោគយល់គ្នា បើកហួសល្បឿនកំណត់ បើកបរក្នុងស្ថានភាពស្រវឹង និងងងុយដេកជាដើម ។ រថយន្តនិងគោយន្តត្រូវបានសមត្ថកិច្ចយកទៅរក្សាទុកនៅស្នងការដ្ឋាននគរបាលខេត្តដើម្បីដោះស្រាយតាមច្បាប់ ៕
ចែករំលែកព័តមាននេះ