ខេត្តបាត់ដំបង ៖ បុរសម្នាក់បានត្រូវសមត្ថកិច្ចឃាត់ខ្លួនភ្លាមៗក្រោយពីមានការផ្អើលឆោឡោថា ជននេះស្រវឹង រួចឡើងទៅចាប់រំលោភបងថ្លៃស្រីរបស់ខ្លួននៅលើផ្ទះ កាលពីវេលាម៉ោង១ និង៣០នាទីរំលងអធ្រាត្រឈានចូលថ្ងៃទី១៦ កញ្ញា នៅឃុំតាស្តា ស្រុកសំពៅលូន ប៉ុន្តែត្រូវបែកការណ៍ ហើយត្រូវបានបងថ្លៃធាក់១ជើង និងផ្អើលឆោឡោទាំងយប់ ។
មន្ត្រីការិយាល័យជំនាញឱ្យដឹងថា ជនសង្ស័យឈ្មោះសុខ ត្រប អាយុ៤៦ឆ្នាំ ចំណែកបងថ្លៃស្រី និងជាដើមបណ្តឹងមានអាយុ៥៣ឆ្នាំ ។ ជនសង្ស័យត្រូវសមត្ថកិច្ចឃាត់ខ្លួនភ្លាមៗ ក្រោយពីគ្រួសាររងគ្រោះ និងអ្នកភូមិមានការភ្ញាក់ផ្អើលទាំងកណ្តាលយប់ ហើយជននេះស្ថិតក្នុងស្ថានភាពស្រវឹងជោកជាំ ។
តាមការបំភ្លឺរបស់ស្ត្រីជាបងថ្លៃប្រាប់សមត្ថកិច្ចថា ប្អូនថ្លៃរូបនេះបានឡើងទៅចាប់រំលោភទាំងកំរោល ក្នុងគ្រាដែលរូបគាត់កំពុងដេកលក់លើផ្ទះម្នាក់ឯង ហើយប្តីគាត់ដេកក្នុងអង្រឹងក្រោមផ្ទះ ។ ប្អូនថ្លៃប្រមឹកនេះបានលូនចូលទៅចាប់រំលោភតែម្តង ហើយគ្រានោះគាត់ស្មានថា ប្តី តែពេលជននេះចាប់ផ្តើមខុសពីទម្លាប់របស់ប្តីគាត់ក៏មានការសង្ស័យ ហើយពិនិត្យមើលទៅ ស្រាប់តែភ្ញាក់ព្រើត ព្រោះមិនមែនប្តីផង គឺជាប្អូនថ្លៃទៅវិញ ដោយក្តៅក្រហាយពេកគាត់ក៏ធាក់មួយជើងផ្ងារក្រោយ ហើយក៏មានការភ្ញាក់ផ្អើលតែម្តងទៅ ។
ក្រោយពីត្រូវឃាត់ខ្លួនសួរនាំ ជនកំហូចហ៊ានលូកថ្លើមបងថ្លៃរូបនេះបដិសេធថា ខ្លួនមិនបានចាប់រំលោភបងថ្លៃស្រីទេ តែសារភាពថា ខ្លួនពិតជាស្រវឹង ហើយដោយសារខ្លួនស្រវឹងខ្លាំងពេក ពេលឡើងលើផ្ទះក៏ដើរជំពប់ជើងដួលលើគាត់ ។ ជននេះបញ្ជាក់ថា ខ្លួនគ្មានចេតនាធ្វើបែបនេះទេ តែដោយសារខ្លួនស្រវឹងទើបគេចេះតែចោទទៅ។ ប៉ុន្តែចុងក្រោយជនឈ្មោះសុខ ត្រប បែរជាសារភាពថា ខ្លួនបានចាប់សើយសំពត់បងថ្លៃមែន តែមិនទាន់បានអីៗ… ដូចការចោទរបស់បងថ្លៃឡើយ ។
ទោះជាយ៉ាងនេះក្តី មន្ត្រីជំនាញនិយាយដែរថា ដោយយោងតាមបណ្តឹងរបស់ស្ត្រីជាបងថ្លៃ និងចម្លើយសារភាពរបស់ជនត្រូវចោទ លោកស្នងការខេត្ត និងលោកព្រះរាជអាជ្ញាអមសាលាដំបូងខេត្ត បានបញ្ជាឱ្យកសាងសំណុំរឿងបញ្ជូនជននេះទៅកាន់សាលាដំបូងហើយដើម្បីសាកសួរបន្ត និងចាត់ការតាមនីតិវិធី ៕
ចែករំលែកព័តមាននេះ