រាជធានីភ្នំពេញ ៖ ចន្លោះពេល១ម៉ោងមានគ្រោះថ្នាក់ចរាចរណ៍២ករណីនៅខណ្ឌមានជ័យ កាលពីយប់ថ្ងៃទី១៦ កញ្ញា បង្កឡើងដោយរថយន្តបុករបាំងថ្ម និងម៉ូតូSLបុកគ្នាជាមួយរ៉ឺម៉កម៉ូតូបណ្តាលឱ្យបុរសម្នាក់ស្លាប់នៅកន្លែងកើតហេតុដែលករណីទី១ រថយន្តកាមរីគូទហើមបានបើកបុករបាំងថ្មលើកំណាត់ផ្លូវវេងស្រេង ភូមិដំណាក់៤ សង្កាត់មានជ័យ ខណ្ឌមានជ័យ បណ្តាលឱ្យរបាំងថ្មបាក់១កង់ខ្ទាតជាង១០ម៉ែត្រ ឯរថយន្តក្រឡាប់មួយត្រឡប់ កាលពីវេលាម៉ោង៩និង៤០នាទីយប់ ។
តាមប្រភពពីមន្ត្រីសមត្ថកិច្ចដែលចុះទៅអន្តរាគមន៍នៅចំណុចកើតហេតុបានឱ្យដឹងថា មុនពេលកើតហេតុមានបុរសម្នាក់វ័យជាង៣០ឆ្នាំស្ថិតក្នុងស្ថានភាពស្រវឹងជោក បានបើករថយន្តមួយគ្រឿងម៉ាកកាមរីគូទហើម ពណ៌ស្លែ តាមបណ្តោយផ្លូវវេងស្រេងក្នុងទិសដៅពីជើងទៅត្បូង លុះមកដល់ចំណុចខាងលើស្រាប់តែរថយន្តរេចង្កូតបុករបាំងថ្មចែកទ្រូងផ្លូវពេញទំហឹងបណ្តាលឱ្យបាក់មួយកង់ខ្ទាតពីចំណុចកើតហេតុជាង១០ម៉ែត្រ ឯរថយន្តបានក្រឡាប់មួយត្រឡប់ទៅលើចិញ្ចើមផ្លូវ ។
គួរបញ្ជាក់ថា ក្នុងហេតុការណ៍ខាងលើនេះមិនបណ្តាលឱ្យមនុស្សរងរបួសធ្ងន់ឡើយ ប៉ុន្តែរថយន្តរងការខូចខាតយ៉ាងដំណំ ។ បន្ទាប់ពីកើតហេតុសមត្ថកិច្ចមូលដ្ឋានបានចុះទៅអន្តរាគមន៍យករថយន្តបង្កហេតុទៅរក្សាទុកនៅសាលារាជធានីភ្នំពេញដើម្បីដោះស្រាយតាមផ្លូវច្បាប់ ។
ករណីទី២ បុរសម្នាក់បានស្លាប់បាត់បង់ជីវិតយ៉ាងអាណោចអាធ័មក្នុងហេតុការណ៍គ្រោះថ្នាក់ចរាចរណ៍មួយដែលបានកើតឡើងនៅលើកំណាត់ផ្លូវលេខ៣៧១ ភូមិត្នោតជ្រំ សង្កាត់បឹងទំពុន ខណ្ឌមានជ័យ កាលពីវេលាម៉ោង១០និង៤០នាទីយប់ ។បុរសរងគ្រោះឈ្មោះ កែវ មាន អាយុ២៦ឆ្នាំ មានស្រុកកំណើតខេត្តកំពត បច្ចុប្បន្នស្នាក់នៅបណ្តោះអាសន្នក្នុងរាជធានីភ្នំពេញ ។ មុនពេលកើតហេតុឈ្មោះ កែវ មានបានជិះម៉ូតូម៉ាកSLពណ៌ទឹកប្រាក់ធ្វើដំណើរតាមបណ្តោយផ្លូវលេខ៣៧១ ក្នុងទិសដៅពីលិចទៅកើត ។
លុះដល់ចំណុចមុខផ្ទះសំណាក់លឹម ហេង ក៏បានបុកគ្នាជាមួយរ៉ឺម៉កម៉ូតូបណ្តាលឱ្យដួលបោកក្បាលស្លាប់ភ្លាមៗ ។ក្រោយពេលកើតហេតុរ៉ឺម៉កម៉ូតូបានបើករត់គេចបាត់ ចំណែកសពបុរសរងគ្រោះត្រូវសមត្ថកិច្ចទំនាក់ទំនងទៅសាច់ញាតិឱ្យមកទទួលយកទៅធ្វើបុណ្យឯស្រុកកំណើត ៕
ចែករំលែកព័តមាននេះ