ខេត្តក្រចេះ ៖ អនុវត្តតាមផែនការសកម្មភាពលេខ០៤៦ របស់គណៈបញ្ជាការដឹកនាំបញ្ជាត្រួតពិនិត្យលើការអនុវត្តច្បាប់ចរាចរណ៍ផ្លូវគោក និងសេចក្តីណែនាំលេខ០០៤ក្នុងការអនុវត្តផែនការសកម្មភាពបន្តជំរុញការអនុវត្តច្បាប់ចរាចរណ៍ផ្លូវគោក របស់មន្ត្រីជំនាញចរាចរណ៍ខេត្ត ដែលមានរយៈពេលជាងមួយឆ្នាំមកនោះ មានអ្នកធ្វើដំណើរតាមទោចក្រយានយន្តចំនួនជិត៨០ភាគរយដែលប្រើប្រាស់មួកសុវត្ថិភាព និងទោចក្រយានយន្តមានលក្ខណៈបច្ចេកទេសត្រឹមត្រូវតាមច្បាប់ ។
លោកវរសេនីយ៍ឯក ហន ប៉ូច ស្នងការរងកណ្តាលសណ្តាប់ធ្នាប់នៃស្នងការដ្ឋាននគរបាលខេត្តបានឱ្យដឹងនៅព្រឹកថ្ងៃទី១៧ កញ្ញាថា បន្ទាប់ពីមានការចុះអនុវត្តយ៉ាងសកម្មរបស់គណៈបញ្ជាការដឹកនាំបញ្ជាត្រួតពិនិត្យការអនុវត្តច្បាប់ចរាចរណ៍ផ្លូវគោកយ៉ាងសកម្មរាល់ថ្ងៃក្នុងខេត្ត រហូតទល់ពេលនេះអ្នកធ្វើដំណើរតាមទោចក្រយានយន្តមានលក្ខណៈបច្ចេកទេសត្រឹមត្រូវ ពោលគឺពាក់មួកសុវត្ថិភាព និងម៉ូតូមានកញ្ចក់មើលក្រោយបានចំនួន៧៥ភាគរយហើយ ។ លោកស្នងការរងបានបញ្ជាក់ថា ការរឹតបន្តឹងគឺសមត្ថកិច្ចបានធ្វើការផាកពិន័យ និងបានណែនាំពួកគាត់ឱ្យយល់អំពីអត្ថប្រយោជន៍នៃការធ្វើដំណើរដោយពាក់មួកសុវត្ថិភាព អាចកាត់បន្ថយគ្រោះថ្នាក់ពីស្លាប់មករបួសធ្ងន់ និងពីធ្ងន់មករបួសស្រាល ។
លោកស្នងការរងបានបន្ថែមថា នាដើមខែតុលាខាងមុខនេះសមត្ថកិច្ចនឹងបន្តទិសដៅត្រួតពិនិត្យលើល្បឿនរថយន្តបើកបរលើសល្បឿនកំណត់ ដែលកំពុងធ្វើចរាចរណ៍តាមផ្លូវនានា ក្នុងទីប្រជុំជនបន្តទៀត ៕
ចែករំលែកព័តមាននេះ