យោងតាមប្រព័ន្ធផ្សព្វផ្សាយជាច្រើនបានរាយការណ៍ថា កំពូលកីឡាករប្រដាល់ពូកែដៃឆ្វេងម៉ានី ប៉ាក់គីអាវសង្ឃឹមនឹងវិលត្រឡប់ឡើងសង្វៀនប្រកួតជាថ្មីនៅថ្ងៃទី៨ខែធ្នូចុងឆ្នាំនេះដោយជួបជាមួយគូសត្រូវចាស់ចូអានម៉ានូអែល ម៉ាកហ្គេស ។អ្នករៀបចំការប្រកួតលោក បប់ អារ៉ាំបានថ្លែងថា ការចរចាទាំងឡាយកំពុងតែត្រូវបានធ្វើដើម្បីឈានដល់កិច្ចព្រមព្រៀងគ្នាជាផ្លូវការមួយក្នុងពេលដ៏ឆាប់ខាងមុខនេះ ប៉ុន្តែលោកមិនបានផ្តល់ព័ត៌មានជាពិស្តារនោះទេ ។
ការជួបគ្នាលើកទី៣កាលពីខែវិច្ឆិកានៅក្រុងឡាសវេហ្គាសឆ្នាំទៅមិញ ប៉ាក់គីអាវបានយកឈ្នះម៉ាកហ្គេសដោយពិន្ទុយ៉ាងប្រផិតប្រផើយហើយកីឡាករហ្វ៊ីលីពីនរូបនេះបាននិយាយនាពេលនោះថា ខ្លួនរីករាយនឹងផ្តល់ការប្រកួតឱ្យម៉ាកហ្គេសជាថ្មីម្តងទៀតពេលណាក៏បាន ។ «វានឹងធ្វើឱ្យខ្ញុំក្លាយជាអ្នកចម្បាំងម្នាក់ដែលទទួលបានការប្រកួតសងសឹក ។ នៅក្នុងការប្រកួតសងសឹកនោះ ខ្ញុំនឹងបញ្ឈប់គេ(ម៉ាកហ្គេស)មុនទឹកទី១២។ ខ្ញុំពិតជាចង់ឱ្យមានការប្រកួតសងសឹក »។
ទោះជាយ៉ាងនេះក្តី រហូតមកទល់ពេលនេះ ការប្រកួតសងសឹករវាងកីឡាករទាំង២រូបមិនទាន់លេចចេញជារូបរាងពិតប្រាកដនៅឡើយទេ ដែលតាមសេចក្តីរាយការណ៍ ក៏ព្រោះតែការជួបគ្នាកាលពីលើកទី១ ការលក់សំបុត្រតាមទូរទស្សន៍មើលបង់ប្រាក់បានតិចតួច ។
ដោយឡែកសម្រាប់ការប្រកួតលើកទី៣ លក់សំបុត្រតាមទូរទស្សន៍មើលបង់ប្រាក់របស់ពួកគេបានស្ទុះឡើងគួរឱ្យភ្ញាក់ផ្អើលដោយមានអ្នកបង់ប្រាក់ទិញមើលការប្រកួតប្រមាណ ៤០ម៉ឺននាក់ ពោលគឺច្រើនជាងការជួបគ្នារវាងប៉ាក់គីអាវនិងប្រែ៊តលីកាលពីថ្ងៃទី៧ ខែមិថុនា ។
សូមបញ្ជាក់ថា ប៉ាក់គីអាវនិងម៉ាកហ្គេសធ្លាប់ជួបគ្នាចំនួន៣លើករួចមកហើយ ។ លើកទី១នៅឆ្នាំ២០០៤ ដែលលទ្ធផលស្មើគ្នា ។ ៤ឆ្នាំក្រោយមក ពួកគេជួបគ្នាជាលើកទី២ ហើយជាលទ្ធផល ប៉ាក់គីអាវឈ្នះដោយពិន្ទុ ។ ឯការជួបគ្នាជាលើកទី៣កាលពីខែវិច្ឆិកា ឆ្នាំទៅមិញ ប៉ាក់គីអាវយកឈ្នះដោយពិន្ទុជាដដែល ។
លើឯតទគ្គកម្មប្រកួតវិញ ប៉ាក់គីអាវឈ្នះ៥៤ លើក ចាញ់៤លើក ស្មើ២លើក និងធ្លាប់ផ្តួលដៃគូឱ្យសន្លប់ចំនួន ៣៨លើក ខណៈម៉ាកហ្គេសឈ្នះ ៥៤លើកដូចគ្នា តែចាញ់៦លើក ស្មើ១លើក និងផ្តួលដៃគូឱ្យសន្លប់បានចំនួន៣៩លើក ៕
ចែករំលែកព័តមាននេះ