ទីភ្នាក់ងារព័ត៌មានបរទេសផ្សាយថា កីឡាករ អង់ដ្រេ សានតូស ខ្សែការពារជនជាតិប្រស៊ីលរបស់ក្លិបកាំភ្លើងធំ Arsenal ទទួលការចោទប្រកាន់ថាបើកបររថយន្តក្នុងល្បឿនលឿន និងជំទាស់លើការឃាត់ខ្លួនរបស់ប៉ូលិស ដោយការបើកបររថយន្តគេច ប៉ុន្តែត្រូវចាប់ខ្លួននៅឆ្ងាយពីទីលានហាត់សមប្រហែល៣គីឡូម៉ែត្រ ។
កីឡាករខ្សែការពារ អាយុ២៩ឆ្នាំរូបនេះ ត្រូវចាប់ខ្លួនកាលពីខែមុន ក្រោយពីបើកបររថយន្តក្នុងល្បឿនលឿនជាង២០០គីឡូម៉ែត្រក្នុងមួយម៉ោង និងបដិសេធការឃាត់ខ្លួនរបស់ប៉ូលិស ។ កីឡាករសានតូស ដែលផ្លាស់មកលេងឱ្យក្លិប Arsenal កាលពីឆ្នាំមុន ដោយចាកចេញពីក្លិប Fenerbahee ក្នុងលីករបស់តួកគី នឹងត្រូវបង្ហាញខ្លួននៅតុលាការនាថ្ងៃទី២៧ កញ្ញា ខាងមុខ និងអាចជាប់ពន្ធនាគាររយៈពេលពីរឆ្នាំប្រសិនបើរឿងក្តីរបស់គេត្រូវបញ្ជូនបន្តទៅតុលាការកំពូល និងត្រូវសម្រេចថាមានកំហុសពិតមែន ។
សានតូស ដែលស្ថិតក្នុងដំណាក់កាលសម្រាកលម្ហែកាយ ខណៈពេលមិត្តភក្តិរួមក្លិបជាមួយច្រើននាក់កំពុងទៅលេងឱ្យក្រុមជម្រើសជាតិនៅមិនទាន់បង្ហាញការយល់ឃើញណាមួយលើការចោទប្រកាន់នេះ ក្រោយពីធ្លាប់ផ្តល់បទសម្ភាសន៍ក្នុងន័យដោះសាថា ហេតុការណ៍នេះ បានកើតឡើងក្នុងខណៈពេលខ្លួនកំពុងបើកបររថយន្តទៅហាត់សមនៅពេលព្រឹកជាប្រក្រតី ប៉ុន្តែដោយសារគេមានភាពយឺតយ៉ាវបន្តិច ធ្វើឱ្យគេត្រូវបង្កើនល្បឿនលើសពីការកំណត់ ៕
ចែករំលែកព័តមាននេះ