ខេត្តព្រៃវែង ៖ គ្រោះថ្នាក់ចរាចរណ៍មួយ បានកើតឡើងនៅលើកំណាត់ផ្លូវលំមួយកន្លែងស្ថិតក្នុងភូមិស្នួល ឃុំគ្រញូង ស្រុកកំចាយមារ កាលពី វេលាម៉ោង៩និង៤០នាទីព្រឹក ថ្ងៃទី១៣ កញ្ញា ធ្វើឱ្យមនុស្សម្នាភ្ញាក់ផ្អើល និងរត់ទៅចោមរោមមើលយ៉ាងកកកុញ ។ ឧប្បត្តិហេតុគ្រោះថ្នាក់ខាងលើនេះ បណ្តាលឱ្យមន្ត្រីប៉ូលិសម្នាក់ឈ្មោះស៊ុន ស៊ីនរ៉ា អាយុ២៨ឆ្នាំ រងរបួសផ្នែកក្បាលយ៉ាងធ្ងន់ធ្ងរ ត្រូវបានដឹកបញ្ជូនទៅកាន់មន្ទីរពេទ្យរាជធានីភ្នំពេញភ្លាមៗ ។ ជនបង្កត្រូវគេស្គាល់ឈ្មោះសេន ភារុណ របួសស្រាលហើយត្រូវសមត្ថកិច្ចឃាត់ខ្លួនបញ្ជូនទៅកាន់អធិការដ្ឋាននគរបាលស្រុកកំចាយមារ ។
តាមប្រភពព័ត៌មានបានឱ្យដឹងថា មុនពេលកើតហេតុគេឃើញមន្ត្រីប៉ូលិសនោះជិះម៉ូតូ១គ្រឿងម៉ាកវ៉េវអាល់ហ្វាពណ៌ខៀវ ចេញមកពីភូមិទួលសង្កែ ឆ្ពោះទៅស្ពានស្តៅដើម្បីរង់ចាំទទួលស្វាគមន៍គណៈប្រតិភូដែលឆ្លងកាត់ តំបន់នោះពេលមកដល់ចំណុចកើតហេតុក៏ត្រូវម៉ូតូ១គ្រឿងម៉ាកវ៉េវអិុច ពណ៌ក្រហមអត់ស្លាកលេខ ជិះក្នុងទិសដៅបញ្ច្រាសគ្នាបើកដោយឈ្មោះ សេន ភារុណ បុកចំពីមុខពេញទំហឹងបណ្តាលឱ្យដួលបោកទៅនឹងថ្នល់សន្លប់ស្តូកស្តឹងក៏ផ្អើលមនុស្សម្នាទៅចោមរោមមើលពេញផ្លូវ និងបានបញ្ជូនជនរងគ្រោះ ទៅកាន់មន្ទីរពេទ្យឯរាជធានីភ្នំពេញភ្លាមៗ ។
ចំណែកជនបង្កដែលរបួសស្រាលបាននាំទៅលាងរបួសនៅគ្លីនិកឯកជនមួយកន្លែងក្នុងទីរួមស្រុករួចក៏នាំខ្លួនទៅកាន់អធិការដ្ឋានដើម្បីឃុំខ្លួនជាបណ្តោះអាសន្ន ។ មន្ត្រីម្នាក់នៅ ស្រុកកំចាយមារបានឱ្យកោះសន្តិភាពដឹងថា មុនពេលកើតហេតុនោះជនបង្កមានគ្នា៣នាក់ជិះម៉ូតូ៣គ្រឿងសុទ្ធតែគេចពន្ធ នាំចូលពីប្រទេសវៀតណាមតាមច្រកទ្វារអន្តរជាតិព្រៃវល្លិ ខេត្តស្វាយរៀង គោលដៅឆ្ពោះទៅកាន់ឃ្លាំងធំនៅខេត្តកំពង់ចាម ។
ពេលមកដល់កន្លែងកើតហេតុមិនដឹងជាយ៉ាងម៉េចក៏ជិះទៅបុកមន្ត្រីប៉ូលិសដែលកំពុងឈររង់ចាំទទួលស្វាគមន៍គណៈប្រតិភូឆ្លងកាត់ទីនោះបណ្តាលឱ្យដួលបោកក្បាលសន្លប់ស្តូក ។ក្រោយពេលកើតហេតុចរាចរណ៍ខាងលើនេះភ្លាម លោកថៅកែធំម្នាក់បានចេញមុខមកធានាជនបង្ក ប៉ុន្តែលោកអធិការមិនអនុញ្ញាតទេ ៕
ចែករំលែកព័តមាននេះ