រាជធានីភ្នំពេញ ៖ ស្នាដៃស្ថាបត្យកម្មរបស់និស្សិតមកពីសាកលវិទ្យាល័យចំនួន៦នៅក្នុងរាជធានីភ្នំពេញក្រោមប្រធានបទ «អា កាសយានដ្ឋានថ្មីមួយនៅក្នុងខេត្តព្រះសីហនុ»បានរៀបចំតាំងបង្ហាញជាសារធារណៈ ក្រោយពីមានការប្រកួតប្រជែងក្រោមការវាយតម្លៃរបស់គណៈកម្មាធិការដើម្បីស្វែងរកអ្នកដែលអាចទទួលបានជ័យលាភីលើស្នាដៃរបស់ខ្លួនក្នុងការសិក្សាស្វែងយល់រយៈ
រាជធានីភ្នំពេញ ៖ ស្នាដៃស្ថាបត្យកម្មរបស់និស្សិតមកពីសាកលវិទ្យាល័យចំនួន៦នៅក្នុងរាជធានីភ្នំពេញក្រោមប្រធានបទ «អា កាសយានដ្ឋានថ្មីមួយនៅក្នុងខេត្តព្រះសីហនុ»បានរៀបចំតាំងបង្ហាញជាសារធារណៈ ក្រោយពីមានការប្រកួតប្រជែងក្រោមការវាយតម្លៃរបស់គណៈកម្មាធិការដើម្បីស្វែងរកអ្នកដែលអាចទទួលបានជ័យលាភីលើស្នាដៃរបស់ខ្លួនក្នុងការសិក្សាស្វែងយល់រយៈពេលជាង៣ខែមកនេះ ។
កម្មវិធីនេះរៀបចំធ្វើកាលពីថ្ងៃទី១៣ កញ្ញានៅវិទ្យាស្ថានបារាំង ក្រោមវត្តមានរបស់លោក ឃួន ឃុននាយ អគ្គនាយករងនៃអាជ្ញាធរអប្សរានិងជាគណៈកម្មាធិការវាយតម្លៃ និងលោកឯកអគ្គរដ្ឋទូតបារាំងប្រចាំកម្ពុជា រួមទាំងតំណាងអ្នកជំនាញពីអាកាសយានដ្ឋានអន្តរជាតិភ្នំពេញ ។
ក្រោយពីការវាយតម្លៃរបស់គណៈកម្មាធិការជំនាញរួចមក ជ័យលាភីលេខ១គឺបានទៅលើនិស្សិតឈ្មោះសារ៉ាន់ សុដ្ឋារិន និងសម រតនា មកពីសាកលវិទ្យាល័យមេគង្គកម្ពុជា ដោយទទួលបានទឹកប្រាក់ចំនួន៥០០ដុល្លារ ។ ចំណែកចំណាត់ថ្នាក់លេខ២បានទៅឈ្មោះពៅ ស៊ីងហាក់សី និងសៀង សំណាង មកពីសាកលវិទ្យាល័យភូមិន្ទ វិចិត្រសិល្បៈ ទទួលបានទឹកប្រាក់៣០០ដុល្លារ និងចំណាត់លេខ៣បានទៅឈ្មោះកែវ សុខលី និងវ៉ា ចិន្តា មកពីសាកលវិទ្យាល័យមេគង្គកម្ពុជា ទទួលបានទឹកប្រាក់២០០ដុល្លារ ។
នៅក្នុងឱកាសនោះ លោកឃួន ឃុននាយមានប្រសាសន៍ថា ការបង្កើតឱ្យមានការប្រកួតប្រជែងស្នាដៃស្ថាបត្យកម្មនេះជាឱកាសថ្មីមួយទៀតសម្រាប់និស្សិតដែលបានសិក្សាលើមុខជំនាញនេះ ព្រោះជាការអនុវត្តផ្ទាល់បន្ទាប់ពីនិស្សិតបានសិក្សាទ្រឹស្តីនៅឯសាលា ។ ដោយសារប្រទេសជាតិមានស្ថិរភាព ការសាងសង់ក៏បានរីករាលដាលយ៉ាងខ្លាំងទាំងនៅទីក្រុងនិងតាមបណ្តាខេត្ត ក្នុងនោះស្ថាបត្យករដែលបានសិក្សាលើមុខជំនាញនេះត្រូវបានស្វែងរកគ្រប់ទីកន្លែង ។ ការប្រកួតនេះជាផ្នែកមួយក្នុងការពង្រឹងផ្នែកអាជីពដើម្បីឆ្ពោះទៅកាន់អនាគតរបស់ខ្លួន ។
លោកអគ្គនាយករងអាជ្ញាធរអប្សរា បានថ្លែងអំណរគុណស្ថានទូតបារាំងប្រចាំកម្ពុជាដែលបានផ្តើមគំនិតឱ្យមានការប្រកួតប្រជែងលើផ្នែកនេះក្នុងរយៈពេល៤ឆ្នាំជាប់គ្នាកន្លងមក ហើយតាមរយៈការប្រកួតប្រជែងនេះបានធ្វើឱ្យមានការកើនឡើងនូវនិស្សិតដែលបានដាក់ពាក្យប្រលងពីមួយឆ្នាំទៅមួយឆ្នាំ ។នៅឆ្នាំនេះមាន៦សាលាដែលបានចូលរួមក្នុងនោះមានសាកលវិទ្យាល័យភូមិន្ទវិចិត្រសិល្បៈ សាកលវិទ្យាល័យ លីម កុកវីង សាកលវិទ្យាល័យETC សាកលវិទ្យាល័យបញ្ញាសាស្រ្ត សាកលវិទ្យាល័យមេគង្គកម្ពុជា និង សាកលវិទ្យាល័យន័រតុន ។
តាមរយៈការប្រកួតប្រជែង លោកឃួន ឃុន នាយជឿថា និស្សិតទាំងអស់នឹងក្លាយខ្លួនទៅជាអ្នកអាជីពនៅក្នុងផ្នែកនេះនាពេលអនាគត ព្រោះមានឱកាសក្នុងការបង្កើតជាគំនិតថ្មីដោយមានការផ្តល់ប្រឹក្សាពីអ្នកដែលមានជំនាញខាងផ្នែកអាកាសយានដ្ឋានបន្ទាប់ពីបានសិក្សាតែគម្រោងទ្រឹស្តីនៅក្នុងសាលា ។ កិច្ចការនេះបានក្លាយជាជំនួយមួយសម្រាប់និស្សិតក្នុងការបណ្តុះគំនិតថ្មីៗបន្ថែមទៀតសម្រាប់ជាទុនមួយជួយដល់ពួកគេដែលបានសិក្សាក្នុងផ្នែកនេះឱ្យក្លាយទៅជាអ្នកដែលមានអាជីពមួយយ៉ាងពិតប្រាកដ។ការប្រកួតប្រជែងស្នាដៃស្ថាបត្យកម្មនេះជាគម្រោងទី៦ក្នុងចំណោមគម្រោងទាំងឡាយរបស់វិទ្យាស្ថានបារាំងនៅកម្ពុជា ៕
ចែករំលែកព័តមាននេះ