ខេត្តព្រះវិហារ ៖ អាជ្ញាធរនិងសមត្ថកិច្ចចម្រុះ កាលពីព្រឹកថ្ងៃទី២៧ ខែមិថុនា ឆ្នាំ២០២៥ ធ្វើការដុតកំទេចចោលផ្លែដូងក្រអូបប្រមាណជាងមួយតោន ក្រោយរកឃើញអំពីការនាំចូលឆ្លងដែនដោយមិនស្របច្បាប់ ។ យោងតាមប្រភពព័ត៌មានឲ្យដឹងថា…
ខេត្តព្រះវិហារ ៖ អាជ្ញាធរនិងសមត្ថកិច្ចចម្រុះ កាលពីព្រឹកថ្ងៃទី២៧ ខែមិថុនា ឆ្នាំ២០២៥ ធ្វើការដុតកំទេចចោលផ្លែដូងក្រអូបប្រមាណជាងមួយតោន ក្រោយរកឃើញអំពីការនាំចូលឆ្លងដែនដោយមិនស្របច្បាប់ ។
យោងតាមប្រភពព័ត៌មានឲ្យដឹងថា មុនឈានដល់ការបង្ក្រាបរឹបអូសផ្លែដូងខាងលើ សមត្ថកិច្ចបានចុះធ្វើការស្រាវជ្រាវលើទំនិញបន្លែស្ពៃក្តោប ដែលដឹកជញ្ជូនតាមផ្លូវទឹកពីប្រទេសឡាវមកកម្ពុជាខុសច្បាប់ត្រង់ចំណុចកំពង់ចម្លងកំពង់ស្រឡៅ ស្រុកឆែប ។សមត្ថកិច្ចបានបន្ត ការសិក្សាស្រាវជ្រាវដល់គោលដៅឬសគល់នៃប្រភពទំនិញក៏បានរកឃើញថា បន្លែស្ពៃក្តោបនោះជាផលិតផលដាំដុះក្នុងប្រទេសឡាវ សមត្ថកិច្ចក៏បានផាកពិន័យអន្តរការណ៍ និងដោះលែងទៅវិញ។
តែខណៈត្រឡប់មកវិញ កម្លាំងសមត្ថកិច្ចក៏ប្រទះឃើញរថយន្តមួយគ្រឿងពាក់ស្លាកលេខក្រុងព្រះសីហនុ ២A-២៣៤៣ កំពុងដឹកជញ្ជូនផ្លែដូង នៅចំណុចកំពុងចម្លងដដែលក៏បានឃាត់សាកសួរនិងបន្តស្រាវជ្រាវករណីនេះជា ថ្មី។ លុះក្រោយមកទើបដឹងថាផ្លែដូងទាំងនោះត្រូវបានឈ្មួញនាំចូលពីប្រទេសថៃ។
កម្លាំងសមត្ថកិច្ចចម្រុះបាត្រួតពិនិត្យឃើញផ្លែដូងក្រអូបទាំងនោះមានចំនួន ២៨៥០ ផ្លែស្នើនឹង១៥០០គីឡូក្រាម.ទឹកដូងច្រកដាកក់ដបចំនួន ២៨០ ដប ស្មើនឹង ៤២០លីត្រ.និងសាច់ដូង ២៤គីឡូក្រាម។ ភ្លាមនោះដែរកម្លាំងសមត្ថកិច្ចចម្រុះក៏បានសម្រេចឃាត់ទុកនិងធ្វើរបាយការណ៍រាយការណ៍រង់ចាំការសម្រេចពីប្រមុខថ្នាក់ដឹកនាំ។
យោងតាមអាជ្ញាធរស្រុកឆែប ឱ្យដឹងថា ក្រោយទទួលបានការណែនាំនិងឯកភាពពីឯកឧត្ដម គីម
រិទ្ធី អភិបាលខេត្តព្រះវិហារ លោក ឃិត សុធារ៉ា អភិបាលស្រុកឆែប បានដឹកនាំកំលាំងគណៈបញ្ជាការរដ្ឋបាលស្រុក ដោយបានសហការជាមួយពីមន្ត្រីគយនៃការិយាល័យស្រាវជ្រាវ និងបង្ក្រាបអំពើរត់ពន្ធតំបន់៥ មន្ត្រីគយសាខាគយ និងរដ្ឋាករខេត្តកំពង់ធំ កម្លាំងរាជអាវុធហត្ថលើផ្ទៃប្រទេស នៅព្រឹកថ្ងៃទី២៧ ខែមិថុនា ឆ្នាំ២០២៥ យកទំនិញទាំងនោះ ទៅធ្វើការដុតបំផ្លាញចោល នៅក្នុងបរិវេណសាលាស្រុកឆែប ធ្វើឡើងនៅចំពោះមុខអ្នកបើកបររថយន្តដឹកដូងក្រអូបនោះផងដែរ។
ប្រតិបត្តិការបង្ក្រាបរឹបអូសផលិតផលដែលនាំចូលពីប្រទេសថៃមកកាន់កម្ពុជាហើយអនុវត្តនីតិវិធីក្នុងការកម្ទេចចោលនោះ វាជាសញ្ញាមួយនៃការព្រមានដល់ក្រុមឈ្មួញឆ្មក់នាំចូលទំនិញឆ្លងដែនដោយគ្មានការអនុញ្ញាត៕
ចែករំលែកព័តមាននេះ