ខេត្តកំពង់ចាម ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងម៉ូតូឌ្រីម C125 ពណ៌ខ្មៅ ស៊េរី២០១១ បុកគ្នាជាមួយម៉ូតូឌ្រីម C125 ស៊េរី២០០៦ នៅលើកំណាត់ផ្លូវជាតិលេខ៧ ស្ថិតនៅភូមិបឹងស្នាយ សង្កាត់សំបួរមាស ក្រុងកំពង់ចាម កាលពីវេលាម៉ោង៥និង៤៥នាទីល្ងាចថ្ងៃទី១៣ កញ្ញា បណ្តាលឱ្យរងរបួសធ្ងន់២នាក់ ត្រូវបានគេបញ្ជូនទៅសង្គ្រោះនៅមន្ទីរពេទ្យក្រោយមកស្លាប់ម្នាក់ជាមន្ត្រីនគរបាលខេត្ត ក្នុងពេលដឹកទៅសង្គ្រោះនៅមន្ទីរពេទ្យកាល់ម៉ែត រាជធានីភ្នំពេញ ។
លោកស៊ាម យូសេង ប្រធាននគរបាលចរាចរនៃអធិការដ្ឋាននគរបាលក្រុងកំពង់ចាម ប្រាប់ឱ្យដឹងថា ជនរងគ្រោះទាំង២នាក់នោះ ១-ឈ្មោះកែវ សុខរឿង ភេទប្រុស អាយុ២១ឆ្នាំ រស់នៅភូមិទី១ សង្កាត់វាលវង់ ក្រុងកំពង់ចាម ជិះម៉ូតូ C125 ស៊េរី២០០៦ ២-ឈ្មោះហ៊ិន គឹមហ៊ុល ភេទប្រុស អាយុ៤៦ឆ្នាំ រស់នៅភូមិបឹងស្នាយ សង្កាត់សំបួរមាស ក្រុងកំពង់ចាម ជិះម៉ូតូ C125 ស៊េរី២០១១ ជាមន្ត្រីនគរបាលផ្នែកបេតិកភណ្ឌខេត្ត ក្រោយមកបានស្លាប់ ។ លោកស៊ាម យូសេង ប្រាប់បន្តថា មុនពេលកើតហេតុលោកគឹម ហ៊ុល បានជិះម៉ូតូចេញពីកើតទៅលិច ចំណែកឈ្មោះសុខ រឿន វិញជិះម៉ូតូបញ្ច្រាសទិសគ្នា ស្របពេលមកដល់ភូមិបឹងស្នាយ ក៏បត់ ដើម្បីឆ្ពោះទៅផ្ទះក៏ជ្រុលទៅបុកម៉ូតូរបស់មន្ត្រីនគរបាលលាន់ដូចរន្ទះតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ