រាជធានីភ្នំពេញ ៖ បុរសម្នាក់បើកបរមិនពាក់មួកសុវត្ថិភាពក្នុងស្ថានភាពស្រវឹងជោកជាំបានបើកម៉ូតូសេ១២៥ ស៊េរី២០១០ លឿនដូចហោះក្នុងទិសដៅពីកើតទៅលិចក្នុងគោលបំណងឆ្លងស្ពានពីច្បារអំពៅទៅក្បាលថ្នល់ ប៉ុន្តែពេលមកដល់គល់ស្ពានត្រើយខាងកើតបានជ្រុលចង្កូតទៅបុកសួនច្បារត្រង់គល់ស្ពានបណ្តាលឱ្យបែកក្បាលផ្នែកខាងក្រោយសន្លប់ឈឹង កាលពីវេលាម៉ោង១២និង២៥នាទីរំលងអធ្រាត្រឈានចូលថ្ងៃទី១៤ កញ្ញា ។
សាក្សីដែលឃើញហេតុការណ៍បានឱ្យដឹងថា បុរសរងគ្រោះពុំត្រូវបានស្គាល់អត្តសញ្ញាណទេ ព្រោះគ្មានលិខិតស្នាមសម្គាល់តាមខ្លួន ប៉ុន្តែអ្នកជិះម៉ូតូផ្សេងមួយទៀតបានប្រាប់ថា បុរសរងគ្រោះនេះទៅលេងផ្ទះបងប្អូននៅឯស្រុកកៀនស្វាយ ហើយផឹកស្រវឹងជោកទើបត្រឡប់មកផ្ទះវិញ ប៉ុន្តែដោយសារបើកម៉ូតូលឿនពេកគាត់បើកតាមក្រោយស្ទើរពុំទាន់ ទោះបីជាស្រែកឃាត់យ៉ាងណា ក៏បុរសនោះនៅតែមិនបន្ថយល្បឿនដដែល លុះមកដល់ចំណុចគល់ស្ពានក្បាលថ្នល់ត្រើយខាងកើតក៏ទៅបុកខឿនសួនច្បារចែកផ្លូវនោះបណ្តាលឱ្យដួលខ្ទាត២-៣ត្រឡប់ ហើយសន្លប់បាត់មាត់ឈឹង ។ សាក្សីបានបន្តទៀតថា អ្នកបើកម៉ូតូតាមពីក្រោយព្យាយាមលាក់អត្តសញ្ញាណប៉ុន្តែបានប្រាប់ប៉ូលិសថា បុរសរងគ្រោះមានលំនៅក្នុងសង្កាត់ចាក់អង្រែលើ ក្បែរស្ពានអាកាសនោះដែរ ។
គួរបញ្ជាក់ថា ដោយសារបុរសខាងលើមិនបានពាក់មួកសុវត្ថិភាព ទើបបណ្តាលឱ្យរងគ្រោះបែកក្បាលផ្នែកខាងក្រោយធ្ងន់ធ្ងរយ៉ាងនេះ ដូច្នេះប្រជាពលរដ្ឋដែលធ្វើដំណើរតាមផ្លូវគួរតែពាក់មួកសុវត្ថិភាពឱ្យបានត្រឹមត្រូវរាល់ពេលបើកបរ ៕
ចែករំលែកព័តមាននេះ