ខេត្តកំពង់ស្ពឺ ៖ ជនជាតិកូរ៉េ២នាក់បានស្លាប់ និងម្នាក់រងរបួសធ្ងន់ក្នុងឧប្បត្តិហេតុផ្ទុះកង់រថយន្តក្រឡាប់ជាច្រើនត្រឡប់កាលពីវេលាម៉ោង៦និង៣០នាទីល្ងាចថ្ងៃទី១៣ កញ្ញា ២០១២ នៅលើកំណាត់ផ្លូវលំលេខ៤២ ពីក្រុងច្បារមន ទៅកាន់ស្រុកឱរ៉ាល់ ។
ហេតុការណ៍នេះត្រូវបានមន្ត្រីប៉ូលិសចរាចរខេត្តរៀបរាប់ថា កើតឡើងខណៈដែលមានជនជាតិកូរ៉េ៣នាក់បានបើកបរចេញពីក្រុមហ៊ុនរបស់ខ្លួនឈ្មោះមី សូភ្លែនភែន ខូអិលធីឌី ជាក្រុមហ៊ុនដាំដំណាំនៅឃុំហោងសំណំ ស្រុកឱរ៉ាល់ ។ ប៉ូលិសបន្តថា រថយន្តនោះបានចេញពីឃុំហោងសំណំឆ្ពោះមកកាន់ក្រុងច្បារមន លុះមកដល់ចំណុចមុខក្លោងទ្វារចូលវត្តអង្គចំណោមមានជ័យ ស្ថិតក្នុងភូមិផ្គង់ សង្កាត់ច្បារមន ក្រុងច្បារមន ស្រាប់តែរថយន្តម៉ាកឡង់គ្រីស្ស័រ ពណ៌ខ្មៅ មួយគ្រឿងនោះបានផ្ទុះបែកកង់ឆ្វេងខាងមុខ និងខាងក្រោយធ្វើឱ្យក្រឡាប់ច្រើនត្រឡប់ បណ្តាលឱ្យអ្នកនៅក្នុងរថយន្តក្រឡុកស្លាប់ដូចគេបោះចោលតាមទ្វាររថយន្ត និងម្នាក់ទៀតបានលូនចេញពីទ្វាររថយន្តយ៉ាងលំបាកត្រូវបានសមត្ថកិច្ចបញ្ជូនទៅសង្គ្រោះនៅមន្ទីរពេទ្យរាជធានីភ្នំពេញ ទាំងយប់ ។ សាក្សីឱ្យដឹងថា រថយន្តនេះបើកក្នុងល្បឿនលឿនដូចហោះ ទើបបែកកង់ក្រឡាប់ជាច្រើនត្រឡប់បែបនេះ ។ មន្ត្រីប៉ូលិសបានប្រាប់ថា ជនដែលរងរបួសធ្ងន់ឈ្មោះចាង យុនហូ ពុំស្គាល់អាសយដ្ឋានត្រូវបានគេបញ្ជូនទៅសង្គ្រោះនៅមន្ទីរពេទ្យកាល់ម៉ែត រាជធានីភ្នំពេញ ចំណែក២នាក់ទៀតបានស្លាប់មិនត្រូវបានគេស្គាល់ឈ្មោះ និងអាសយដ្ឋាននោះទេ ។ ក្រោយពេលកើតហេតុរថយន្ត LAND CRUISER ខូចខាតធ្ងន់ត្រូវបានយកទៅរក្សាទុកនៅការិយាល័យចរាចរណ៍ខេត្តកំពង់ស្ពឺ ៕
ចែករំលែកព័តមាននេះ