រាជធានីភ្នំពេញ ៖ រថយន្តកាមរីពណ៌ឈាមជ្រូកមួយគ្រឿងត្រូវអ្នកបើកបរឈ្មោះ ម៉ឺន សុធី ភេទប្រុស អាយុ៣៤ឆ្នាំ បើកចុះផ្លូវចំណោតជ្រុលទៅបុក អ្នកជិះម៉ូតូនិងផ្ទះលក់គ្រឿងទេស បណ្តាលឱ្យរបួសបាក់ជើងមនុស្ស២ នាក់ និងខូចខាតទ្រព្យសម្បត្តិអស់មួយចំនួន ។ ហេតុការណ៍នេះបានកើតឡើងនៅចំណុចភូមិក្បាលទំនប់ សង្កាត់បឹងទំពុន ខណ្ឌមានជ័យ កាលពីវេលាម៉ោង៥និង១៥នាទីល្ងាច ថ្ងៃទី១២ កញ្ញា ។
សាក្សីបានឱ្យដឹងថា មុនពេលកើតហេតុរថយន្តខាងលើចុះចំណោតផ្លូវលេខ២៧១ តាមច្រកវត្តដំបូកខ្ពស់ ហើយស្ថានភាពប្រថុចញ៉ុចអ្នកបើកបរច្រឡំជាន់ហ្គាស្មានថា ហ្វ្រាំងទើបជ្រុលល្បឿនបុករះម៉ូតូអ្នកដំណើរមួយគ្រឿង បន្តបុកចូលផ្ទះលក់គ្រឿងទេសមួយកន្លែងទៀតបណ្តាលឱ្យមនុស្ស២នាក់របួសបាក់ជើង ដែលម្នាក់ជាអ្នកជិះម៉ូតូ និងម្នាក់ទៀត ជាស្ត្រីអ្នកលក់គ្រឿងទេស ត្រូវបានគេបញ្ជូនទៅសង្គ្រោះនៅមន្ទីរពេទ្យភ្លាមៗផងដែរ ។
ចំណែកឯរថយន្តនិងអ្នកបើកបរត្រូវសមត្ថកិច្ចនាំទៅអធិការដ្ឋាននគរបាលខណ្ឌមានជ័យរង់ចាំដោះស្រាយតាមផ្លូវច្បាប់ ៕
ចែករំលែកព័តមាននេះ