ខេត្តព្រះសីហនុ ៖ ឧប្បត្តិហេតុដ៏គួរឱ្យរន្ធត់មួយបានកើតឡើងខណៈពេលក្រុមគ្រួសារមួយកំពុងប្រារព្ធពិធីបង្កក់កូនស្រីដែលមានភ្ញៀវប្រុស-ស្រីមកចូលរួមពេញផ្ទះ សប្បាយអបអរសាទរ ស្រាប់តែផ្អើលឈុលរត់ជាន់ចែកផ្លូវគ្នាព្រលឹងចុងសក់ ដោយសារតែមានរថយន្តហ៊ីយ៉ាន់ដាយដឹកចេកមួយគ្រឿងដាច់ហ្វ្រាំងរេចង្កូតទៅបុកធ្លាយរបងចូលក្នុងផ្ទះតែសំណាងល្អរថយន្តបានដាច់កង់មុខទាំងពីរទៅមុខលែងរួច កុំអីមនុស្សមិនតិចនាក់ទេត្រូវរងគ្រោះក្នុងករណីនេះ ។ ហេតុការណ៍នេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី១២ កញ្ញា ក្រុមទី១៩ ក្នុងភូមិ២ សង្កាត់លេខ៤ ក្រុងព្រះសីហនុ ។
តាមប្រភពពីមន្ត្រីសមត្ថកិច្ចប៉ូលិសចរាចរខេត្តព្រះសីហនុ បានឱ្យដឹងថា រថយន្តបង្កហេតុម៉ាកហ៊ីយ៉ាន់ដាយ ពណ៌ស បើកដោយបុរសម្នាក់ដែលក្រោយកើតហេតុបានគេចខ្លួនបាត់បន្សល់ទុកកូនប្រុសតូចៗ២នាក់នៅក្នុងរថយន្តត្រូវគេជួយសង្គ្រោះ ។ ប្រភពដដែលបន្តថា អ្នកបើកបរបានចតរថយន្តនៅក្បែរចិញ្ចើមផ្លូវ ដោយដាក់ហ្វ្រាំងដៃ ហើយទុកកូនប្រុសតូចៗ២នាក់នៅក្នុងរថយន្តនោះ រួចចុះទៅទារលុយគេពេលត្រឡប់មកវិញ ក៏ផ្អើលថា រថយន្តបានដាច់ហ្វ្រាំងរអិលទៅបុកទម្លុះរបងផ្ទះគេ រួចក៏គេចខ្លួនបាត់តែម្តង ។ នៅក្នុងឧប្បត្តិហេតុនេះមិនបង្កឱ្យមនុស្សក្នុងពិធីរងគ្រោះថ្នាក់ទេ តែខូចខាតម៉ូតូចំនួន៣គ្រឿង និងរថយន្តមួយគ្រឿងម៉ាកតូយ៉ូតាតាកូម៉ា ពណ៌ស្លែ ផ្នែកខាងមុខ និងរបងផ្ទះត្រូវបាក់ខ្ទេច ។
សាក្សីនិយាយថា ឧប្បត្តិហេតុខាងលើបង្កការភ្ញាក់ផ្អើលយ៉ាងខ្លាំង ។ នៅពេលឃើញរថយន្តដឹកទំនិញធុនធ្ងន់មួយគ្រឿងខាងលើដាច់ហ្វ្រាំងរអិលទៅបុករបងផ្ទះទាំងកំរោល ពេលនោះមានអ្នកឃើញហេតុការណ៍ជួយស្រែកឱ្យគេច ទើបពុំបណ្តាលឱ្យមានអ្នកគ្រោះថ្នាក់ ។ សាក្សីបន្តថា ផ្ទះដែលរងការបុកពីរថយន្តហ៊ីយ៉ាន់ដាយដឹកចេកនេះ ម្ចាស់ឈ្មោះគីម អ៊ុក កំពុងរៀបចំពិធីបង្កក់កូនស្រីអាយុ១ខែឈ្មោះជា លីហ៊ួយ ឯភ្ញៀវដែលមកចូលរួមត្រូវរំសាយទៅផ្ទះរៀងៗខ្លួន ទាំងព្រលឹងចុងសក់មិនទាន់ទាំងចប់កម្មវិធីផង ។
រហូតមកដល់ព្រឹកថ្ងៃទី១៣ កញ្ញា ទើបត្រូវកម្លាំងសមត្ថកិច្ចស្ទូចយករថយន្តខាងលើទៅរក្សាទុកនៅការិយាល័យចរាចរណ៍រង់ចាំដោះស្រាយតាមច្បាប់ ៕
ចែករំលែកព័តមាននេះ