ខេត្តកំពង់ធំ ៖ មេជាងធ្វើទូក.ងម្នាក់ ឈ្មោះកេត ផល (ហៅចូច) រស់នៅភូមិស្លែង ឃុំក្ដីដូង ស្រុកកំពង់ស្វាយ ខេត្ដកំពង់ធំ ជាអ្នកប្រកបរបរធ្វើទូក.ង បច្ចុប្បន្នក្រុមរបស់គាត់មានគ្នាជាង១០នាក់ កំពុងតែធ្វើទូកនៅក្នុងបរិវេណ វិទ្យាស្ថានអភិវឌ្ឍន៏ប្រជាពលករ ស្ថិតក្នុងភូមិ ក្រចាប់ សង្កាត់អាចារ្យលាក់ ក្រុងស្ទឹងសែន បានឱ្យដឹងថា រូបគាត់ជាអ្នកម៉ៅការធ្វើទូក.ង ក្នុងទូកងនិមួយៗ«ខ្នាតវែង» មានបណ្ដោយប្រវែងពី៣៤ម៉ែត្រ ៣៤,៥ម៉ែត្រ និង៣៥ម៉ែត្រ ។ រីឯថ្លៃឈ្នួលធ្វើទូកវិញនោះ ទូកមួយចាប់ពី៣.០០០ដុល្លា ទៅ៣.៥០០ដុល្លាអាមេរិក ដោយប្រើរយៈពេលចាប់ពី២ខែទៅ៣ខែ ទើបធ្វើហើយទូក.ងមួយគ្រឿង ។ គាត់និយាយថានៅក្នុងកន្លែងធ្វើរាល់ថ្ងៃនេះមានទូក.ងចំនួន៤គ្រឿង ធ្វើរួចហើយបានចំនួន២គ្រឿង ពុំទាន់បានលាបថ្នាំ វាយពណ៌នៅឡើយទេ ។ ចំណែក២ទៀតកំពុងតែសម្រុកធ្វើបន្ដដើម្បីឱ្យទាន់រដូវបុណ្យអំទូកខាងមុខនេះ ។
លោកកេត ផល មេជាងទូក.ងនិយាយថា ទូកទាំង៤គ្រឿងនេះ ទី១- ជារបស់លោកងួន ញ៉ិល អនុប្រធានទី១រដ្ឋសភា សម្រាប់ដាក់វត្ដក្ដីសែន (ហៅសែនសេរី) ទី២- របស់លោកឧកញ៉ា ម៉ៅ ភារុន នៅខេត្តកំពង់ចាម ទី៣- បេស់លោក ឧកញ៉ា អិុន សៀ នៅខេត្តកំពង់ចាម និងទី៤- ជារបស់លោកឧកញ៉ាសុខ គង់ ។ ជាងផលរៀបរាប់ថា គាត់គ្រាន់តែជាអ្នកធ្វើទេ បើចង់ដឹងច្បាស់ ឱ្យទៅជួបលោក ជា ជាតិ និងលោកស្រី សុផល ព្រោះពួកគាត់ទាំង២នាក់ជាអ្នកឱ្យរូបគាត់ធ្វើទូកនេះ ។
ជូបជាមួយលោកជា ជាតិ ទីប្រឹក្សាលោក បណ្ឌិតងួន ញ៉ិល និងជាប្រធានមន្ទីរសង្គមកិច្ចខេត្ដ កាលពីថ្ងៃទី៣ ខែកញ្ញា ឆ្នាំ២០១២ លោកមានប្រសាសន៍ថា ចំពោះទូក.ងនេះ លោកដឹងតែ២ទេ ដែលលោកទទួលមើលការខុសត្រូវបន្ទុកបណ្ដាក់ពីថ្នាក់លើ ទី១- គឺទូកលោក បណ្ឌិតងួន ញ៉ិល និងទី២-គឺទូកលោក ហ៊ុន ណេង ។ លោកបន្ដទៀតថា ឈើដែលដឹកមកធ្វើទូក.ងនេះ គឺដឹកមកពីខេត្ដព្រះវិហារ ជាប់ទល់ដែនប្រទេសឡាវ ។ ក្នុងទូក២គ្រឿងត្រូវចំណាយឈើដើមគគីរ បើឈើល្អអស់៣ដើម បើចំឈើអន់ខ្លះៗវិញនោះត្រូវចំណាយដល់ទៅ៤ដើម ទើបធ្វើបានទួក.ង២គ្រឿង ។ ចំណែកតម្លៃទូក.ងវិញមានច្បាប់ និងមានឈើដឹកដល់កន្លែងស្រាប់ឈ្នួលជាងអស់ជាង៣ពាន់ដុល្លារ ។ តែបើមានច្បាប់ ប្រគល់ច្បាប់ឱ្យគេយកទៅដឹកឈើមកធ្វើម៉ារួច គិតទាំងច្រវ៉ាមានចំនួន៨០ច្រវ៉ា ក្នុង១ទូកតម្លៃប្រហែល១ម៉ឺន៣ពាន់ដុល្លា សម្រាប់ទូក.ងមួយគ្រឿង ។ លោកជា ជាតិ និយាយថា ចំណែកទូក.ង២គ្រឿងទៀត ជារបស់ខាងណាពិតប្រាកដលោកពុំបានដឹងច្បាស់ទេ ទាល់តែសួរទៅលោកស្រី សុផល អនុប្រធានមន្ទីរសាធារណការខេត្ដបានដឹង ព្រោះគាត់បានសុំដីវិទ្យាស្ថានអភិវឌ្ឍន៍ប្រជាពលករ ក្រោមការគ្រប់គ្រងរបស់លោក ដើម្បីឱ្យជាងធ្វើទាំងអស់គ្នា ។ ជួបជាមួយលោក ស្រី សុផល តាមទូរស័ព្ទ លោកប្រាប់មកវិញថា រូបលោកទទួលមើលការខុសត្រូវទូក២គ្រឿងជាមួយលោកជា ជាតិ ចំពោះទូក.ងដទៃទៀត លោកពុំបានដឹងព័ត៌មានច្បាស់លាស់ទេ ។
ជុំវិញបញ្ហាធ្វើទូក.ងខាងលើនេះហាក់បីដូចជាឆ្លើយយករួចតែខ្លួនរៀងៗខ្លួន ក្នុងនាមជាម្ចាស់ទីតាំងអនុញ្ញាតឱ្យជាងមកធ្វើទូក.ងឱ្យនៅក្នុងវិទ្យាស្ថានរបស់ខ្លួនគ្រប់គ្រង ដឹងតែទូក២ជារបស់ខ្លួនឯងមើលការខុសត្រូវ ។ ចំណែកទូក.ង២គ្រឿងទៀត មិនដឹងជារបស់អស់លោកខាងណាពិតប្រាកដទេ ចេះតែឆ្លើយដាក់គ្នាពីមួយទៅមួយយករួចតែខ្លួនយ៉ាងដូច្នេះធ្វើឱ្យមានមតិរិះគន់ថា តើសមទេ? តាំងខ្លួនជាអ្នកមើលការខុសត្រូវ ជាមុខ ជាមាត់របស់ថ្នាក់លើ ឱ្យជាងធ្វើទូកជាមួយគ្នាដឹងតែ២គ្រឿង ឯ២គ្រឿងទៀតឆ្លើយដាក់គ្នាទៅវិញ ទៅមក ។
គួរកត់សម្គាល់ថា ទូក.ងដែលធ្លាប់តែធ្វើនៅក្នុងក្រុងព្រះវិហារប្រមាណ១០ឆ្នាំមកហើយ កាលលោកប៉ុល ខាំណារ៉េ នៅធ្វើជាប្រធានរដ្ឋបាលព្រៃឈើខេត្ត ។ សម័យជាង១០ឆ្នាំកន្លងមកនេះ នៅក្រុងព្រះវិហារមិនត្រឹមតែធ្វើទូក.ងទេ គេថែមទាំងធ្វើទូកប៉ុកចាយធំៗដែលក្រោយពីធ្វើរួចត្រូវគេដឹងថា ទូកប៉ុកចាយទាំងនោះផ្ទុកឈើពេញ ហើយចេញដំណើរទៅនៅស្រុកយួនយ៉ាងរំភើបក្នុងរដូវទឹកឡើង ។ ក្រោយពេលលោកប៉ុល ខាំណារ៉េ ចូលនិវត្តន៍ទៅ ការដ្ឋានធ្វើទូក.ង ទូកប៉ុកចាយ និងទូកតូចៗផ្សេងៗទៀតក៏ចូលនិវត្តន៍តាមដែរ ។ ក្រោយបន្តិចមកគេឃើញមានការដឹកជញ្ជូនឈើគគីរមូលធំៗ ពីខេត្តព្រះវិហារឆ្ពោះមកបោះទីតាំងនៅក្រុងស្ទឹងសែន ខេត្តកំពង់ធំវិញម្តង ដូចបានរៀបរាប់ពីទីតាំង និងសកម្មភាពខាងលើនេះ ។
មជ្ឈដ្ឋាននានានិយាយថា មួយឆ្នាំៗមានថ្នាក់ឯកឧត្តមធំៗខ្លះ និងថ្នាក់ឧកញ៉ាខ្លះបានច្បាប់ធ្វើទូក.ងរហូតដល់បានច្បាប់ដឹកជញ្ជូនឈើគគីរធំៗទៀតផង យកមកធ្វើយ៉ាងគគ្រឹកគគ្រេង ។ ក្នុងសកម្មភាពនេះ មានគេនិយាយតៗគ្នាថា បានថ្នាក់លើៗមានច្បាប់ឱ្យធ្វើទូក.ង មិនត្រឹមតែធ្វើទៅតាមច្បាប់នោះទេ ថែមទាំងឆក់ឱកាសធ្វើទូក.ងលក់ជាលក្ខណៈអាជីវកម្មថែមទៀតបំផ្លាញឈើគគីរចង់អស់ពីព្រៃខេត្តព្រះវិហារ ដែលគេនិយាយថា«បានកន្ទេលធំបន្លំដេកជាមួយ» និងដេកជាមួយរាប់ឆ្នាំទៀតផង ។
អ្នកវិភាគនិយាយថា ទូក.ងមួយគ្រឿងៗ ទោះជារបស់អ្នកណាក៏ដោយ ក្រោយពេលធ្វើរួចបានក្លាយជាសម្បត្តិរបស់វត្តអារាម ឬជាគរុភ័ណ្ឌ ដែលជាប្រការមួយគួរឱ្យរីករាយទទួលយក និងគួរតែគាំទ្រ ។ ប៉ុន្តែប្រសិនបើទូក.ងមួយចំនួនធំក្លាយជាមុខរបរជួញដូររបស់ឈ្មួញឆ្លៀតឱកាស គឺអាចជាអំពើទុច្ចរិតដែលគួរតែទប់ស្កាត់ ពុំនោះសោតទេ ឈើគគីរមូលធំៗដែលនៅសេសសល់តិចតួចក្នុងខេត្តព្រះវិហារ នឹងរលាយហិនហោចដោយស្នាដៃឈ្មួញ«បន្លំដេក»ជាមួយ«កន្ទេលធំ»មិនខានឡើយ ។
លោកឆេញ សេង នាយផ្នែករដ្ឋបាលព្រៃឈើត្បែងមានជ័យបានបញ្ជាក់ប្រាប់កោះសន្តិភាពថាការដឹកជញ្ជូនឈើហុបមូលចេញពីខេត្តព្រះវិហារហូរហែក្នុងដើមឆ្នាំ២០១២នេះ ដោយយោងការស្នើសុំពីសំណាក់ឥស្សរៈជនខ្លះៗយកទៅផលិតទូក.ងនៅតាមបណ្តាវត្ត ដើម្បីត្រៀមប្រណាំងក្នុងពិធីបុណ្យអុំទូកឆ្នាំ២០១២នេះ ។
ប្រភពមួយទៀតសុំមិនបញ្ចេញឈ្មោះនិយាយថា នៅដើមឆ្នាំ២០១២នេះ ឈើគគីរមូលប្រភេទលេខ១ ត្រូវបានគេកាប់ពីក្នុងព្រៃ និងដឹកចេញពីខេត្តព្រះវិហារមានប្រមាណ១៨ដើម ហើយសម្រាប់ធ្វើទូក.ង ៕
ចែករំលែកព័តមាននេះ