រាជធានីភ្នំពេញ ៖ ម៉ូតូឌ្រីមសេ១២៥ និងម៉ូតូស្តេប បានបុកគ្នាដួលបែកមុខបែកមាត់នៅចំណុចផ្លូវកែង រួចខ្ទាតទៅប៉ះអ្នកជិះកង់បណ្តាលឱ្យដួល តែសំណាងល្អអ្នកជិះកង់មិនមានរងរបួស ទេ។ គ្រោះថ្នាក់នេះកើតឡើងកាលពីវេលាម៉ោង៨ និង១៥នាទីយប់ថ្ងៃទី១១ កញ្ញា លើកំណាត់ផ្លូវលេខ២២១ កែងផ្លូវលេខ១៤៦ ក្នុងសង្កាត់ផ្សារដេប៉ូទី២ ខណ្ឌទួលគោក ។
សាក្សីឃើញហេតុការណ៍បានឱ្យដឹងថា ម៉ូតូសេ១២៥ ស៊េរី២០០៧ ពណ៌ខ្មៅ ជិះតាមផ្លូវលេខ២២១ ពីជើងទៅត្បូង ចំណែកម៉ូតូស្តេបពណ៌ខ្មៅលាយក្រហម ជិះគ្នា២នាក់ តាមផ្លូវលេខ១៤៦ ពីលិចទៅកើត ខណៈមកដល់ចំណុចផ្លូវកែង ម៉ូតូស្តេបជិះឆ្លងផ្លូវក៏បុកគ្នា បណ្តាលឱ្យម៉ូតូស្តេបខ្ទាតទៅប៉ះកង់មួយគ្រឿងដែលកំពុងជិះពីក្រោយដួលតែមិនបង្កឱ្យអ្នកជិះកង់នេះរងរបួសទេ ។ អ្នកបើកម៉ូតូស្តេបឈ្មោះខេម ហីុ ភេទប្រុស អាយុ២០ឆ្នាំ ជាអ្នកបើករថយន្តដឹកសសរបុកគ្រឹះ និងអ្នករួមដំណើរជាមួយឈ្មោះងុយ សារន ភេទប្រុស អាយុ២០ឆ្នាំ ស្នាក់នៅជាមួយគ្នា ក្នុងខណ្ឌប្ញស្សីកែវ រងរបួសរយះជើង និងបែកមុខបែកមាត់ទាំងពីរនាក់ ។
ចំណែកអ្នកបើកម៉ូតូសេ១២៥មិនប្រាប់ឈ្មោះរងរបួសបែកមុខបែកមាត់ដែរ ។ក្រោយពេលកើតហេតុ ប៉ូលិសបានចុះទៅវាស់វែងរួចឱ្យអ្នកជិះកង់ត្រឡប់ទៅផ្ទះវិញ ព្រោះមិនជាប់ពាក់ព័ន្ធ យកតែម៉ូតូពីរគ្រឿងទៅរក្សាទុកនៅខណ្ឌទួលគោក ដើម្បីដោះស្រាយតាមផ្លូវច្បាប់ ៕
ចែករំលែកព័តមាននេះ