ខេត្តកណ្តាល ៖ កម្មការិនីរោងចក្រកាត់ដេរយីហោវ៉ាន់កូ ប្រហែល៧០នាក់បានដួលសន្លប់ជាបន្តបន្ទាប់នៅក្នុងខណៈពេលដែលពួកគេកំពុងធ្វើការនៅក្នុងរោងចក្រ បង្កឱ្យមានការភ្ញាក់ផ្អើលយ៉ាងខ្លាំង ហើយពួកគេត្រូវបានបញ្ជូនទៅកាន់មន្ទីរពេទ្យស្រុកអង្គស្នួល ដើម្បីសង្គ្រោះបន្ទាន់។ ហេតុការណ៍នេះបានកើតឡើងកាលពីវេលាម៉ោង១០និង១៥នាទីព្រឹកថ្ងៃទី១១ កញ្ញា ២០១២ នៅក្នុងរោងចក្រកាត់ដេរខាងលើ ដែលមានទីតាំងស្ថិតនៅក្នុងភូមិចក ឃុំបែកចាន ស្រុកអង្គស្នួល ។
គេពុំទាន់ដឹងថា តើការដួលសន្លប់នោះបណ្តាលមកពីមូលហេតុអ្វីនៅឡើយទេ ប៉ុន្តែកម្មការិនីទាំងនោះបាននិយាយថា មុនពេលកើតហេតុពួកគេបានចូលធ្វើការជា ធម្មតា ហើយនៅពេលនោះ ស្រាប់តែមានកម្មការិនីម្នាក់ឈ្មោះលន់ សុខា អាយុ៣០ឆ្នាំមានទីលំនៅភូមិអង្គស្លែង សង្កាត់ឪឡោក ខណ្ឌពោធិ៍សែនជ័យ រាជធានី ភ្នំពេញ ដែលបម្រើការងារនៅក្នុងរោងចក្រនោះដែរ មានសតិមិនសូវប្រក្រតីខុសប្លែកពីពេលមុនចេះតែនិយាយនូវពាក្យប្លែកៗបង្កការភ័យខ្លាចដល់គេគ្រប់គ្នា ។ ស្ត្រីម្នាក់នោះបញ្ចេញចរិតហាក់បីដូចជាព្រលឹងខ្មោចចូលខ្លួនគួរឱ្យខ្លាច លុះក្រោយមកស្រាប់តែបាត់ខ្លួនស្ត្រីរូបនោះក៏ឮដំណឹងថា គាត់ទៅចង.កសម្លាប់ខ្លួននៅក្នុងបន្ទប់ទឹកបាត់ទៅហើយ ។
ប្រភពដដែលបានបន្តថា បន្ទាប់ពីបានឮដំណឹងនោះភ្លាមធ្វើឱ្យអ្នកដែលមានស្មារតីតិចភ័យរន្ធត់រួចក៏បានដួលសន្លប់ជាបន្តបន្ទាប់។ ភ្លាមៗគេឃើញសមត្ថកិច្ចមូលដ្ឋានបានចុះទៅកាន់រោងចក្រនោះ ដើម្បីស៊ើបអង្កេតត្រូវក្រុមកម្មករប្រាប់ថា ស្ត្រីរូបនោះព្យាយាមចង.កសម្លាប់ខ្លួនមែន ប៉ុន្តែមិនបានសម្រេចនោះទេ ត្រូវបានគេជួយសង្គ្រោះទាន់ពេលហើយមូលហេតុដែលស្ត្រីនោះប៉ងធ្វើអត្តឃាតដោយចង.ក គឺបណ្តាលមកពីខឹងប្តី ។ ទោះបីបែបណា គេមិនទាន់បានដឹងរឿងនោះកើតឡើងពិតប្រាកដ ឬបែបណានោះឡើយ ហើយភ្លាមៗស្ត្រីរូបនោះត្រូវបានគេជូនទៅសម្រាកនៅផ្ទះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ