រាជធានីភ្នំពេញ ៖ យោងតាមសេចក្តីរាយការណ៍ព័ត៌មានបានឲ្យដឹងថា កាលពីថ្ងៃទី២៥ ខែមិថុនា ឆ្នាំ២០២៥កន្លងទៅ ស្ថាប័នអយ្យការអមសាលាដំបូងរាជធានីភ្នំពេញ បានចេញដីកាបញ្ជាទៅពន្ធនាគារ«ម១»ព្រៃស ឲ្យនាំខ្លួនអតីតឧកញ៉ា ហេង…
រាជធានីភ្នំពេញ ៖ យោងតាមសេចក្តីរាយការណ៍ព័ត៌មានបានឲ្យដឹងថា កាលពីថ្ងៃទី២៥ ខែមិថុនា ឆ្នាំ២០២៥កន្លងទៅ ស្ថាប័នអយ្យការអមសាលាដំបូងរាជធានីភ្នំពេញ បានចេញដីកាបញ្ជាទៅពន្ធនាគារ«ម១»ព្រៃស ឲ្យនាំខ្លួនអតីតឧកញ៉ា ហេង សិទ្ធី មកសាកសួរ ដើម្បីបន្តនីតិវិធីលើសំណុំរឿងដែលជនសង្ស័យជាប់ពាក់ព័ន្ធពីបទគំរាមកំហែងហែកកេរ្តិ៍ មានស្ថានទម្ងន់ទោស ។
ក្រោយពីបញ្ចប់ការសាកសួរ តំណាងអយ្យការអមសាលាដំបូងរាជធានីភ្នំពេញ បានអនុញ្ញាតឲ្យអនុរក្សពន្ធនាគារនាំជនសង្ស័យយកទៅឃុំខ្លួនបណ្តោះអាសន្ននៅពន្ធនាគារវិញ ដោយរង់ចាំបើកការស៊ើបអង្កេតរហូតដល់ទីបញ្ចប់ និងឈានទៅជំនុំជម្រះលើអង្គសេចក្តីទាំងមូល ។
សូមជម្រាបថា កាលពីថ្ងៃទី២៥ ខែឧសភា ឆ្នាំ២០២៥ លោកស្រី យី សុខវួច ចៅក្រមស៊ើបសួរសាលាដំបូងរាជធានីភ្នំពេញ បានចេញដីកាសម្រេចឃុំខ្លួនអតីតឧកញ៉ា ហេង សិទ្ធី ដាក់ពន្ធនាគារ«ម១»ព្រៃស ជាបណ្តោះអាសន្ន ដោយរង់ចាំពេលវេលាសវនាការជំនុំជម្រះទោសទៅតាមផ្លូវច្បាប់ ។
អតីតឧកញ៉ា ហេង សិទ្ធី ដែលត្រូវបានចាប់ខ្លួននៅប្រទេសរុស្ស៊ី បានបញ្ជូនមកដល់កម្ពុជានៅយប់ថ្ងៃទី២៤ ខែឧសភា ឆ្នាំ២០២៥ដើម្បីបន្តនីតិវិធី ។ បើតាមលោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានឱ្យដឹងថា អតីតឧកញ៉ា ហេង សិទ្ធី ត្រូវបានបញ្ជូនមកកម្ពុជា ក្រោមការធ្វើបត្យាប័នរវាងរដ្ឋាភិបាលប្រទេសទាំងពីរ ដែលជាការអនុវត្តតាមដីកាបង្គាប់ឱ្យចាប់ខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ ។
ុគ្គល ហេង សិទ្ធី ត្រូវបានចោទប្រកាន់ពីបទ«គំរាមកំហែងហែកកេរ្តិ៍មានស្ថានទម្ងន់ទោស» ប្រព្រឹត្តនៅប្រទេសកម្ពុជា ក្នុងខែវិច្ឆិកា ឆ្នាំ២០២៤ បទល្មើសព្រហ្មទណ្ឌដែលមានចែងឱ្យផ្តន្ទាទោសតាមបញ្ញត្តិមាត្រា៣៧២ និងមាត្រា៣៧៤ នៃក្រមព្រហ្មទណ្ឌ ។
លោកបានបន្ថែមថា តាមសំណើរបស់ អាំងទែរប៉ូលកម្ពុជា អគ្គលេខាធិការដ្ឋាននគរបាលអន្តរជាតិបានចេញនិវេទន៍ក្រហម ជូនដំណឹងដល់បណ្តាប្រទេសជាសមាជិក ដើម្បីផ្តល់កិច្ចសហការស្វែងរកនិងឃាត់ខ្លួនបុគ្គល ហេង សិទ្ធី ប្រគល់ជូនអាជ្ញាធរកម្ពុជាដើម្បីបន្តនីតិវិធី ។ ផ្អែកលើនិវេទន៍ក្រហមរបស់កម្ពុជា អាំងទែរប៉ូលទីក្រុងមូស្គូប្រទេសរុស្ស៊ី បានឃាត់ខ្លួនបុគ្គល ហេង សិទ្ធី នៅថ្ងៃ១៣ ខែមករា ឆ្នាំ២០២៥ ប្រហែលម៉ោង៧យប់ម៉ោងនៅកម្ពុជានៅចំណុចស្ថានីយរថភ្លើងនៃទីក្រុងសាំងប៉េទែរស្បួរ ក្នុងគោលបំណងធ្វើដំណើរទៅទីក្រុងមូស្គូ ។
អនុលោមតាមច្បាប់ប្រទេសរុស្ស៊ី និងច្បាប់ស្តីពីបត្យាប័នរវាងព្រះរាជាណាចក្រកម្ពុជា និងសហព័ន្ធរុស្ស៊ី ក្រសួងមហាផ្ទៃដែលមានអគ្គស្នងការដ្ឋាននគរបាលជាតិជាសេនាធិការ បានជូនព័ត៌មានទៅក្រសួងយុត្តិធម៌ ដែលមានសមត្ថកិច្ចជាអាជ្ញាធរកណ្តាល និងក្រសួងការបរទេសនិងសហប្រតិបត្តិការអន្តរជាតិ រួមទាំងស្ថានទូតរុស្ស៊ីប្រចាំកម្ពុជា ដើម្បីបំពេញបែបបទស្នើសុំធ្វើបត្យាប័នបុគ្គលត្រូវចោទ ហេង សិទ្ធី យកមកជំនុំជម្រះទោសតាមនីតិវិធីច្បាប់នៃព្រះរាជាណាចក្រកម្ពុជា ។
លោកបានបញ្ជាក់ទៀតថា ពេលនេះ បុគ្គល ហេង សិទ្ធី កំពុងស្ថិតនៅក្នុងដែនសមត្ថកិច្ចរបស់តុលាការ ដើម្បីមានចំណាត់ការបន្តតាមនីតិវិធី ៕
ចែករំលែកព័តមាននេះ