ខេត្តកំពង់ឆ្នាំង ៖ រូបភាពនេះមិនមែនជាខ្សែភាពយន្តទេគឺជារឿងពិតដោយយុវជនម្នាក់បានរងរបួសជាទម្ងន់ដោយសារតែជិះម៉ូតូទៅបុកគូទរថយន្តគេពីក្រោយហើយបានផ្លោងបុកទម្លុះកញ្ចក់ក្រោយចូលខ្លួនទៅក្នុងរថយន្តនោះតែម្តង ។ ហេតុការណ៍នេះបានកើតឡើងនៅវេលាម៉ោង៥និង៤៥នាទីល្ងាចថ្ងៃទី៩ កញ្ញា នៅតាមបណ្តោយផ្លូវជាតិលេខ៥ ត្រង់ចំណុចស្ពានព្រៃកោះ ស្ថិតក្នុងភូមិព្រៃកោះ ឃុំជ្រៃបាក់ ស្រុករលាប្អៀរ ។
មន្ត្រីប៉ូលិសចរាចរស្រុករលាប្អៀរបាននិយាយថា ជនរងគ្រោះឈ្មោះមឿន សុភិន អាយុ២៥ឆ្នាំ មានទីលំនៅភូមិត្រពាំងគ ឃុំជ្រៃបាក់ ស្រុករលាប្អៀរ ។ មុនពេលកើតហេតុជនរងគ្រោះបានជិះម៉ូតូម៉ាកសេ១០០ ពីជើងទៅត្បូងលឿនដូចហោះ លុះមកដល់ចំណុចកើតហេតុបានបើកវ៉ារថយន្តមីនីមួយគ្រឿងម៉ាកគា ផលិតនៅប្រទេសកូរ៉េ ក្នុងដំណើរស្របទិសគ្នា ប៉ុន្តែពេលវ៉ានោះស្រាប់តែវាក់រថយន្តមួយគ្រឿងទៀតបើកបញ្ច្រាសទិសគ្នា ពេលនោះជនរងគ្រោះងាកម៉ូតូទៅស្តាំដៃវិញ ក៏ទៅបុករថយន្តមីនីនោះពីក្រោយពេញទំហឹង បណ្តាលឱ្យអ្នកបើកម៉ូតូរូបនោះផ្លោងទៅបុកធ្លាយកញ្ចក់រថយន្តខាងក្រោយរួចធ្លាក់ចូលទៅក្នុងរថយន្តពាក់កណ្តាលខ្លួនតែម្តង ។ ប្រភពដដែលបានបន្តថា ជនរងគ្រោះបានរងរបួសធ្ងន់ធ្ងរត្រូវបានដឹកទៅសង្គ្រោះនៅមន្ទីរពេទ្យភ្លាមៗ ។
មន្ត្រីប៉ូលិសបានបញ្ជាក់ថា បានជាបង្កឱ្យកើតមានគ្រោះថ្នាក់បែបនេះដោយសារអ្នកជិះម៉ូតូក្នុងស្ថានភាពស្រវឹងហើយលឿន ទើបជួបគ្រោះថ្នាក់បែបនេះ ។ រថយន្តនិងម៉ូតូត្រូវបានយកទៅរក្សាទុកនៅការិយាល័យប៉ូលិសចរាចរផ្លូវគោកដើម្បីរង់ចាំដោះស្រាយតាមផ្លូវច្បាប់ ៕
ចែករំលែកព័តមាននេះ