រាជធានីភ្នំពេញ ៖ ក្លឹបអ្នកកាសែតកម្ពុជា (ក.អ.ក) បានធ្វើសន្និសីទកាសែតស្តីពី «សុខភាពអាហារូបត្ថម្ភ និងសន្តិសុខស្បៀងរបស់កុមារ» មានកិច្ចសហការ ជាមួយអង្គការយូណេស្កូ ក្រោមអធិបតីភាពលោកប៉ែន សមិទ្ធិ ប្រធានក្លឹបអ្នកកាសែតកម្ពុជា គោលបំណងប្រកួតប្រជែងស្នាដៃរបស់អ្នកសារព័ត៌មានជាតិក្នុងនោះអ្នកសារព័ត៌មាន៣រូបទទួលបានជ័យលាភី និងទទួលបានទឹកប្រាក់ក្នុងម្នាក់ៗចំនួន៣០០ដុល្លារ អាមេរិកស្មើៗគ្នា និង២រូបទៀតទទួលបានទឹកប្រាក់លើកទឹកចិត្តចំនួន១០០ដុល្លារអាមេរិក ។ សន្និសីទនេះបានធ្វើនៅថ្ងៃទី៨ កញ្ញា ២០១២ នៅក្លឹបអ្នកកាសែតកម្ពុជា។
លោកប៉ែន សមិទ្ធិ បានមានប្រសាសន៍ថា ក្នុងការប្រឡងប្រជែងនេះ ជ្រើសរើសតែអ្នកសារព័ត៌មានជាតិ (កាសែត ទស្សនាវដ្តី វិទ្យុ និងគេហទំព័រ) ដែលសរសេរទាក់ទិននឹងសុខភាពមាតា និងទារក និងសន្តិសុខស្បៀងរបស់កុមារផ្តោតទៅលើប្រធានបទ «ការបំបៅទឹកដោះម្តាយដល់កូនក្នុងរយៈពេល៦ខែដំបូង» «ការជំរុញ និងលើកទឹកចិត្តមាតា និងស្ត្រីមានផ្ទៃពោះឱ្យយកចិត្តទុកដាក់ចំពោះ ការលូតលាស់របស់កូន នឹងទារកក្នុងផ្ទៃ» និង «សារសំខាន់សន្តិសុខស្បៀង និងអាហារូបត្ថម្ភ សម្រាប់ការលូតលាស់របស់កុមារចាប់តាំងពីចាប់កំណើតរហូតដល់អាយុមួយឆ្នាំ» ។
លោកប៉ែន សមិទ្ធិ បន្តថា គោលបំណងនៃការរៀបចំកម្មវិធីប្រកួតប្រជែងនេះ គឺដើម្បីលើកទឹកចិត្តដល់ស្នាដៃ និងការចូលរួមចំណែករបស់អ្នកសារព័ត៌មានកម្ពុជាដែលបានសរសេរអត្ថបទជួយលើកស្ទួយសុខភាពអហារូបត្ថម្ភ និងសន្តិសុខស្បៀងរបស់កុមារលើកទឹកចិត្តបន្ថែមដល់អ្នកសារព័ត៌មានកម្ពុជាបន្តសរសេរ និងបង្កើនការយល់ដឹងពីកម្មវិធីរបស់ MDG-F ស្តីពីកុមារ សន្តិសុខស្បៀង និងអាហារូបត្ថម្ភតាមរយៈអង្គការយូណេស្កូ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ