រាជធានីភ្នំពេញ ៖ យ៉ាងហោចណាស់បុរស២នាក់រងរបួសធ្ងន់ និងម្នាក់ទៀតរបួសស្រាល ក្នុងគ្រោះថ្នាក់ចរាចរណ៍មួយ ខណៈពួកគេជិះម៉ូតូមួយគ្រឿងគេចពីរថយន្តជ្រុលទៅបុកម៉ូតូមួយគ្រឿងទៀតពីក្រោយ បណ្តាលឱ្យដួលប្រកាច់ប្រកិនខ្លួនឯង កាលពីវេលាម៉ោង៧និង៣០នាទីព្រឹកថ្ងៃទី៦ កញ្ញា ចំណុចស្តុបមុខព្រលាន យន្តហោះអន្តរជាតិភ្នំពេញ តាមមហាវិថីសហព័ន្ធរុស្ស៊ី ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
បុរសអ្នកបើកម៉ូតូឈ្មោះម៉ោង លាភ អាយុ២៨ឆ្នាំ បុគ្គលិកក្រុមហ៊ុនថ្នាំលាប ស្នាក់នៅឃុំបឹងធំ ស្រុកអង្គស្នួល ខេត្តកណ្តាល រងរបួសបែកមុខបែកមាត់សន្លប់ស្តូកស្តឹង និងម្នាក់ទៀតឈ្មោះ គិន សារ៉ាត់ អាយុ២៨ឆ្នាំ ធ្វើការជាមួយគ្នា ស្នាក់នៅក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ របួសបាក់ជើងស្តាំ។ ចំណែកម្នាក់ទៀតមិនស្គាល់ឈ្មោះរងរបួសស្រាល ។
ប្រភពព័ត៌មានពីជនរងគ្រោះបានឱ្យដឹងថា មុនពេលកើតហេតុពួកគេទាំងបីនាក់ជិះម៉ូតូសេ១២៥ សេ៊រី២០១២ ពណ៌ខ្មៅ ឌុបគ្នាទៅធ្វើការ ខណៈមកដល់ស្តុបមុខព្រលានយន្តហោះអន្តរជាតិភ្នំពេញ មានរថយន្តកាមរីឆ្លាម ពណ៌ស្ករ មួយគ្រឿង បើកឆ្លងស្តុប ហើយម៉ូតូរបស់គេបើកលឿនគួរសមដែរ គេចពីរថយន្តនោះក៏ជ្រុលទៅបុកម៉ូតូ១២៥ មួយគ្រឿងទៀតពីក្រោយបណ្តាលឱ្យដួលប្រកាច់ប្រកិនរងរបួសធ្ងន់ស្រាលទាំងបីនាក់ ចំណែកម៉ូតូសេ១២៥ មួយគ្រឿងទៀតនោះមិនបានដួលទេ ហើយបើកទៅមុខបាត់ ។ក្រោយពេលកើតហេតុ ជនរងគ្រោះរបួសធ្ងន់ត្រូវបានបញ្ជូនទៅព្យាបាលនៅមន្ទីរពេទ្យព្រះកុសុមៈ ចំណែកម៉ូតូដែលដួលរងការខូចខាតនោះត្រូវសមត្ថកិច្ចយកទៅរក្សាទុកនៅប៉ុស្តិ៍នគរបាលកាកាប ៕
ចែករំលែកព័តមាននេះ