រាជធានីភ្នំពេញ ៖ ថ្លែងនៅក្នុងពិធីប្រគល់សញ្ញាប័ត្រដល់និស្សិតសកលវិទ្យាល័យឯកទេសនៃកម្ពុជា នៅមជ្ឈមណ្ឌលសន្និសីទកោះពេជ្រ កាលពីថ្ងៃទី៤ ខែកញ្ញា ឆ្នាំ២០១២ កន្លងទៅ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ
រាជធានីភ្នំពេញ ៖ ថ្លែងនៅក្នុងពិធីប្រគល់សញ្ញាប័ត្រដល់និស្សិតសកលវិទ្យាល័យឯកទេសនៃកម្ពុជា នៅមជ្ឈមណ្ឌលសន្និសីទកោះពេជ្រ កាលពីថ្ងៃទី៤ ខែកញ្ញា ឆ្នាំ២០១២ កន្លងទៅ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា «…ខ្ញុំសូមផ្តាំទៅប្រជាពលរដ្ឋគ្រប់ទីកន្លែងសូមកុំមានការព្រួយបារម្ភ ព្រោះវាគ្រាន់តែជាបញ្ហាពេលវេលាតែការវាស់វែងនៅតែវាស់ ឯរឿងដែលមិនព្រមវាស់ឱ្យគឺមានបញ្ហាតែមួយទេ គឺមានទំនាស់គ្នាឯងទុកឱ្យប្រជាពលរដ្ឋដោះស្រាយគ្នាឯង បើរឿងនេះបើភាគីទំនាស់ ព្រមតាមផ្លូវតុលាការ ទុកឱ្យតុលាការជាអ្នកដោះស្រាយ ប៉ុន្តែបើប៉ះពាល់ជាមួយដីរដ្ឋ យើងដោះស្រាយជូន ព្រោះដោយសារគាត់កាន់កាប់អត់ត្រូវច្បាប់ហ្នឹង ហើយទើបយើងទៅតម្រង់ច្បាប់ឲ្យគាត់ប្រគល់ដីឲ្យគាត់ ពាក់ព័ន្ធនឹងដីបរិស្ថានយើងកាត់ឲ្យគាត់ ពាក់ព័ន្ធនឹងដីក្រុមហ៊ុនដែលមិនទាន់ដាំដុះ យើងកាត់ឲ្យគាត់ វាមិនបញ្ហាទេ…» ។
យោងតាមប្រសាសន៍របស់សម្តេចតេជោហ៊ុន សែន ខាងលើនេះ លោកស្រីឈិន សុគន្ឋារី ប្រធានក្រុមប្រឹក្សាភិបាលក្រុមហ៊ុនឡាយីម៉ិចហូលឌីងគ្រុប បានសម្តែងការគាំទ្រនិងភ្ជាប់សំណូមពរសូមឱ្យស្ថាប័នពាក់ព័ន្ឋ មេត្តាដោះស្រាយការបែងចែកដីដែលកំណត់ក្នុងអនុក្រឹត្យលេខ១០១អនក្រ.បក ចុះថ្ងៃទី១០ ខែកក្កដា ឆ្នាំ២០១២ ស្តីពីការកំណត់ផ្ទៃបឹងពោងពាយខាងជើង និងពោងពាយខាងត្បូង ស្ថិតក្នុងសង្កាត់ភ្នំពេញថ្មី សង្កាត់ឃ្មួញ ខណ្ឌសែនសុខ និងសង្កាត់ទួលសង្កែ ខណ្ឌប្ញស្សីកែវ រាជធានីភ្នំពេញ ជាសម្បត្តិសាធារណៈរបស់រដ្ឋ ឱ្យបានច្បាស់លាស់ស្របតាមប្រសាសន៍ដ៏ខ្ពង់ខ្ពស់ខាងលើនេះ ។ ប៉ុន្តែទោះជាយ៉ាងនេះក្តីក៏លោកស្រីបានសម្តែងការព្រួយបារម្ភយ៉ាងខ្លាំង ក្រោយពីទទួលបានព័ត៌មានថា ដីនេះត្រូវបានយកទៅលក់ឱ្យក្រុមហ៊ុនមួយទៅវិញដែលជាកត្តាមួយនាំឱ្យអាជ្ញាធរជំនាញ និងស្ថាប័នពាក់ព័ន្ធពុំអាចអនុវត្តតាមប្រសាសន៍របស់សម្តេចតេជោ ហ៊ុន សែន បានឡើយ ។
មូលហេតុដែលនាំឱ្យមានការសំណូមពរខាងលើនេះ បានត្រូវលោកស្រីឈិន សុគន្ឋារី បញ្ជាក់ថា ក្រុមហ៊ុនឡាយីម៉ិចហូលឌីងគ្រុបដែលមានលោកស្រីជាតំណាង បានប្រមូលទិញដីទំហំ៣៤២.២៣៦,៨៩ម៉ែត្រ ពីប្រជាពលរដ្ឋដែលបានកាន់កាប់ គ្រប់គ្រង ប្រើប្រាស់ និងអាស្រ័យផល តាំងពីឆ្នាំ១៩៧៩ មកម៉្លេះហើយដីនេះភាគខ្លះជាដីលំនៅឋាន ដីស្រែប្រាំង និងដីចម្ការឈូក ហើយប្រជាពលរដ្ឋទាំងនោះបានផ្ទេរសិទិ្ឋមកឱ្យក្រុមហ៊ុនកាន់កាប់គ្រប់គ្រងបន្តតាំងពីឆ្នាំ១៩៩៩ រហូតមកដល់បច្ចុប្បន្ន ។ នៅចន្លោះពេលនោះក្រុមហ៊ុនបានចាក់ដីនិងបានបង់ពន្ឋលើអចលនទ្រព្យជូនរដ្ឋរួចជាស្រេចនៅឆ្នាំ២០១១ ដោយមានលិខិតប្រកាសពន្ឋលើអចលនទ្រព្យប្រចាំឆ្នាំ២០១១ របស់អគ្គនាយកដ្ឋានពន្ឋដាជាភស្តុតាងស្រាប់ ហើយក្នុងនោះក្រុមហ៊ុនក៏មានគម្រោងប្លង់អភិវឌ្ឍន៍រួចជាស្រេចផងដែរ ។
នៅថ្ងៃទី៤ ខែឧសភា ឆ្នាំ២០០៥ ក្រុមហ៊ុនបានធ្វើសំណើសុំធ្វើប័ណ្ណកាន់កាប់ដីធ្លីទៅមន្ទីររៀបចំដែនដី នគរូបនីយកម្ម សំណង់ និង សុរិយោដី រាជធានីភ្នំពេញម្តងរួចមកហើយ និងក្រុមហ៊ុនបានដាក់ពាក្យស្នើសុំជាបន្តបន្ទាប់រហូតមកដល់សព្វថ្ងៃនេះ ។ ចំពោះការស្នើសុំនេះ សាលារាជធានីភ្នំពេញបានចេញលិខិតឆ្លើយតបលេខ១៣៨ ឆត.សម ចុះថ្ងៃទី១ ខែមិថុនា ឆ្នាំ២០០៥ ឱ្យក្រុមហ៊ុនរង់ចាំការធ្វើប្រឡាយមេខាងជើងនិងស្ថានីយបូមទឹកកប់ស្រូវហើយសិន តែឥឡូវនះបានសាងសង់រួចរាល់ជាស្ថាពរអស់ហើយ ។
យោងតាមលិខិត៦២៨ ស.ជ.ណ ចុះថ្ងៃទី២០ ខែមេសា ឆ្នាំ២០០៥ ដែលកំណត់ផ្ទៃបឹងទំហំ១៥៧ហិកតា ឥឡូវនេះរក្សាទុកតែ២០ហិកតា ហើយ២០ហិកតានេះទៀតសោត រក្សាទុកតែតំបន់ជ្រៅ និងលិចទឹកជាប្រចាំតែប៉ុណ្ណោះ ឃើញថាខុសពីដីក្រុមហ៊ុនដែលជាដីគោកជាប់ផ្លូវកៅស៊ូ លេខ១៩២៨ ស្ថិតក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។
លិខិតលេខ៦៩៩ ធ.ទ.ឧ ចុះថ្ងៃទី៣ ខែមេសា ឆ្នាំ២០១២ របស់ក្រសួងធនធានទឹក និងឧតុនិយម ត្រង់ចំណុចIII-ក- ការរក្សាទុកផ្ទៃបឹងដោយមានចំណារឯកភាពពីសម្តេចនាយករដ្ឋមន្ត្រីចុះថ្ងៃទី៩ ខែមេសា ឆ្នាំ២០១២ បានកំណត់យ៉ាងច្បាស់ថា ជាសរុបមកតំបន់បឹង ពោងពោយនៅសល់ផ្ទៃអាងស្តុកទឹកសរុបចំនួន៥៣,៥១ហិកតា ដែលក្នុងនោះមាន៖
១-ផ្ទៃបឹងពោងពាយខាងត្បូងទំហំ៧,៥១ហិកតា
២- ប្រឡាយមេនាំទឹកដែលមានស្រាប់មានទំហំ២៦ហិកតា
និងទី៣- បឹងពោងពាយខាងជើងដែលត្រូវរក្សាទុក២០ហិកតា ជាចំណុចដូចសម្តេចនាយករដ្ឋមន្ត្រីធ្លាប់លើកឡើងកន្លងមកថា ជាតំបន់ជ្រៅ និងលិចទឹកជាប្រចាំ ។
ដូច្នេះយោងតាមលិខិតនេះនិងការកំណត់ព្រំបឹង ព្រមទាំងធ្វើប្រឡាយបានបញ្ចប់ជាផ្លូវការហើយនោះបញ្ជាក់ឱ្យឃើញថា ដីក្រុមហ៊ុនពុំមានពាក់ព័ន្ធនឹងដីបឹងទេ ហើយក្រុមហ៊ុនបានសំណូមពរឱ្យអាជ្ញាធរកាត់ដីដែលមានទំហំជាង៣៤ហិកតា ដែលមានទីតាំងនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ជាកម្មសិទ្ធិរបស់ក្រុមហ៊ុនឡាយីម៉ិចហូលឌីងគ្រុប ចេញពីអនុក្រឹត្យលេខ១០១ អនក្រ.បក ចុះថ្ងៃទី១០ ខែកក្កដា ឆ្នាំ២០១២ ស្តីពីការកំណត់ផ្ទៃបឹងពោងពាយខាងជើង និងពោងពាយខាងត្បូង ស្ថិតក្នុងសង្កាត់ភ្នំពេញថ្មី សង្កាត់ឃ្មួញ ខណ្ឌសែនសុខ និងសង្កាត់ទួលសង្កែ ខណ្ឌប្ញស្សីកែវ រាជធានីភ្នំពេញ ជាសម្បត្តិសាធារណៈរបស់រដ្ឋដើម្បីក្រុមហ៊ុនមានលទ្ធភាពក្នុងការអភិវឌ្ឍន៍យ៉ាងឆាប់នាពេលខាងមុខនេះ ។
នៅថ្ងៃទី៩ ខែកក្កដា ឆ្នាំ២០១២ ក្រុមហ៊ុនបានដាក់លិខិតស្នើជូនទៅសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីសុំអភិវឌ្ឍន៍ និងសុំការចេញប័ណ្ណសម្គាល់កម្មសិទ្ធិរឹងចំពោះដីរបស់ខ្លួន ឱ្យបានស្មើមុខ នឹងម្ចាស់ដី ឬក្រុមហ៊ុនដទៃទាំងនោះ ហើយសម្តេចបានធ្វើចំណារណែនាំឱ្យលោករដ្ឋមន្ត្រីក្រសួងធនធានទឹក និងឧតុនិយមពិភាក្សាជាមួយលោកអភិបាលនៃគណៈអភិបាលរាជធានីភ្នំពេញ ដើម្បីផ្តល់មតិ ។ ប៉ុន្តែចាប់តាំងពីពេលនោះរហូតមកទល់ពេលនេះ ពុំឃើញមានការផ្តល់មតិឡើយ ស្រាប់តែលេចចេញអនុក្រឹត្យលេខ១០១ ចុះថ្ងៃទី១០ ខែកក្កដា ឆ្នាំ២០១២ ហើយបន្ទាប់មកឃើញមានការចុះវាស់វែងដីនៅតំបន់នោះ ឈានដល់ការឃាត់ខ្លួនកម្មករ៥នាក់ដែលកំពុងឈូសពង្រាបលើដីរបស់ក្រុមហ៊ុនទៅវិញ ។
ដោយមានសេចក្តីសង្ឃឹមយ៉ាងខ្លាំងនោះ លោកស្រីឈិន សុគន្ឋារី បានក្រាបសំពះពីចម្ងាយសុំឱ្យសម្តេចតេជោ ហ៊ុន សែន និង លោកជំទាវ ជួយធ្វើអន្តរាគមន៍ដោះស្រាយការបែងចែកដីក្នុងអនុក្រឹត្យនេះឱ្យមានភាពយុត្តិធម៌ ព្រោះលោកស្រីបានចំណាយញើសឈាម និងលុយកាក់អស់ជាច្រើន ដើម្បីទិញដីទំហំជាង៣៤ហិកតានេះ យកមកធ្វើការអភិវឌ្ឍន៍តាមគោលការណ៍របស់រាជរដ្ឋាភិបាល និង ចិញ្ចឹមកូនចំនួន៨នាក់ ព្រមទាំងចៅៗថែមទៀតផង ៕
ចែករំលែកព័តមាននេះ