រាជធានីភ្នំពេញ ៖ នៅព្រឹកថ្ងៃទី៥ ទី៦ និងទី៧ កញ្ញា សាកលវិទ្យាល័យមេគង្គកម្ពុជា បានរៀបចំសិក្ខាសាលាមួយក្រោមប្រធានបទ«កម្មវិធីសិក្សាថ្នាក់ឆ្នាំមូលដ្ឋាន» និងកម្មវិធីតាំងពិព័រណ៍ការសិក្សាអប់រំនៅក្នុងបរិវេណនៃសាកលវិទ្យាល័យមេគង្គកម្ពុជា ដែលមានរយៈពេល៣ថ្ងៃពេញចាប់ពីម៉ោង៨ព្រឹកដល់ម៉ោង៦ល្ងាច ។
រាជធានីភ្នំពេញ ៖ នៅព្រឹកថ្ងៃទី៥ ទី៦ និងទី៧ កញ្ញា សាកលវិទ្យាល័យមេគង្គកម្ពុជា បានរៀបចំសិក្ខាសាលាមួយក្រោមប្រធានបទ«កម្មវិធីសិក្សាថ្នាក់ឆ្នាំមូលដ្ឋាន» និងកម្មវិធីតាំងពិព័រណ៍ការសិក្សាអប់រំនៅក្នុងបរិវេណនៃសាកលវិទ្យាល័យមេគង្គកម្ពុជា ដែលមានរយៈពេល៣ថ្ងៃពេញចាប់ពីម៉ោង៨ព្រឹកដល់ម៉ោង៦ល្ងាច ។
សិក្ខាសាលា និងការតាំងពិព័រណ៍សិក្សាអប់រំនេះ បានរៀបចំឡើងក្នុងគោលបំណងចែករំលែក និងផ្តល់នូវចំណេះដឹងបន្ថែមស្តីពីការសិក្សាទៅលើជំនាញ និងមហាវិទ្យាល័យនីមួយៗជូនដល់ប្អូនៗដែលជាសិស្ស និស្សិតកំពុងត្រៀមខ្លួនចូលសិក្សានៅក្នុងសាកលវិទ្យាល័យ ដើម្បីជាពុទ្ធិមូលដ្ឋានក្នុងការសម្រេចចិត្តឱ្យបានត្រឹមត្រូវក្នុងការចាប់យកជំនាញសិក្សាដើម្បីអាជីពការងាររបស់ប្អូនៗ និងអ្នកស្រឡាញ់ការសិក្សាទាំងអស់ ។
ដោយការតាំងពិព័រណ៍នេះមានការដាក់តាំងបង្ហាញនូវប្រភេទសៀវភៅ ឯកសារ និងសម្ភារសិក្សាជាច្រើនតាមសាលាជំនាញនីមួយៗរបស់សាកលវិទ្យាល័យមេគង្គកម្ពុជា ។ លើសពីនេះទៅទៀត កម្មវិធីនេះក៏មានការចូលរួមសហការពីបណ្តាក្រុមហ៊ុនមួយចំនួនដូចជា ក្រុមហ៊ុនទូរស័ព្ទLG មជ្ឈមណ្ឌលរដ្ឋាលីដឌីង សាលាមេគង្គអន្តរជាតិ ក្រុមហ៊ុន Iknow ដែលបានចូលរួមដាក់តាំងនូវផលិតផលនានាជាច្រើនដើម្បីចូលរួមចំណែកក្នុងការលើកកម្ពស់វិស័យអប់រំ ។
គួរបញ្ជាក់ផងដែរថា ការរៀបចំនូវការតាំងពិព័រណ៍សិក្សាលើកនេះជាលើកទី៣ហើយរបស់សាកលវិទ្យាល័យមេគង្គកម្ពុជា ។ សាកលវិទ្យាល័យមេគង្គកម្ពុជាតែងតែមានការរៀបចំបង្កើតនូវកម្មវិធីសិក្ខាសាលា ការតាំងពិព័រណ៍ និងសកម្មភាពសប្បុរសផ្សេងៗជាច្រើន ហើយកម្មវិធីទាំងអស់នេះអាចរៀបចំ និងប្រព្រឹត្តទៅបានដោយសារប្រទេសកម្ពុជាមានការអភិវឌ្ឍរីកចម្រើនលើគ្រប់វិស័យ ជាពិសេសទៅលើវិស័យអប់រំក្រោមការដឹកនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ។
សាកលវិទ្យាល័យមេគង្គកម្ពុជាមានបាវចនាថា គឺជាសាកលវិទ្យាល័យដែលយកចិត្តទុកដាក់ពីតម្លៃនៃការអប់រំ ហើយមានបេសកកម្មចម្បងក្នុងការបណ្តុះបណ្តាលធនធានមនុស្សដើម្បីជួយអភិវឌ្ឍសង្គមជាតិ និងការប្រកួតប្រជែងជាមួយទីផ្សារពលកម្មជាតិ និងអន្តរជាតិ ។ យោងទៅតាមកត្តាខាងលើនេះហើយទើបសាកលវិទ្យាល័យតែងតែចូលរួមចំណែកក្នុងសកម្មភាពសង្គមជាច្រើនដើម្បីភិវឌ្ឍសង្គមជាតិ និងធនធានមនុស្ស ព្រមទាំងបង្កើតកម្មវិធីជាច្រើនជូនដល់និស្សិតក៏ដូចជាសាធារណជនដែលទទួលស្គាល់សាកលវិទ្យាល័យមេគង្គកម្ពុជា ។
ហេតុដូចនេះហើយ សាកលវិទ្យាល័យមេគង្គកម្ពុជាតែងតែបន្តការខិតខំប្រឹងប្រែងដើម្បីបណ្តុះបណ្តាលធនធានមនុស្សឱ្យក្លាយទៅជាធនធានដែលមានតម្លៃ និងគុណភាពដែលមានសមត្ថភាពក្នុងការប្រកួតប្រជែងក្នុងទីផ្សារសាកលភាវូបនីយកម្មបច្ចេកវិទ្យានាពេលបច្ចុប្បន្ន ដោយផ្តល់ឱ្យនិស្សិតនូវចំណេះដឹងដែលមានគំនិតបង្កើតថ្មី និងភាពច្នៃប្រឌិតជាមួយនឹងកម្មវិធីសិក្សាដែលអាចឱ្យនិស្សិតបញ្ចប់ការសិក្សាប្រកបដោយជំនាញ និងចំណេះដឹងពិតប្រាកដ ។
កម្មវិធីសិក្ខាសាលា និងការតាំងពិព័រណ៍ការសិក្សានេះ មានការចូលរួមពីនិស្សិតនៃសាកលវិទ្យាល័យមេគង្គកម្ពុជា និស្សិតនៅតាមសាកលវិទ្យាល័យនានា សិស្សដែលមកពីតាមវិទ្យាល័យ និងភ្ញៀវកិត្តិយសដែលបានអញ្ជើញមកពីក្រុមហ៊ុន អង្គការ ស្ថាប័នជាតិ និងអន្តរជាតិ នៅក្នុងព្រះរាជាណាចក្រកម្ពុជា មានចំនួនសរុប៧៥០នាក់ ៕
ចែករំលែកព័តមាននេះ