ខេត្តបន្ទាយមានជ័យ ៖ វរសេនាតូចលេខ២ ក្នុងស្រុកស្វាយចេក តាមខ្សែបន្ទាត់ព្រំដែនកម្ពុជា-ថៃ កាលពីថ្ងៃទី៤ កញ្ញា បានប្រារព្ធពិធីបិទវគ្គហ្វឹកហ្វឺនដល់នាយទាហាន ពលទាហានចំនួន៧៥នាក់ ដែលបានហ្វឹកហាត់រយៈពេលមួយខែ គឺចាប់ពីថ្ងៃទី១ ដល់៣០ សីហា ២០១២ ក្រោមការអញ្ជើញចូលរួមពីលោកវរសេនីយ៍ឯក អឿម សំអាត មេបញ្ជាការរងតំបន់ប្រតិបត្តិការសឹករងខេត្ត លោកសឹង ផុន ប្រធានក្រុមប្រឹក្សាស្រុកស្វាយចេក ព្រមទាំងអភិបាលរងស្រុក និងអធិការនគរបាល អាវុធហត្ថស្រុកប្រមាណ១០០នាក់ ។
លោកអនុសេនីយ៍ឯក លេស អាំ មេបញ្ជាការផ្នែកសឹករងស្រុកបានអានរបាយការណ៍ប្រកាសលទ្ធផលពីការហ្វឹកហាត់កន្លងមកដែលទទួលបានលទ្ធផលល្អប្រកបដោយគុណភាពសម្រាប់កងទ័ពដែលកំពុងឈរជើងនៅតាមខ្សែបន្ទាត់ព្រំដែន បន្ទាប់ពីបានអនុវត្តតាមបទបញ្ជារបស់រាជរដ្ឋាភិបាលក្នុងកាតព្វកិច្ចការពារជាតិមាតុភូមិកម្ពុជា និងបន្តគោរពទៅតាមការចង្អុលបង្ហាញណែនាំពីអគ្គបញ្ជាការកងទ័ពជើងគោក និងយោធភូមិភាគទី៥ ដឹកនាំបន្ថែមទៀតនោះ ។ លោកសឹង ផុន មានប្រសាសន៍ឱ្យដឹងថា ក្នុងនាមអាជ្ញាធរស្រុកតែងជួយសម្រួលសហការជាប្រចាំជាមួយកងកម្លាំងប្រដាប់អាវុធមិនត្រឹមតែសន្តិសុខតាមខ្សែបន្ទាត់ព្រំដែនប៉ុណ្ណោះទេ គឺរួមគ្នាទប់ស្កាត់រាល់បញ្ហា និងបទល្មើសផ្សេងៗដែលកើតមាននៅក្នុងតំបន់ផងដែរ ហើយលោកក៏បានអំពាវនាវដល់ប្រជាពលរដ្ឋដែលគ្រប់អាយុបោះឆ្នោតសូមទៅពិនិត្យ និងចូលរួមបោះឆ្នោតឱ្យបានគ្រប់ៗគ្នាក្នុងការបោះឆ្នោតជ្រើសរើសតំណាងរាស្ត្រនាពេលខាងមុខនេះ ដើម្បីបំពេញការប្រើសិទ្ធិ និងជាកាតព្វកិច្ចទូទៅរបស់ប្រជាជនកម្ពុជាក្នុងការជួយជំរុញការអភិវឌ្ឍប្រទេសឱ្យកាន់តែមានការរីកចម្រើនបន្ថែមទៀត។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ