ខេត្តបាត់ដំបង ៖ មានការទម្លាយឲ្យដឹង កាលពីចុងសប្ដាហ៍មុននេះថា ឈ្មួញរកស៊ីជួញដូរឈើគ្រញូង បានប្រើប្រាស់កាំភ្លើង និងគ្រាប់បែកដៃបោកនិងបាញ់សម្លាប់គ្នាយ៉ាងឃោរឃៅ កាលពីអំឡុងពាក់កណ្ដាលខែកក្កដាកន្លងទៅនៅក្បែរតំបន់ព្រំដែនខ្មែរ-សៀម ចំណុច«ពាមតា» ក្នុងភូមិសាស្រ្តឃុំតាតោក ស្រុកសំឡូត។ ប៉ុន្តែការសម្លាប់មនុស្សដ៏ព្រៃផ្សៃដែលគេអះអាងថា បែប«ពាលស៊ីពាល»នេះ ត្រូវ
ខេត្តបាត់ដំបង ៖ មានការទម្លាយឲ្យដឹង កាលពីចុងសប្ដាហ៍មុននេះថា ឈ្មួញរកស៊ីជួញដូរឈើគ្រញូង បានប្រើប្រាស់កាំភ្លើង និងគ្រាប់បែកដៃបោកនិងបាញ់សម្លាប់គ្នាយ៉ាងឃោរឃៅ កាលពីអំឡុងពាក់កណ្ដាលខែកក្កដាកន្លងទៅនៅក្បែរតំបន់ព្រំដែនខ្មែរ-សៀម ចំណុច«ពាមតា» ក្នុងភូមិសាស្រ្តឃុំតាតោក ស្រុកសំឡូត។ ប៉ុន្តែការសម្លាប់មនុស្សដ៏ព្រៃផ្សៃដែលគេអះអាងថា បែប«ពាលស៊ីពាល»នេះ ត្រូវក្រុមជនប្រព្រឹត្ត និងក្រុមអ្នកសមគំនិតបិទបាំងព័ត៌មាននេះជិតឈឹងតែម្ដង ដែលគេសង្ស័យថា សូម្បីតែអាជ្ញាធរ ឬស្ថាប័នសមត្ថកិច្ចមួយចំនួន ក៏មិនបានដឹងពីករណីនេះនៅឡើយដែរ រហូតមកដល់ពេលនេះ ។
ប្រភពព័ត៌មានដែលគួរឲ្យទុកចិត្តមួយបានទម្លាយឲ្យដឹងថា សំណុំរឿងសម្លាប់មនុស្សដ៏សាហាវនៅក្នុងតំបន់ព្រៃភ្នំនេះបានកើតឡើង
កាលពីវេលាម៉ោង១២ថ្ងៃត្រង់ ថ្ងៃទី១៧ កក្កដា ឆ្នាំ២០១២ នៅក្បែរព្រំដែនខ្មែរ-សៀមត្រង់ចំណុច«ពាមតា»ក្នុងភូមិសាស្រ្តឃុំតាតោក ស្រុកសំឡូត ដែលជាតំបន់កាប់បំផ្លាញ និងជួញដូរឈើប្រណីតយ៉ាងអនាធិបតេយ្យ។ ប្រភពដដែលបន្តថា គ្មានអ្នកណាបានដឹងភ្លាមៗទេក្នុងអំពើបាញ់ប្រហារនេះ ។ សំណុំរឿងសម្ងាត់ដែលក្រុមសង្គមងងឹតព្យាយាមលាក់បាំងនេះទើបបានបែកធ្លាយនៅថ្ងៃទី១៧ សីហា កន្លងទៅដល់កម្លាំងប្រដាប់អាវុធមួយក្រុម ហើយព័ត៌មានសម្ងាត់នេះក៏ទើបបែកធ្លាយបន្តដល់អ្នកសារព័ត៌មានកាលពីចុងសប្ដាហ៍មុននេះដែរ ។
ព្រឹត្តិការណ៍បាញ់សម្លាប់មនុស្សដ៏គួរឲ្យរន្ធត់នេះ បើតាមប្រភព់ដែលសុំមិនប្រាប់ឈ្មោះរៀបរាប់ថា នៅថ្ងៃកើតហេតុនោះជនប្រដាប់អាវុធមួយក្រុមដែលគេស្គាល់ថា ជាឈ្មួញរកស៊ីជួញដូរឈើគ្រញូងបានប្រើប្រាស់កាំភ្លើងវែងបាញ់ចំនួន៣គ្រាប់ទៅលើអ្នករកស៊ីកាប់ឈើគ្រញូងលក់ចំនួន២នាក់នៅចំណុច«ពាមតា»នោះ ដែលបណ្ដាលឲ្យយុវជនម្នាក់ឈ្មោះសល់ សែល ហៅកំពង់ស្ពឺ ភេទប្រុស អាយុ២៣ឆ្នាំ ស្លាប់នៅនឹងកន្លែងកើតហេតុដោយត្រូវចំនួន៣គ្រាប់ ។ ប្រភពដដែលបន្តថា ក្រោយពីបាញ់ហើយខ្មាន់កាំភ្លើងបានប្រើប្រាស់គ្រាប់បែកដៃគប់ទៅលើជនរងគ្រោះបន្ថែម២ទៅ៣គ្រាប់ទៀតផ្ទុះលាន់កក្រើកព្រៃ បណ្ដាលឲ្យយុវជនម្នាក់ទៀតឈ្មោះសោម សីហា ហៅឆក ភេទប្រុស អាយុប្រហែលគ្នារបួសភ្លៅខាងឆ្វេង ហើយក្រោយមកត្រូវបានបក្សពួកជនរងគ្រោះផ្សេងទៀត ជួយនាំទៅសង្គ្រោះនៅគ្លីនិកឯកជនមួយនៅក្នុងក្រុងបាត់ដំបង ។ ប្រភពខាងលើបញ្ជាក់ថា ក្រុមជនរងគ្រោះដែលទៅសម្ងំរកស៊ីកាប់ឈើគ្រញូងលក់នៅតំបន់«ពាមតា»នោះមានបក្សពួកសរុបចំនួន១៤នាក់ ប៉ុន្តែនៅថ្ងៃកើតហេតុនៅកន្លែងតែ២នាក់ទេ ឯ១២នាក់ទៀតចេញទៅរកកាប់ឈើក្នុងព្រៃជ្រៅ ។
ប្រភពសម្ងាត់បាននិយាយពីមូលហេតុនៃការបាញ់សម្លាប់មនុស្សនេះថា មុនថ្ងៃបាញ់ប្រហារនេះគឺក្រុមជនរងគ្រោះអារឈើគ្រញូងបានចំនួន១១សន្លឹកដែលមានទំហំធំៗ ហើយក្រុមឈ្មួញ(ក្រុមបាញ់ប្រហារ)បានមកតថ្លៃទិញ ខណៈដែលជនរងគ្រោះនៅតែ២នាក់ចាំកន្លែង ។ លុះត្រូវថ្លៃគ្នា ក្រុមឈ្មួញបានសុំដឹកឈើចេញមុនសិន រួចចាំប្រគល់ប្រាក់ជាក្រោយ តែជនរងគ្រោះមិនព្រម ។ គ្រានោះក៏មានការប្រកែកគ្នាយ៉ាងតឹងតែង រហូតឈានដល់ការប្រើប្រាស់កាំភ្លើង គ្រាប់បែកដៃ និងបាញ់សម្លាប់គ្នាយ៉ាងឃោរឃៅតែម្ដងទៅ ប៉ុន្តែភាគីអ្នកទិញនៅតែបន្តដឹកឈើនោះចេញដដែល ក្រោយពីបាញ់សម្លាប់គូសត្រូវរួច ។ ប្រភពបន្តថា ក្រោយមកភាគីអ្នកទិញក៏ប្រគល់ប្រាក់ថ្លៃឈើនោះឲ្យភាគីរងគ្រោះ ។ ក្រោយពីបានប្រាក់ក្រុមអ្នកកាប់ឈើក៏បាននាំគ្នាចាកចេញពីតំបន់នោះ មកដេកនៅសណ្ឋាគារ«ធីនី»ក្នុងក្រុងបាត់ដំបង១យប់ ដោយចែកប្រាក់គ្នាបានម្នាក់១.០០០ដុល្លាររួចបែកគ្នាត្រឹមនេះទៅ ។
អ្នកតាមដានករណីនេះនិយាយថា ក្រោយពីសំណុំរឿងនេះបានបែកធ្លាយ គេបានចុះអង្កេតដល់តំបន់កើតហេតុ ហើយអ្នកអង្កេតបានកសាងសំណុំរឿងនេះដាក់ជួនតំណាងអយ្យការទៀតផង ។ បន្ទាប់មកតំណាងអយ្យការបានដាក់ផែនការសម្ងាត់ឲ្យអង្គភាពវរៈការពារព្រំដែនលេខ៨២៣ និងការិយាល័យទំនាក់ទំនងព្រំដែនប្រចាំតំបន់នោះ ចាត់ការលើករណីនេះបន្ថែមទៀត ។ ប៉ុន្តែរហូតមកដល់បច្ចុប្បន្នគេមិនទាន់ឃើញមានលទ្ធផលឆ្លើយតបពីអង្គភាពខាងលើនេះទេ ជាពិសេសអង្គភាពវរៈការពារព្រំដែនលេខ៨២៣ ដែលមានទីតាំងនៅតំបន់បាញ់សម្លាប់គ្នានោះ ។
តាមការផ្ដល់ព័ត៌មានបន្ថែមថា សពជនរងគ្រោះត្រូវគេកប់ចោលនៅក្នុងព្រៃនោះតែម្ដង។ ប៉ុន្តែអ្វីដែលជាបញ្ហានោះប្រភពបញ្ជាក់ថា អ្នកស្រាវជ្រាវមិនអាចចូលទៅកាន់ផ្នូរសព ឬកន្លែងកើតហេតុបានទេ ដោយសារតែក្រុមជនដៃដល់ប្រើប្រាស់គ្រាប់មីនកប់ដី និងគ្រាប់បែកបង្កៃនៅជុំវិញតំបន់នោះ ក្នុងបំណង ទី១-ការពារមិនឲ្យកម្លាំងសមត្ថកិច្ចចូលពិនិត្យកន្លែងកើតហេតុ និងទី២-ដើម្បីបិទបាំងតំបន់នោះ ដែលជាកន្លែងរកស៊ីបទល្មើសព្រៃឈើដ៏សំខាន់ ។ គេឲ្យដឹងថា តំបន់នោះគ្រប់គ្រងដោយកម្លាំងប្រដាប់អាវុធយោធា និងកម្លាំងនគរបាលការពារព្រំដែនគោកលេខ៨២៣ ។
ប្រភពព័ត៌មានមួយផ្សេងទៀតនិយាយថា ក្រោយពីដឹងថា ឈ្មោះសល់ សែល ត្រូវជនទុច្ចរិតបាញ់សម្លាប់ហើយមិនអាចចូលយកសពបាន ដំបូងក្រុមគ្រួសារបានព្យាយាមធ្វើបុណ្យឧទ្ទិសកុសលជូនវិញ្ញាណក្ខន្ធសពនៅក្នុងស្រុកសំឡូត តែដោយខ្លាចមានបញ្ហា ទើបសាច់ញាតិសម្រេចទៅលួចធ្វើបុណ្យយ៉ាងស្ងាត់ស្ងៀម នៅឯខេត្តប៉ៃលិនវិញ ដោយគ្មានសព ។
ទោះជាបែបណា ជុំវិញសំណុំរឿងនេះ កោះសន្តិភាពមិនទាន់អាចសុំការបំភ្លឺពីស្ថាប័នពាក់ព័ន្ធណាមួយបានទេ កាលពីរសៀលថ្ងៃទី៤ កញ្ញា រាប់ទាំងស្ថាប័នអយ្យការផង ។ ព័ត៌មាននេះត្រូវបានទម្លាយឲ្យដឹងក្រៅផ្លូវការពីប្រភពដែលសុំលាក់ឈ្មោះ។ ប្រភពនេះអះអាងថា គេមានភស្ដុតាងមួយចំនួនដែលមានជាប់ពាក់ព័ន្ធនឹងមន្រ្តីប្រដាប់អាវុធមានអំណាចមួយចំនួននៅតំបន់នោះទៀតផង ហើយមន្រ្តីទាំងនោះបានព្យាយាមបិទបាំងយ៉ាងប្រុងប្រយ័ត្នបំផុតរហូតមកដល់ពេលនេះ ។ ប្រភពនេះបន្តថា គាត់ចង់ឲ្យតុលាការវែកមុខក្រុមជនដៃដល់ទាំងនោះ ព្រោះពួកគេកំពុងប្រព្រឹត្តបទល្មើសព្រៃឈើយ៉ាងធ្ងន់ធ្ងរគ្មានអ្នកណាហ៊ានរារាំងឡើយ ៕
ចែករំលែកព័តមាននេះ