ខេត្តរតនគិរី ៖ សមត្ថកិច្ចប៉ូលិសការិយាល័យប្រឆាំងការជួញដូរមនុស្ស និងការពារអនីតិជនខេត្តសហការជាមួយប៉ូលិសប៉ុស្តិ៍រដ្ឋបាលសង្កាត់បឹងកន្សែង បានចាប់ខ្លួនស្ត្រីម្នាក់ពីបទនាំក្មេងស្រីអាយុ១៥ឆ្នាំទៅបម្រើផ្លូវភេទដល់ជនបរទេសនៅរាជធានីភ្នំពេញ ។ មន្ត្រីប៉ូលិសឱ្យដឹងថា ស្ត្រីម្នាក់នេះឈ្មោះ សុង ស្រីណា ហៅស្រីម៉ៅ អាយុ២៣ឆ្នាំ មានមុខរបរបោកគក់ខោអាវឱ្យគេតាមផ្ទះ មានទីលំនៅភូមិភ្នំស្វាយ សង្កាត់បឹងកន្សែង ក្រុងបានលុង ។
ស្ត្រីឈ្មោះសុង ស្រីណា ហៅស្រីម៉ៅ ត្រូវបានសមត្ថកិច្ចចាប់ខ្លួននៅថ្ងៃទី២ កញ្ញា វេលាម៉ោង៧ព្រឹក នៅមុខវិទ្យាល័យសម្តេចឪសម្តេចម៉ែ ស្ថិតក្នុងភូមិអូរកន្សែង សង្កាត់បឹងកន្សែង ក្រុងបានលុង ។ ក្រោយពីឃាត់ខ្លួនស្ត្រីរូបនេះសារភាពថា ខ្លួនពិតជាបាននាំក្មេងស្រីឱ្យជនបរទេសនៅភ្នំពេញមែន ដោយសារខ្លួនឯងក៏ធ្លាប់បានបម្រើផ្លូវភេទជាមួយជនបរទេសជាច្រើនដងរួចមកហើយដែរ ។ ចំណែកក្មេងស្រីនោះដោយសារដឹងថាខ្លួនស្គាល់ជនបរទេសក៏បានពឹងឱ្យទាក់ទងទៅជនបរទេសនោះដើម្បីឱ្យនាងបានទៅបម្រើផ្លូវភេទ និងព្រមព្រៀងគ្នាក្នុងតម្លៃ២០០ដុល្លារ ។ ម្យ៉ាងទៀតក្មេងស្រីនេះក៏ធ្លាប់បានលក់ខ្លួនឱ្យជនបរទេសនោះម្តងហើយដែលមានផ្ទះនៅភ្នំពេញតាមដងទន្លេសាប ។
តាមប្រភពព័ត៌មានឱ្យដឹងថា កាលពីថ្ងៃទី២៧ សីហា កន្លងមកស្ត្រីឈ្មោះ សុង ស្រីណា ហៅស្រីម៉ៅ នេះបាននាំក្មេងស្រីខាងលើទៅជួបបុរសជាជនបរទេសនោះនៅភ្នំពេញម្តងហើយ ដោយនៅរង់ចាំជួបអស់រយៈពេល៣ថ្ងៃ តែអាក់ខានអត់បានជួបទេ ដោយសារបុរសបរទេសនោះជាប់រវល់ការងារ ហើយក៏នាំគ្នាត្រឡប់មកខេត្តរតនគិរីវិញ ។ ចំណែកស្ត្រីជាជនសង្ស័យបានឆ្លើយសារភាពប្រាប់សមត្ថកិច្ចថា លុះនៅថ្ងៃទី២ កញ្ញាក៏បានណាត់ជួបគ្នាជាមួយបុរសជាជនបរទេសនោះតាមទូរស័ព្ទនៅភ្នំពេញនៅផ្ទះម្តុំមាត់ទន្លេសាបដដែល តែចេញដំណើរមិនទាន់ផុតពីខេត្តរតនគិរីផងក៏ត្រូវសមត្ថកិច្ចចាប់ឃាត់ខ្លួនតែម្តង។ ស្ត្រីឈ្មោះសុង ស្រីណា ហៅស្រីម៉ៅ ត្រូវបានកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមផ្លូវច្បាប់ ៕
ចែករំលែកព័តមាននេះ