ខេត្តស្ទឹងត្រែង ៖ អគារធនាគារជាតិនៃកម្ពុជា សាខាខេត្តស្ទឹងត្រែង ដែលទើបសាងសង់ថ្មីនៅក្នុងក្រុងស្ទឹងត្រែង ត្រូវបានសម្ពោធដាក់ឱ្យប្រើប្រាស់ជាផ្លូវការនៅថ្ងៃទី៣ កញ្ញា ឆ្នាំ២០១២ ក្រោមអធិបតីភាពលោកជា ចាន់តូ អគ្គទេសាភិបាលធនាគារជាតិនៃកម្ពុជា និងមានការចូលរួមពីលោកប្រធានក្រុមប្រឹក្សាខេត្ត និងលោកអភិបាលខេត្តស្ទឹងត្រែង មន្ត្រីបុគ្គលិកធនាគារជាតិ មន្ត្រីរាជការមកពីមន្ទីរនានាជុំវិញខេត្ត និងអាជីវករប្តូរប្រាក់ប្រមាណ២០០នាក់ ។
ការជួសជុល និងស្ថាបនាអគារថ្មីនេះបានទទួលការគាំទ្រពីគណៈអភិបាលខេត្តស្ទឹងត្រែង ដោយលោកឡូយ សុផាត មានប្រសាសន៍ថា សមិទ្ធផលនេះពិតជាបានបង្ហាញពីការរួមចំណែកអភិវឌ្ឍហេដ្ឋារចនាសម្ព័ន្ធជារូបវ័ន្តរបស់ខេត្តផង ចូលរួមប្រឡងប្រណាំងទីក្រុងស្អាតទាំងផ្នែកទេសចរណ៍ សេដ្ឋកិច្ច ធនាគារ ហិរញ្ញវត្ថុ និងជំរុញឱ្យវិស័យផ្សេងទៀតបន្តអភិវឌ្ឍផ្នែកផ្សេងៗផងដែរ ។
សូមបញ្ជាក់ថា ក្រោយថ្ងៃ៧មករា ឆ្នាំ១៩៧៩ អតីតធនាគារជាតិនៃប្រជាជនកម្ពុជាខេត្តស្ទឹងត្រែង បានផ្លាស់ប្តូរទីតាំង និងវិវត្តន៍អគារជាបន្តបន្ទាប់ រហូតដល់មានការរុះរើសាងសង់ជាថ្មីនៅខែមករា ឆ្នាំ២០១១ និងបញ្ចប់ការសាងសង់ជាស្ថាពរនៅខែធ្នូ ឆ្នាំ២០១១ កន្លងទៅនេះ ។
លោកជា ចាន់តូ បានលើកឡើងថា ការកែលម្អសាខាធនាគារជាតិនៃកម្ពុជា គឺឆ្លើយតបទៅនឹងកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាលដំណាក់កាលទី២ ដែលក្នុងកំណែទម្រង់នេះរាជរដ្ឋាភិបាលត្រូវឱ្យគណនីរបស់ស្ថាប័នរាជរដ្ឋាភិបាលទាំងអស់ដែលបានបើកនៅធនាគារពាណិជ្ជ ត្រូវផ្ទេរមកបើក និងធ្វើប្រតិបត្តិការតាមរយៈធនាគារជាតិវិញ ដោយប្រើប្រាស់ប្រព័ន្ធធនាគារសម្រាប់បើកប្រាក់បៀវត្សជូនមន្ត្រីរាជការស៊ីវិល និងកម្លាំងប្រដាប់អាវុធទូទាំងប្រទេស និងទទួលការបង់ចំណូលប្រាក់ពន្ធគ្រប់ប្រភេទ ។
លោកទេសាភិបាលបន្តថា មូលហេតុនេះទើបធនាគារជាតិនៃកម្ពុជា បានប្រកាសបើកសាខារបស់ខ្លួននៅទូទាំងប្រទេសដើម្បីបំពេញសេចក្តីត្រូវការចាំបាច់របស់រាជរដ្ឋាភិបាល និងការវិវត្តរីកចម្រើននៃសេដ្ឋកិច្ចទីផ្សាររបស់យើងនាពេលបច្ចុប្បន្ន ដោយលោកជា ចាន់តូ បញ្ជាក់ថា គោលបំណងនៃការកែលម្អទីស្នាក់ការថ្មីនេះគឺដើម្បី ៖
ទី១-ពង្រឹងជំនឿទុកចិត្តពីសាធារណជនមកលើប្រព័ន្ធធនាគារ
ទី២-គាំទ្រការអនុវត្តកំណែទម្រង់ការគ្រប់គ្រងហិរញ្ញវត្ថុសាធារណៈ
ទី៣-ចូលរួមចលនាប្រឡងប្រណាំងទីក្រុងស្អាត និងអភិវឌ្ឍន៍តំបន់ទេសចរណ៍យូរអង្វែង និងជាពិសេស
ទី៤-គឺអនុវត្តមុខងារ និងភារកិច្ចជាអាជ្ញាធររូបិយវត្ថុផង ជាធនាគារិករបស់ធនាគារផង និងជាអាជ្ញាធរអាណាព្យាបាលលើប្រព័ន្ធធនាគារ និងហិរញ្ញវត្ថុទាំងមូលផងដែរ ៕
ចែករំលែកព័តមាននេះ