ខេត្តបន្ទាយមានជ័យ ៖ សិប្បកម្មកែច្នៃថ្មភ្នំនៅក្នុងស្រុកព្រះនេត្រព្រះ នាពេលបច្ចុប្បន្ននេះមានមិនតិចជាង១០កន្លែងទេ ក្នុងនោះ២កន្លែងជាសិប្បកម្មធំជាងគេដែលនាំចេញទៅលក់ទាំងក្នុងស្រុកនិងក្រៅប្រទេស ។ លោកលី ប៊ុនរិទ្ធ អភិបាលស្រុកព្រះនេត្រព្រះមានប្រសាសន៍ថា សិប្បកម្មកែច្នៃថ្មភ្នំនៅស្រុកព្រះនេត្រព្រះនេះ កាលពីមុនគេកែច្នៃដោយដៃ ដែលចេះតៗគ្នាពីដូនតា តែនៅសម័យនេះការកែច្នៃធ្វើឡើងដោយប្រើម៉ាស៊ីនមានរហូតដល់៧០ភាគរយ ។
សិប្បកម្មភាគច្រើនត្រូវបានក្រសួងវប្បធម៌និងវិចិត្រសិល្បៈនិងអង្គការជាដៃគូបង្រៀនបន្ថែមពីបញ្ហារចនាក្បាច់ម៉ូដដែលជារចនាបថខែ្មរបុរាណ ។អ្នកស្រី រៀម កញ្ញា ម្ចាស់សិប្បកម្មកែច្នៃធំមួយនៅស្រុកព្រះនេត្រព្រះនិយាយថា ការកែច្នៃមានច្រើនប្រភេទដូចជារូបចម្លាក់ និងការកែច្នៃធ្វើជាគ្រឿងសង្ហារិមជាដើម ហើយសិប្បកម្មកែច្នៃទាំងនេះគឺគេយកថ្មភ្នំព្រះនេត្រព្រះ មកធ្វើព្រោះមានគុណភាពល្អ ។ សិប្បកម្មកែច្នៃរបស់អ្នកស្រីបានបើកដំណើរការនៅអំឡុងឆ្នាំ២០០៣ហើយបច្ចុប្បន្នមានមេជាងនិងកម្មករមិនតិចជាង៥០នាក់ឡើយ ។ ចំពោះេមជាងក្នុងម្នាក់ទទួលប្រាក់ខែជាង២០០ដុល្លារ និងកម្មករ១ខែជាង១០០ដុល្លារ ៕
ចែករំលែកព័តមាននេះ