ខេត្តកណ្តាល ៖ ព្រឹកថ្ងៃទី២ កញ្ញា លោកវេជ្ជបណ្ឌិតសុះ មុះសិន រដ្ឋលេខាធិការក្រសួងធម្មការ និងសាសនា ប្រធានសមាគមគ្រូពេទ្យអ៊ិស្លាមកម្ពុជា អនុប្រធានអង្គការមូលនិធិអភិវឌ្ឍន៍មូស្លីមកម្ពុជា និងលោកមហាំម៉ាត់ សលតន តំណាងសមាគមសម្របសម្រួលសង្គមរដ្ឋកូវ៉ែត និងជាទីប្រឹក្សាសមាគមសប្បុរសធម៌ដើម្បីអភិវឌ្ឍកម្ពុជាបានដឹកនាំក្រុមគ្រូពេទ្យស្ម័គ្រចិត្តយកថ្នាំពេទ្យចុះ
ខេត្តកណ្តាល ៖ ព្រឹកថ្ងៃទី២ កញ្ញា លោកវេជ្ជបណ្ឌិតសុះ មុះសិន រដ្ឋលេខាធិការក្រសួងធម្មការ និងសាសនា ប្រធានសមាគមគ្រូពេទ្យអ៊ិស្លាមកម្ពុជា អនុប្រធានអង្គការមូលនិធិអភិវឌ្ឍន៍មូស្លីមកម្ពុជា និងលោកមហាំម៉ាត់ សលតន តំណាងសមាគមសម្របសម្រួលសង្គមរដ្ឋកូវ៉ែត និងជាទីប្រឹក្សាសមាគមសប្បុរសធម៌ដើម្បីអភិវឌ្ឍកម្ពុជាបានដឹកនាំក្រុមគ្រូពេទ្យស្ម័គ្រចិត្តយកថ្នាំពេទ្យចុះទៅជួយពិនិត្យ និងព្យាបាលជំងឺជូនប្រជាជន និងធ្វើអនាម័យដល់កុមារក្រោមអាយុ១៣ឆ្នាំ នៅឃុំកំពង់ហ្លួង ស្រុកពញាឮ ខេត្តកណ្តាល ជាការផ្តល់សេវាលើកកំពស់សុខភាពសហគមន៍ក្រីក្រ ។
ក្នុងឱកាសនោះ ក៏មានការអញ្ជើញចូលរួមពីសំណាក់លោកវេជ្ជបណ្ឌិតសាន់ សាប់អ៊ី អនុរដ្ឋលេខាធិការក្រសួងសុខាភិបាល និងអគ្គលេខាសមាគមគ្រូពេទ្យអ៊ិស្លាមកម្ពុជា លោកអភិបាលស្រុកពញាឮ លោកស្រីមេឃុំ មេភូមិ ក្រុមការងារ ព្រមទាំងក្រុមគ្រូពេទ្យ អ្នកស្ម័គ្រចិត្ត និងប្រជាពលរដ្ឋយ៉ាងច្រើនកុះករ ។
មុនដំណើរការពិនិត្យជំងឺ លោកវេជ្ជបណ្ឌិតសុះ មុះសិន បានលើកឡើងថា រាជរដ្ឋាភិបាលកម្ពុជាដែលដឹកនាំដោយសម្តេចអគ្គមហាសេនាបតីតេជោហ៊ុន សែន បានផ្តល់អទិភាពដល់ក្រសួងសុខាភិបាលក្នុងការយកចិត្តទុកដាក់ចំពោះសុខុមាលភាពរបស់ប្រជាពលរដ្ឋទូទៅ ពិសេសប្រជាជន និងកុមារនៅតាមជនបទ ។ លោកវេជ្ជបណ្ឌិតបន្តថា ថ្នាំពេទ្យជាអាវុធមុខពីរ ដែលអាចបណ្តាលឱ្យមានគ្រោះថ្នាក់បាន បើសិនបងប្អូនប្រើខុសទិសដៅ ឬ ខុសពីវេជ្ជបញ្ជារបស់គ្រូពេទ្យ ។
នេះជារដូវវស្សាសម្បូរមូសខ្លា ដូច្នេះសូមបងប្អូនលុបកប់ភក់ជ្រាំនៅជុំវិញផ្ទះ ជីកកប់របស់ដែលអាចដក់ទឹកបានពីព្រោះវាជាជម្រក និងជាកន្លែងបង្កកំណើតរបស់មូសខ្លា ត្រូវឱ្យកូនតូចស្លៀកពាក់ខោអាវវែងៗ ការពារកុំឱ្យមូសខ្លាខាំពីព្រោះវាជាភ្នាក់ងារចម្លងជំងឺគ្រុនឈាម ។ក្នុងនាមថ្នាក់ដឹកនាំអ៊ិស្លាមកម្ពុជា លោកវេជ្ជបណ្ឌិតសុះ មុះសិន ក៏បានណែនាំដល់បងប្អូនខ្មែរអ៊ិស្លាម ត្រូវប្រុងប្រយ័ត្នក្នុងការទៅប្រទេសថៃ បើមិនចាំបាច់មិនគួរធ្វើដំណើរទៅទេ បើទៅត្រូវមានលិខិតស្នាមត្រឹមត្រូវចៀសវាងការចោទប្រកាន់របស់កងកម្លាំងប្រដាប់អាវុធថៃមកលើបងប្អូន ។ លោកវេជ្ជបណ្ឌិត និងគណៈអធិបតី បានចែកសៀវភៅស្តីពីគ្រោះថ្នាក់ នៃការជក់បារីចំនួន ៣២០ក្បាលសៀវភៅអប់រំអនាម័យស្ត្រីចំនួន ៣២០ក្បាល និងសៀវភៅអប់រំកុមារឱ្យធ្វើអំពើល្អចំពោះឪពុកម្តាយចំនួន ១០០ក្បាល ជូនដល់ប្រជាពលរដ្ឋ និងកុមារដែលបានមកពិនិត្យជំងឺនាពេលនោះ ។
លោកវេជ្ជបណ្ឌិតសាន់ សាប់អុី អនុរដ្ឋលេខាធិការក្រសួងសុខាភិបាល និងជាអគ្គលេខាធិការសមាគមគ្រូពេទ្យអ៊ិស្លាមកម្ពុជា បានឱ្យដឹងថា ជំងឺត្រូវពិនិត្យនាពេលនោះមាន ជំងឺក្រពះ ពោះវៀន ឈឺសន្លាក់ឆ្អឹង គ្រុនក្តៅ សើស្បែក រោគស្ត្រី ទឹកនោមផ្អែម សម្ពាធឈាមឡើងខ្ពស់ ជំងឺភ្នែក មាត់ធ្មេញ ។ល។ ឯកុមារមានជំងឺ គ្រុនក្តៅ សត្វល្អិត រាគ សើស្បែក ខ្វះអាហាររូបត្ថម្ភ ។ លោកវេជ្ជបណ្ឌិត បានបន្តថា ការពិនិត្យជំងឺថ្ងៃនេះ ក្រុមគ្រូពេទ្យស្ម័គ្រចិត្តពិនិត្យជំងឺទូទៅបានចំនួន ២០០នាក់ រោគស្ត្រីចំនួន ១០០នាក់ ភ្នែកចំនួន ១០០នាក់ មាត់ធ្មេញ ១០០នាក់ ជំងឺកុមារចំនួន ១០០នាក់ និងធ្វើអនាម័យកុមារចំនួន ១៣០នាក់ ។
លោកវេជ្ជបណ្ឌិតសាន់ សាប់អុីបានបញ្ជាក់ថា កម្មវិធីនេះបានរៀបចំដោយសមាគមសម្របសម្រួលសង្គមរដ្ឋកូវ៉ែត និងសមាគមសប្បុរសធម៌ដើម្បីអភិវឌ្ឍកម្ពុជា សហការជាមួយសមាគមអ៊ិស្លាមកម្ពុជា ។ តាមរយៈគម្រោងនេះក្រុមគ្រូពេទ្យស្ម័គ្រចិត្ត និងបន្តចុះពិនិត្យព្យាបាល និងចែកថ្នាំជាបន្តបន្ទាប់ទៀតនៅខេត្តកំពង់ចាម ខេត្តពោធិ៍សាត់ និងរាជធានីភ្នំពេញនៅក្នុងខែកញ្ញានេះ ៕
ចែករំលែកព័តមាននេះ