ខេត្តតាកែវ ៖ នារីម្នាក់បានរងរបួសធ្ងន់ហើយត្រូវបានប៉ូលិសបញ្ជូនទៅសង្គ្រោះនៅ មន្ទីរពេទ្យបង្អែកខេត្តដោយសារគ្រោះថ្នាក់ចរាចរណ៍កើតឡើងរវាងរថយន្តរបស់មន្ត្រីបេ៉អឹមម្នាក់បើកចេញពីហាងមួយកន្លែងបោះពួយពីលិចទៅកើត ពេលមកដល់ចំណុចផ្លូវបំបែកជាបួនក៏បុកគ្នាជាមួយម៉ូតូនារីសិស្សសាលាម្នាក់កំពុងបើកឆ្លងថ្នល់ពីជើងទៅត្បូងបណ្តាលឱ្យម៉ូតូវៀចកង់មុខឯមនុស្សរងរបួសធ្ងន់រួចរថយន្តបើកគេចបាត់ស្រមោល ។ ហេតុការណ៍នេះបានកើតឡើងកាលពីវេលាម៉ោង១និង១០នាទីរសៀលថ្ងៃទី២ កញ្ញា ស្ថិតក្នុងភូមិ២ សង្កាត់រកាក្នុង ក្រុុងជូនកែវ ។
លោក ឥន មណ្ឌល អធិការរងនគរបាលក្រុងជូនកែវ បានឱ្យដឹងថា នារីរងគ្រោះឈ្មោះមាស ស្រីអូន អាយុ២២ឆ្នាំ រស់នៅក្នុងឃុំ៨មុំ ស្រុកទ្រាំង រងរបួសបាក់ឆ្អឹងដងកាំបិតខាងស្តាំកំពុងសម្រាកព្យាបាលនៅមន្ទីរពេទ្យបង្អែកខេត្ត ឯម៉ូតូម៉ាកសេ១២៥ សេ៊រី២០០៥ ពណ៌ខ្មៅ ខូចខ្នងមុខ ចំណែករថយន្តម៉ាកឡិចស៊ីស RX300 ពណ៌ខ្មៅ បើកចេញពីហាងផឹកស៊ីហើយក្រោយពីបុកគ្នាជាមួយម៉ូតូខាងលើ ក៏បើកគេចបាត់ស្រមោល ។ លោកអធិការរងបានបន្តថា មុនពេលកើតេហតុ នារីរងគ្រោះបានជិះម៉ូតូម្នាក់ឯងធ្វើដំណើរពីជើងទៅត្បូង លុះមកដល់ផ្លូវបំបែកជាបួនមានរថយន្តឡិចស៊ីស មួយគ្រឿង បើកពីកើតទៅលិច ចេញពីហាងស៊ីផឹកបុកគ្នាជាមួយម៉ូតូត្រូវកង់មុខធ្វើឱ្យនារីរងគ្រោះដួលសន្លប់បាត់ស្មារតី ហើយរថយន្តបានបន្ថែមល្បឿនបើកគេចបាត់ស្រមោលតែម្តង។
សាក្សីនៅកន្លែងកើតេហតុបាននិយាយថា រថយន្តឡិចស៊ីសខាងលើជារបស់លោកមេបញ្ជាការកងរាជអាវុធហត្ថស្រុកគិរីវង់ បើកចេញពីហាងមួយ ។ សាក្សីបានរិះគន់ថា មិនគួរណាលោកមិនទទួលខុសត្រូវ បែរជាបន្ថែមល្បឿនបើករថយន្តគេចបាត់បែបនេះសោះ ។លោក ស៊ុយ ផល្លី មេបញ្ជាការកងរាជអាវុធហត្ថស្រុកគិរីវង់ និងជាម្ចាស់រថយន្តខាងលើ បានប្រាប់តាមទូរស័ព្ទឱ្យដឹងថា រូបលោកអត់ខុសទេ ម៉ូតូជាអ្នកបើកបុករថយន្តរបស់គាត់ ដូច្នេះម្ចាស់ម៉ូតូទេ ត្រូវសងថ្លៃខូចខាតរថយន្តរបស់គាត់ ព្រោះធ្វើអស់លុយច្រើន រឿងដែលឱ្យលោកទទួលខុសត្រូវនោះមិនអាចទៅរួចឡើយ ៕
ចែករំលែកព័តមាននេះ