ខេត្តឧត្តរមានជ័យ ៖ បុរសម្នាក់ឈ្មោះ អ៊ុំ ពិសិដ្ឋ ហៅវី អាយុ៣២ឆ្នាំ មានស្រុកកំណើតនៅភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្តាល បច្ចុប្បន្នស្នាក់នៅភូមិថ្នល់កែង ឃុំត្រពាំងប្រាសាទ ស្រុកត្រពាំងប្រាសាទ ធ្វើជាកម្មករនៅក្រុមហ៊ុនតៃ និញ សៀមរាបចម្ការកៅស៊ូបានជាប់ចោទពីបទលួចគាស់បង្អួចលួចកាំភ្លើងម៉ាកអាកាបត់ចំនួនមួយដើម និងគ្រាប់ចំនួន៩០គ្រាប់ពីក្នុងបន្ទាយទាហាន កាលពីវេលាម៉ោង១០និង៥៥នាទីព្រឹកថ្ងៃទី ២៨ សីហា កន្លងទៅ ។
លោកវរសេនីយ៍ត្រី លី ដារិទ្ធ មេបញ្ជាការប៉េអឹមស្រុកត្រពាំងប្រាសាទឱ្យដឹងថា បុរសជាប់ចោទរូបនេះមុនពេលធ្វើសកម្មភាពគឺធ្លាប់ទៅហូបបាយ និងដេកលេងនៅក្នុងបន្ទាយទ័ពខាងលើ ព្រោះមានប្អូនថ្លៃម្នាក់បម្រើការនៅទីនោះ ។ មុនពេលឃាត់ខ្លួនបុរសរូបនេះ លោកបានទទួលពាក្យបណ្តឹងពីការបាត់កាំភ្លើងទើបលោកដាក់កម្លាំងចុះទៅធ្វើការស៊ើបអង្កេត និងបានឱ្យក្រុមកម្មករធ្វើការស៊ើបអង្កេតផងដែរ ។ បន្ទាប់មកមានកម្មកររាយការណ៍មកថា ពួកគេបានឃើញឈ្មោះ អ៊ុំ ពិសិដ្ឋ ហៅវី មានកាន់កាំភ្លើងអាកាបត់មួយដើមយកទៅបាញ់ស្វាបានមួយក្បាលរួចក៏បានយកកាំភ្លើងនោះទៅលាក់ ។ បន្ទាប់ពីបានទទួលព័ត៌មាននេះ លោកបានដឹកនាំកម្លាំងចុះទៅទីតាំងក្រុមហ៊ុននោះឃើញឈ្មោះ អ៊ុំ ពិសិដ្ឋ ហៅវី កំពុងមានកម្មវិធីផឹកស៊ីនៅក្នុងក្រុមហ៊ុននោះ ក៏ឃាត់ខ្លួន ចំណែកបក្សពួកម្នាក់ទៀតឈ្មោះ ណាក់ ជាកម្មកររស់នៅជាមួយគ្នាបានរត់គេចខ្លួនចូលទៅក្នុងព្រៃបាត់ស្រមោល ។
លោកមេបញ្ជាការបញ្ជាក់ថា បន្ទាប់ពីឃាត់ខ្លួនបុរសរូបនេះ លោកបាននាំយកមកទីបញ្ជាការកងរាជអាវុធហត្ថស្រុកត្រពាំងប្រាសាទ ដើម្បីសាកសួរចម្លើយ ។ ជនជាប់ចោទបានឆ្លើយសារភាពថា ខ្លួននិងបក្សពួកម្នាក់ពិតជាបានធ្វើសកម្មភាពគាស់បង្អួចលួចយកកាំភ្លើងប្រាកដមែន ។ យោងតាមចម្លើយសារភាពនិងវត្ថុតាងជាក់ស្តែង លោកបានកសាងសំណុំរឿងបញ្ជូនជនត្រូវចោទទៅសាលាដំបូងខេត្តដើម្បីផ្តន្ទាទោសតាមផ្លូវច្បាប់ ៕
ចែករំលែកព័តមាននេះ