រាជធានីភ្នំពេញ ៖ ផ្ទះលក់មាសនិងប្តូរប្រាក់មួយយីហោជាង ខេង នៅទល់មុខផ្សារធំទួលសង្កែហៅផ្សារសាំហាន់ ស្ថិតក្នុងសង្កាត់ទួល សង្កែ ខណ្ឌឫស្សីកែវត្រូវបានចោរ៤នាក់ជិះម៉ូតូឌ្រីមសេ១២៥ ពីរគ្រឿងបានមកឈប់មុខផ្ទះសម្រុកចូលវាយបំបែកទូមាសប្រមូលយកគ្រឿងអលង្ការ និងប្រាក់ទៅអស់ដែលសកម្មភាពនេះត្រូវបានកើតឡើងនៅវេលាម៉ោង៧និង១០នាទីយប់ថ្ងៃទី៣ កញ្ញា តែមួយភ្លេតប៉ុណ្ណោះ ។
តាមប្រភពព័ត៌មាននៅកន្លែងកើតហេតុបានឱ្យដឹងថា ក្រុមចោរទាំងនោះប្រដាប់ដោយកាំភ្លើងខ្លីចំនួន២ដើមផងដែរក្នុងការវាយបំបែកទូកញ្ចក់ ។ អាជីវកររងគ្រោះឈ្មោះ ប៉េង សុខខេង អាយុ៣៨ឆ្នាំ និងប្រពន្ធឈ្មោះ វន ពិសិដ្ឋ អាយុ៤៣ឆ្នាំ មុខរបរលក់គ្រឿងអលង្ការផង និងជាជាងទងផងដែរ ។ ទោះបីជាយ៉ាងណាសកម្មភាពរបស់ក្រុមចោរមិនបានបង្កឱ្យរបួសស្នាមមនុស្សណាម្នាក់ទេ ទោះបីពួកចោរប្លន់ទាំងនេះមានអាវុធក្តីគឺធ្វើសកម្មភាពប្លន់យ៉ាងរហ័សបំផុត ។ មន្ត្រីប៉ូលិសដែលបានទៅដល់កន្លែងកើតហេតុក្រោយពេលពួកចោរចេញផុតនោះមិនទាន់បានសន្និដ្ឋានបែបណាមួយនៅឡើយទេ ទាក់ទិននឹងអំពើប្លន់នេះ ប៉ុន្តែរាល់អំពើប្លន់យ៉ាងរហ័សនេះបង្ហាញថាក្រុមចោរបានរៀបចំគម្រោងការប្លន់ទុកជាមុនរួចទៅហើយ ទើបបានធ្វើសកម្មភាពលឿនហើយគេចខ្លួនរហ័សបែបនេះ ។
នៅកន្លែងកើតហេតុក្រុមចោរបានបន្សល់ទុកកាបូបមួយដែលកាបូបនេះត្រូវបានសន្និដ្ឋានថា ពួកចោរយកមកសម្រាប់ដាក់គ្រឿងអលង្ការនិងប្រាក់ដែលប្លន់បាន តែទំនងជាការប្រមូលអស់ហើយនោះ ក៏ទុកចោលកាបូបមួយនោះនៅមុខផ្ទះអ្នកលក់មាស ។ តាមអាជីវកររងគ្រោះបានឱ្យដឹងថា ពួកចោរមានគ្នា៤នាក់ តែចូលធ្វើសកម្មភាពតែ៣នាក់ទេ គឺម្នាក់កាន់ពូថៅចូលមកវាយទូមាសរបស់គាត់ ម្នាក់កាន់កាំភ្លើងភ្ជង់ និងម្នាក់ជាអ្នកប្រមូល ។ ការប្រមូលយកនោះគឺ យកមិនអស់ទេនៅសល់ចិញ្ចៀនខ្លះជ្រុះរប៉ាត់រប៉ាយជាមួយកម្ទេចកញ្ចក់ ។ ការវាយនោះបានបាក់ដងពូថៅផងដែរ ។
អាជីវកររងគ្រោះនិយាយថា ការបាត់បង់ដោយអំពើប្លន់នេះ អស់ជាង២០ដំឡឹងប្លាទីន គឺជាគ្រឿងអលង្ការមានខ្សែកនិងខ្សែដៃ ។ មន្ត្រីប៉ូលិសនិយាយថា អាជីវកររងគ្រោះនេះ លក់មាសនៅក្នុងផ្ទះ ហើយតំបន់នោះមានស្ថានភាពអ៊ូអ៊រ និងមិននឹកស្មានថា ចោរហ៊ានធ្វើសកម្មភាពប្លន់បែបនេះទេ ។ អាជីវកររងគ្រោះឱ្យដឹងទៀតថា ផ្ទះនេះគាត់ជួលគេរកស៊ីទេ គឺផ្ទះលេខ០៥១G ៕
ចែករំលែកព័តមាននេះ