រាជធានីភ្នំពេញ ៖ ក្រុមហ៊ុនខ្មែរប្រ៊ូវើរីបានរៀបចំឡើងនូវពិធីជប់លៀងគ្រួសាររីករាយមួយជូនដល់សហការី ព្រមទាំងសមាជិកក្រុមគ្រួសារទាំងអស់នៅមជ្ឈមណ្ឌលកម្សាន្តឌ្រីមលែនាថ្ងៃទី១ កញ្ញា ឆ្នាំ២០១២ ។កម្មវិធីជប់លៀងគ្រួសាររីករាយនេះ ត្រូវបានរៀបចំឡើងក្នុងគោលបំណងថ្លែងនូវអំណរគុណ និងលើកទឹកចិត្តដល់សហការីក្រុមហ៊ុនផលិតស្រាបៀរកម្ពុជាទាំងអស់ ដែលបានខិតខំបំពេញការងាររបស់ខ្លួនប្រកបដោយការយកចិត្តទុកដាក់ និងយ៉ាងសកម្មនាពេលកន្លងមក ព្រមទាំងបានសហការគ្នាប្រកបដោយភាពស្មោះត្រង់ ក្នុងការជួយធ្វើឱ្យក្រុមហ៊ុនខ្មែរប្រ៊ូវើរីទទួលបាននូវភាពល្បីល្បាញ រឹងមាំ និងមានការរីកចម្រើនយ៉ាងខ្លាំងក្លានាពេលបច្ចុប្បន្ន និងទៅថ្ងៃអនាគត ។
កម្មវិធីជប់លៀងនាថ្ងៃនេះ ក៏នឹងជួយធ្វើឱ្យសហការី និងសមាជិកក្រុមគ្រួសារស្រាបៀរកម្ពុជាទាំងអស់បានសម្រាក និងកម្សាន្តសប្បាយជាមួយគ្នា ព្រមទាំងរឹតបន្តឹងនូវចំណងសាមគ្គីភាព មិត្តភាព រវាងសមាជិកក្រុមគ្រួសារស្រាបៀរកម្ពុជាទាំងអស់ ដែលនឹងជួយឱ្យការសហការក្នុងការងារទៅថ្ងៃអនាគតកាន់តែមានភាពជិតស្និទ្ធ កាន់តែរលូន និងទទួលបានជោគជ័យច្រើនថែមទៀតសម្រាប់យើងទាំងអស់គ្នា ។
សូមបញ្ជាក់ផងដែរថា ថ្នាក់ដឹកនាំក្រុមហ៊ុនខ្មែរប្រ៊ូវើរី មានចក្ខុវិស័យយូរអង្វែងក្នុងការអភិវឌ្ឍក្រុមហ៊ុនឱ្យក្លាយទៅជាក្រុមហ៊ុនឈានមុខគេនៅក្នុងប្រទេស និងនៅលើឆាកអន្តរជាតិ ព្រមទាំងមានការជឿជាក់យ៉ាងមុតមាំថា សហការីក្រុមហ៊ុនផលិតស្រាបៀរកម្ពុជាទាំងអស់នឹងបន្តខិតខំប្រឹងប្រែង ដើម្បីជួយឱ្យក្រុមហ៊ុនដែលជាទុនរបស់ខ្មែរ១០០ភាគរយអាចសម្រេចបាននូវចក្ខុវិស័យដ៏សំខាន់នេះ ។
ជាងនេះទៀត ក្រុមហ៊ុនមានមោទនភាពយ៉ាងខ្លាំង ដោយសហការីទាំងអស់សុទ្ធសឹងជាបុគ្គលដែលមានសមត្ថភាព និងមានការទទួលខុសត្រូវខ្ពស់ក្នុងការធ្វើឱ្យក្រុមហ៊ុនមានការរីកចម្រើន ព្រមទាំងបានជួយឱ្យសង្គមជាតិរបស់យើងមានការអភិវឌ្ឍផងដែរ ៕
ចែករំលែកព័តមាននេះ