ខេត្តបន្ទាយមានជ័យ ៖ ពិតជាគួរឱ្យខ្លាចមែន ខណៈរថយន្តកាមរីពណ៌ទឹកប៊ិចមួយគ្រឿងដឹកមនុស្សច្រើនហួសកំណត់រហូតជាង១០នាក់ គឺផ្នែកខាងក្នុងញាត់មនុស្សពេញណែន ឯផ្នែកឃ្លុបគូទមានផ្ទុកមនុស្សរហូតដល់ទៅ៤នាក់ទៀតដែលការដឹកបែបនេះប្រឈមនឹងគ្រោះថ្នាក់ណាស់ ហេតុការណ៍នេះកើតឡើងលើដងផ្លូវជាតិលេខ៥ ពីខេត្តបន្ទាយមានជ័យឆ្ពោះទៅខេត្តបាត់ដំបង កាលពីថ្ងៃទី១ កញ្ញា ។
តាមប្រភពព័ត៌មានឱ្យដឹងថា មុនចេញដំណើររថយន្តមួួយគ្រឿងនេះបានញាត់មនុស្សផ្នែកខាងមុខសរុប៤នាក់ទាំងអ្នកបើកបរ ចំណែកផ្នែកខាងក្រោយអ្នកដំណើរជិះប្រជ្រៀតគ្នាធ្វើដូចខ្វះរថយន្តជិះណាស់អីុចឹង មិនតែប៉ុណ្ណោះ ឃ្លុបគូថរថយន្តក៏ត្រូវផ្ទុកមនុស្ស៤នាក់ផ្សេងទៀតដែលអ្នកជិះខាងក្រោយនោះមើលទៅដូចជាវេទនាភ្នែកយ៉ាងខ្លាំងព្រោះជិះត្បុលក្បាលឈ្ងោកមុខមកក្រោមលើកដៃទ្រដំបូលឃ្លុបគូទរថយន្តមានសភាពដូចជាស្វាទុំមែកឈើអីុចឹង ។
គេសម្គាល់ឃើញថា តាមដងផ្លូវជាតិលេខ៥បច្ចុប្បន្នមិនថារថយន្តមួយគ្រឿងខាងលើនេះទេ សូម្បីតែរថយន្តផ្សេងទៀតក៏ដូចគ្នាដែរ ភាគច្រើនគេឃើញផ្ទុកមនុស្សផ្នែកខាងក្នុងប្រជ្រៀតគ្នា ដោយកៅអីផ្នែកខាងមុខគេផ្ទុក៣ទៅ៤នាក់ដែលបញ្ហានេះធ្វើឱ្យមជ្ឈដ្ឋាននានាជាច្រើនរិះគន់ទៅលើសមត្ថកិច្ចដែលធ្វើការតាមដងផ្លូវជាតិមួយខ្សែនេះឆ្លងកាត់ពីខេត្តមួយទៅខេត្តមួយមិនយកចិត្តទុកដាក់ ឬទប់ស្កាត់បញ្ហានេះពិសេសប៉ូលិសចរាចរសណ្តាប់ធ្នាប់សាធារណៈតាមខេត្ត ។
ផ្អែកលើការរិះគន់ពីសំណាក់មជ្ឈដ្ឋាននានានេះសង្ឃឹមថា សមត្ថកិច្ចជំនាញនឹងចាត់វិធានការទប់ស្កាត់បញ្ហានេះប្រយោជន៍ដើម្បីរួមចំណែកពង្រឹងច្បាប់ចរាចរណ៍ផ្លូវគោកពិសេសកាត់បន្ថយការគ្រោះថ្នាក់ចរាចរណ៍តាមដងផ្លូវជាតិដែលកើតមានជាយថាហេតុ ៕
ចែករំលែកព័តមាននេះ