ខេត្តបាត់ដំបង ៖ ស្ត្រី២នាក់ត្រូវសមត្ថកិច្ចស្រុកកំរៀងចាប់ខ្លួនជាមួយនឹងថ្នាំញៀនជាង១៤០គ្រាប់ សម្រាប់ចែកចាយបន្តទៅឱ្យអ្នកប្រើប្រាស់ បានកាលពីរសៀលថ្ងៃទី៣១ សីហា ២០១២ នៅចំណុចភូមិអូរអន្លក់ ឃុំតាសែន ស្រុកកំរៀង ក្នុងគ្រាដែលកំពុងប្រព្រឹត្តបទល្មើសជាក់ស្តែង ។
ខេត្តបាត់ដំបង ៖ ស្ត្រី២នាក់ត្រូវសមត្ថកិច្ចស្រុកកំរៀងចាប់ខ្លួនជាមួយនឹងថ្នាំញៀនជាង១៤០គ្រាប់ សម្រាប់ចែកចាយបន្តទៅឱ្យអ្នកប្រើប្រាស់ បានកាលពីរសៀលថ្ងៃទី៣១ សីហា ២០១២ នៅចំណុចភូមិអូរអន្លក់ ឃុំតាសែន ស្រុកកំរៀង ក្នុងគ្រាដែលកំពុងប្រព្រឹត្តបទល្មើសជាក់ស្តែង ។
លោកឈឹម គឹមហុង អធិការនគរបាលស្រុកកំរៀង ឱ្យដឹងថា ស្ត្រី២នាក់ដែលចាប់ខ្លួននោះ ១-ឈ្មោះវែង សល់ អាយុ៣០ឆ្នាំ និង២-ឈ្មោះស៊ុយ ស៊ីណែត អាយុ៣៥ឆ្នាំ ពួកគេរស់នៅភូមិ-ឃុំខាងលើ ។ លោកគឹមហុង បន្តថា ជនសង្ស័យទាំង២នាក់ត្រូវចាប់ខ្លួនក្នុងបទល្មើសជាក់ស្តែង ពេលពួកគេកំពុងដោះដូរគ្រឿងញៀន ។ លោកបញ្ជាក់ថា ជនសង្ស័យត្រូវកម្លាំងរបស់លោកតាមដានសកម្មភាពពួកគេមួយរយៈកន្លងមកនេះ ក្រោយពីកំណត់បាននូវមុខសញ្ញា លោកស្នងការខេត្តក៏បានបញ្ជាភ្លាមៗឱ្យកម្លាំងរបស់លោកចាត់វិធានការតែម្តង ។ លោកអធិការថា ឈ្មោះវែង សល់ ត្រូវបានចាប់ខ្លួនដំបូងក្រោយមកទើបតាមចាប់ឈ្មោះស៊ុយ ស៊ីណែត បានម្នាក់ទៀតដែលជាគូកនរកស៊ីបទល្មើសនេះ និងរឹបអូសបានថ្នាំញៀនប្រភេទមេតំហ្វេតាមីនចំនួន១៤២គ្រាប់ពីពួកគេ ។
ស្ត្រីឈ្មោះវែង សល់ បានសារភាពថា ក្រៅពីរកស៊ីលក់ដូរថ្នាំញៀនខ្លួនក៏ជាអ្នកប្រើប្រាស់ថ្នាំញៀននេះដែរ ។ ស្ត្រីរូបនេះថា ខ្លួនបានទិញថ្នាំញៀននេះពីឈ្មោះស៊ុយ ស៊ីណែត ដើម្បីយកមកចែកចាយបន្ត និងប្រើប្រាស់ខ្លួនឯងតែថា ខ្លួនទើបបែកគំនិតលក់ដូរក្នុងរយៈពេលថ្មីៗនេះទេ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ