រាជធានីភ្នំពេញ ៖ លំនៅឋានប្រជាពលរដ្ឋដែលសង់ជាប់ៗគ្នានៅមាត់ច្រាំងតាមដងទន្លេសាប ខាងក្រោយឆៀងខាងជើងស្ថានីយទូរទស្សន៍ស៊ីធីអិន ស្ថិតនៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ ត្រូវភ្លើងឆាបឆេះយ៉ាងសន្ធោសន្ធៅកាលពីវេលាម៉ោង១១និង៣០នាទីព្រឹកថ្ងៃទី៣១ សីហា បណ្តាលឱ្យលំនៅឋានចំនួន៣០ខ្នងក្លាយជាចំណីព្រះអគ្គីទាំងស្រុង ។
រាជធានីភ្នំពេញ ៖ លំនៅឋានប្រជាពលរដ្ឋដែលសង់ជាប់ៗគ្នានៅមាត់ច្រាំងតាមដងទន្លេសាប ខាងក្រោយឆៀងខាងជើងស្ថានីយទូរទស្សន៍ស៊ីធីអិន ស្ថិតនៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ ត្រូវភ្លើងឆាបឆេះយ៉ាងសន្ធោសន្ធៅកាលពីវេលាម៉ោង១១និង៣០នាទីព្រឹកថ្ងៃទី៣១ សីហា បណ្តាលឱ្យលំនៅឋានចំនួន៣០ខ្នងក្លាយជាចំណីព្រះអគ្គីទាំងស្រុង ។
ទាក់ទិនការកើតមានអគ្គិភ័យនេះ គេពុំដឹងពីមូលហេតុពិតនៅឡើយទេ ។ ប៉ូលិសមូលដ្ឋានឱ្យដឹងថា បណ្តាលមកពីទុស្សេចរន្តអគ្គិសនីដែលឆេះចេញពីផ្ទះជួលលក់គ្រឿងទេស ហើយឆេះរាលដាលទៅលំនៅឋានផ្សេងទៀត ដែលធ្វើពីឈើប្រក់សង្ក័សីសង់ជាប់ៗគ្នានៅតាមមាត់ទន្លេដែលការឆាបឆេះនេះមានរយៈពេលជិត១ម៉ោង ។ បន្ទាប់ពីមានការឆេះ គេឃើញរថយន្តពន្លត់អគ្គិភ័យជាច្រើនគ្រឿងបានចេញទៅអន្តរាគមន៍ជួយពន្លត់បានជួបឧបសគ្គជាខ្លាំង ដោយសារផ្លូវតូចចង្អៀតរថយន្តចេញចូលមិនអាចបត់ត្រឡប់ក្រោយបាន ។ ទោះបីជាយ៉ាណា ដោយមានការខិតខំ និងមានកប៉ាល់ពន្លត់អគ្គិភ័យចំនួន៣គ្រឿងចូលរួមផងដែរ ទើបអន្តរាគមន៍ពន្លត់បានទាន់ពេល ។
នៅក្នុងហេតុការណ៍នេះ គេឃើញលោកឧត្តមសេនីយ៍ត្រីទូច ណារ៉ុថ ស្នងការនគរបាលរាជធានីភ្នំពេញនិងលោកឃ្លាំង ហួត អភិបាលខណ្ឌឫស្សីកែវ ព្រមទាំងសមត្ថកិច្ច និងអាជ្ញាធរមូលដ្ឋានបានចុះទៅជួយអន្តរាគមន៍ផ្ទាល់នៅកន្លែងកើតហេតុ ។
លោកឧត្តមសេនីយ៍ត្រីទូច ណារ៉ុថ ស្នងការនគរបាលរាជធានីភ្នំពេញ បានឱ្យដឹងថា អគ្គិភ័យត្រូវបានកម្លាំងសមត្ថកិច្ចទប់ស្កាត់បានទាន់ពេលទោះបីមិនអាចទប់ស្កាត់បានទាំងស្រុងក៏ដោយ ។ តាមការវាយតម្លៃការកើតមានអគ្គិភ័យនេះអាចបណ្តាលមកពីការសែន ព្រោះថ្ងៃនេះជាថ្ងៃសែនក្បាលទឹក ដែលបងប្អូនដុតទៀនធូបខ្វះការប្រុងប្រយ័ត្ន ។ នៅពេលកើតមានអគ្គិភ័យ រថយន្តពន្លត់អគ្គិភ័យមានការលំបាកក្នុងការចូលទៅអន្តរាគមន៍ តែយើងអាចទប់ស្កាត់បានដែលនេះជាមោទនភាពណាស់ ។
លោកស្នងការក៏បានសំណូមពរដល់បងប្អូនប្រជាពលរដ្ឋឱ្យមានការប្រុងប្រយ័ត្នចំពោះខ្សែភ្លើង ដែលតរញ៉េររញ៉ៃគ្មានបច្ចេកទេស និងនៅពេលដុតធូបសែនផ្សេងៗ ។ ជុំវិញការកើតមានអគ្គិភ័យនេះ ពុំបណ្តាលឱ្យមនុស្សរងគ្រោះថ្នាក់ដល់អាយុជីវិតឡើយ គឺមានតែដួលសន្លប់ដោយរន្ធត់ និងរងរបួសស្រាលប៉ុណ្ណោះ ។
លោកឃ្លាំង ហួត អភិបាលខណ្ឌឫស្សីកែវ ឱ្យដឹងថា អគ្គិភ័យនេះបានកើតមាននៅតាមមាត់ច្រាំងទន្លេ ដែលជាទីប្រជុំជនប្រជាពលរដ្ឋរស់នៅយ៉ាងកុះករ រហូតដល់ក្រោយស្ថានីយទូរទស្សន៍ស៊ីធីអិន ។ លោកនិយាយថា នេះចាត់ទុកជាសំណាងហើយ ដែលយើងអាចគ្រប់គ្រងបាន ដែលការខូចខាតមានតិចជាងការរំពឹងទុក ។
លោកកូប ស្លេះ អភិបាលរងខណ្ឌឫស្សីកែវ ឱ្យដឹងថា លំនៅឋានចំនួន៣០ខ្នងធ្វើអំពីឈើប្រក់សង្ក័សី ត្រូវឆេះទាំងស្រុង ដែលការឆាបឆេះនេះ ចេញពីផ្ទះលក់គ្រឿងទេស ។ នៅពេលកើតមានអគ្គិភ័យនេះ ម្ចាស់ផ្ទះបានស្រែកហៅគេឱ្យជួយដែរ តែត្រូវភ្លើងឆាបឆេះរហ័សពេក ហើយឆេះរាលដាលយ៉ាងសន្ធោសន្ធៅតែម្តង ។
លោកវរសេនីយ៍ទោ នេត វត្ថា ប្រធានការិយាល័យពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញ បានឱ្យដឹងថា រថយន្តពន្លត់អគ្គិភ័យចេញអន្តរាគមន៍ចំនួន២៤គ្រឿង និងមានកប៉ាល់ចំនួន៣គ្រឿងមកជួយពន្លត់បានទាន់ពេល ដែលក្នុងនោះមានរថយន្តរបស់ស្នងការដ្ឋានចំនួន១៦គ្រឿង មកពីអង្គភាពប្រឆាំងភេរវកម្មចំនួន២គ្រឿង,រថយន្តក្រុមហ៊ុនសូគីម៉ិច៣គ្រឿង,កងរាជអាវុធហត្ថចំនួន៣គ្រឿង ព្រមទាំងកប៉ាល់ចំនួន៣គ្រឿង ។
លោកប្រធានការិយាល័យបានឱ្យដឹងថា នៅដើមឆ្នាំ២០១២ នៅក្នុងរាជធានីភ្នំពេញ មានអគ្គិភ័យកើតឡើងចំនួន៥៤ករណីដែលថ្ងៃនេះ
បានកើតឡើងនៅចុងខែចំថ្ងៃសែនក្បាលទឹកតែម្តង ។
ដោយឡែកនៅសង្កាត់ច្បារអំពៅទី១ ខណ្ឌមានជ័យ ក៏មានអគ្គិភ័យកើតឡើងដំណាលគ្នាដែរ តែពុំធ្ងន់ទេបានពន្លត់ទាន់ ដោយសារតែការអុជធូបសែនក្បាលទឹក ៕
ចែករំលែកព័តមាននេះ