នៅក្រៅកិច្ចប្រជុំកំពូលលើកទី១៦ នៃចលនាមិនចូលបក្សសម្ព័ន្ធ នារសៀលថ្ងៃទី៣០ សីហា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានជួបពិភាក្សាទ្វេភាគីជាមួយលោកម៉ាមូដ អាម៉ាឌីណេចាដ ប្រធានាធិបតីនៃសាធារណរដ្ឋអ៊ិស្លាមអុឺរ៉ង់ ។
នៅក្រៅកិច្ចប្រជុំកំពូលលើកទី១៦ នៃចលនាមិនចូលបក្សសម្ព័ន្ធ នារសៀលថ្ងៃទី៣០ សីហា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានជួបពិភាក្សាទ្វេភាគីជាមួយលោកម៉ាមូដ អាម៉ាឌីណេចាដ ប្រធានាធិបតីនៃសាធារណរដ្ឋអ៊ិស្លាមអុឺរ៉ង់ ។
ក្នុងជំនួបពិភាក្សាទ្វេភាគីគ្នានេះ លោកប្រធានាធិបតីបានមានប្រសាសន៍សម្តែងនូវការស្វាគមន៍ ជូនចំពោះសម្តេចតេជោនាយករដ្ឋមន្ត្រី ដែលអញ្ជើញមកចូលរួមកិច្ចប្រជុំកំពូលលើកទី១៦ នៃចលនាមិនចូលបក្សសម្ព័ន្ធនៅទីក្រុងតេហេរ៉ង់ នៃសាធារណរដ្ឋអ៊ិស្លាមអុឺរ៉ង់ ។ លោកបន្តថា លោកមានការរីករាយយ៉ាងខ្លាំងដែលបានជួបសន្ទនាដោយផ្ទាល់ជាមួយសម្តេចតេជោ ពិសេសទៅទៀតនោះ វត្តមានរបស់សម្តេចតេជោនឹងរួមចំណែកដល់ជោគជ័យនៃកិច្ចប្រជុំកំពូលលើកទី១៦ ដែលយើងនឹងរួមដៃគ្នាក្នុងការចេញសេចក្តីប្រកាសរួមនៅពេលបញ្ចប់កិច្ចប្រជុំកំពូល ។
ទាក់ទិននឹងប្រសាសន៍លើកឡើងរបស់លោកប្រធានាធិបតី ស្តីពីទំនាក់ទំនងទ្វេភាគីក៏ដូចជានៅក្នុងចលនាមិនចូលបក្សសម្ព័ន្ធ សម្តេចតេជោនាយករដ្ឋមន្ត្រី មានប្រសាសន៍ថា យើងត្រូវរួមគ្នាដើម្បីសម្រេចឱ្យបាននូវសេចក្តីប្រកាសរួមចុងក្រោយរបស់កិច្ចប្រជុំកំពូលលើកទី១៦ដើម្បីបង្ហាញពិភពលោកឱ្យឃើញពីសាមគ្គីភាពរបស់ចលនាមិនចូលបក្សសម្ព័ន្ធ ។ ជាមួយគ្នានេះសម្តេចតេជោក៏សម្តែងនូវការរីករាយដោយបានឃើញមេដឹកនាំពិភពលោកជាច្រើនអញ្ជើញមកចូលរួមក្នុងកិច្ចប្រជុំកំពូលលើកទី១៦ ក្នុងនោះយើងទាំងអស់គ្នាត្រូវតែរកវិធីដើម្បីធ្វើឱ្យទំនាក់ទំនង និងកិច្ចសហប្រតិបតិ្តការរបស់យើងកាន់តែស៊ីជម្រៅថែមទៀត ។ នៅក្នុងជំនួបពិភាក្សានេះដែរ សម្តេចតេជោ បានមានប្រសាសន៍ថ្លែងអំណរគុណប្រទេសអុឺរ៉ង់ដែលបានគាំទ្របេក្ខភាពនៃប្រទេសកម្ពុជា ជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ ។
ឆ្លើយតបនឹងប្រសាសន៍លើកឡើងរបស់សម្តេចតេជោ លោកប្រធានាធិបតីមានប្រសាសន៍ថា រូបលោកផ្ទាល់ក៏ដូចជាប្រទេសអុឺរ៉ង់ ចង់ឃើញប្រទេសកម្ពុជាមានអាសនៈជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខ អង្គការសហប្រជាជាតិ ហើយអុឺរ៉ង់នឹងជួយគាំទ្របេក្ខភាពរបស់ប្រទេសកម្ពុជា ជាសមាជិកមិនអចិន្ត្រៃយ៍ក្រុមប្រឹក្សាសន្តិសុខរបស់អង្គការសហប្រជាជាតិ ។
ទាក់ទិនទៅនឹងទំនាក់ទំនងទ្វេភាគី ភាគីទាំងពីរបានធ្វើការប្តេជ្ញារួមគ្នា ក្នុងការពង្រឹងកិច្ចសហប្រតិបត្តិការលើគ្រប់វិស័យថែមទៀត តាមរយៈការជំរុញឱ្យមានការជួបពិភាក្សាគ្នានៃក្រុមការងាររបស់ប្រទេសទាំងពីរឱ្យបានទៀងទាត់ ដើម្បីជំរុញកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំថែមទៀត ដូចសុភាសិតថា «យើងស្រឡាញ់អ្នក អ្នកក៏ស្រឡាញ់យើង វិញ» ។
ទាក់ទិនទៅនឹងទំនាក់ទំនងទ្វេភាគីនេះដែរ ភាគីទាំងពីរបានជំរុញលើកទឹកចិត្តដល់ក្រសួងថាមពល ប្រេង និង ឧស្ម័ន នៃប្រទេសទាំងពីរ ធ្វើកិច្ចសហប្រតិបត្តិការជាមួយគ្នាឱ្យកាន់តែជិតស្និទ្ធ ដើម្បីឈានទៅសហការលើវិស័យដទៃទៀត ។ដោយឡែកនារសៀលថ្ងៃទី៣០សីហានោះដែរ សម្តេចអគ្គមហាសេនាបតីតេជោ ហ៊ុន សែន ក៏បានជួបពិភាក្សាការងារទ្វេភាគីជាមួយ លោក គីម យ៉ុងណាម ប្រធានគណៈប្រធានសភាប្រជាជនជាន់ខ្ពស់នៃសាធារណរដ្ឋប្រជាមានិតប្រជាធិបតេយ្យកូរ៉េ ។ នៅក្នុងជំនួបពិភាក្សាេនាះ លោកគីម យ៉ុងណាម មានប្រសាសន៍លើកឡើងពីប្រវត្តិនៃទំនាក់ទំនងរវាងប្រទេសទាំងពីរ ដែលបង្កើតឡើងដោយព្រះមហាវីរក្សត្រកម្ពុជា ព្រះករុណាព្រះបាទ សម្តេចព្រះនរោត្តម សីហនុ ជាមួយនឹងលោកសេនាប្រមុខ គីម អ៊ីលស៊ុង និងបន្តរហូតមកដល់លោកសេនាប្រមុខ គីម ជុងអីុល និងមកដល់បច្ចុប្បន្ន ព្រះករុណា សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានបន្តយកចិត្តទុកដាក់ជាមួយនឹងលោកគីម ជុងអ៊ុន ដើម្បីពង្រឹងពង្រីកទំនាក់ទំនងការទូតរវាងប្រទេសទាំងពីរឲ្យកាន់តែរឹងមាំថែមទៀត ។
ជាមួយគ្នានេះ លោកប្រធានក៏បានលើកឡើងដែរថា លោក គីម ជុងអ៊ុន មានបំណងបន្តពង្រឹងទំនាក់ទំនងមិត្តភាពនិងកិច្ចសហប្រតិបត្តិការជាមួយប្រទេសកម្ពុជាលើវិស័យជាច្រើនស្របទៅនឹងនយោបាយរបស់ខ្លួន ដែលមានបំណងក្នុងការពង្រីកទំនាក់ទំនងទៅក្រៅប្រទេស។ លោកក៏បានសម្តែងនូវការវាយតម្លៃខ្ពស់ ចំពោះជោគជ័យដែលប្រទេសកម្ពុជាដឹកនាំកិច្ចប្រជុំរដ្ឋមន្រ្តីការបរទេសអាស៊ានដែលបានបញ្ចប់ទៅកាលពីខែកក្កដា កន្លងទៅ និងមានសង្ឃឹមយ៉ាងមុតមាំថា ក្រោមការដឹកនាំរបស់សម្តេចតេជោនាយករដ្ឋមន្រ្តី កិច្ចប្រជំុកំពូលអាស៊ាននៅពេលខាងមុខ នឹងបញ្ចប់ទៅដោយជោគជ័យបន្ថែមទៀត ។ ទន្ទឹមនឹងនេះ លោកក៏បានសំដែងពីបំណងប្រាថ្នាក្នុងការសម្តេចតេជោនាយករដ្ឋមន្រ្តី ទៅបំពេញទស្សនកិច្ចជាផ្លូវការជាថ្មីម្តងទៀតនៅសាធារណរដ្ឋប្រជាមានិតប្រជាធិបតេយ្យកូរ៉េ ។
ជាការឆ្លើយតប សម្តេចតេជោនាយករដ្ឋមន្រ្តី បានមានប្រសាសន៍ថ្លែងអំណរគុណ លោក គីម ជុងអ៊ុន ដែលបានផ្ញើនូវការនឹករលឹកមករូបសម្តេច ។ សម្តេចតេជោបន្តថា សម្តេចផ្ទាល់និងលោក គីម យ៉ុងណាម ធ្លាប់បានជួបគ្នានៅក្នុងកិច្ចប្រជំុកំពូលនៃចលនាមិនចូលបក្សសម្ព័ន្ធនេះចំនួន៣លើករួចមកហើយ ។ កម្ពុជា និងសាធារណរដ្ឋប្រជាមានិតប្រជាធិបតេយ្យកូរ៉េ គឺជាមិត្តចាស់នឹងគ្នានៅក្នុងចលនាមិនចូលបក្សសម្ព័ន្ធ តាមរយៈនេះយើងត្រូវតែរួបរួមគ្នាក្នុងការពង្រឹងចលនានេះឲ្យកាន់តែសកម្មថែមទៀត ។ ទាក់ទងទៅនឹងទំនាក់ទំនងទ្វេភាគី សម្តេចតេជោបានស្នើឲ្យភាគីទាំងពីរបន្តពង្រីកកិច្ចសហប្រតិបត្តិការដែលបន្សល់ទុកពីថ្នាក់ដឹកនាំជំនាន់មុនឲ្យកាន់តែរឹងមាំថែមទៀត ៕
ចែករំលែកព័តមាននេះ