រាជធានីភ្នំពេញ ៖ កម្មករកម្មការិនីរោងចក្រកាត់ដេរយីហោអូសេអង់ជាង៣ពាន់នាក់បានបន្តធ្វើកូដកម្មមិនព្រមចូលធ្វើការ ព្រោះតែការដោះស្រាយលក្ខខណ្ឌការងារមិនត្រូវរ៉ូវគ្នា ហើយពេលនេះកម្មករជាង២ពាន់នាក់ ក្នុងចំនួនសរុបខាងលើបាននាំគ្នាដើរហែក្បួនចេញពីក្នុងរោងចក្រក្នុងបំណងទៅកាន់ក្រសួងការងារ ប៉ុន្តែត្រូវបានសមត្ថកិច្ចប៉ូលិសធ្វើការរារាំងជាប់នៅមុខអាកាសយានដ្ឋានអន្តរជាតិភ្នំពេញ ចម្ងាយប្រមាណ៣គីឡូម៉ែត្រពីរោងចក្រ ។
ការហែក្បួននេះបានធ្វើឡើងកាលពីវេលាម៉ោង១និង៣០នាទីរសៀលថ្ងៃទី៣០ សីហា ដោយពួកគេបាននាំគ្នាដើរចេញពីរោងចក្រអូសេអង់ ដែលមានទីតាំងស្ថិតនៅក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ។ក្រុមកម្មករបានឱ្យដឹងថា ពួកគេធ្វើកូដកម្មនេះមានរយៈពេល២០ថ្ងៃហើយ បើគិតមកទល់នឹងពេលនេះ ដែលមូលហេតុដំបូងទាមទារឱ្យថៅកែដកប្រធានផ្នែកសង្វាក់ផលិតកម្មនៅក្នុងរោងចក្រឈ្មោះហ្វារ៉ុក ជាជនជាតិបង់ក្លាដែសចេញ ព្រោះជននោះបាននិយាយមើលងាយមើលថោកស្ត្រីខ្មែរទូទៅថា ស្ត្រីខ្មែរចង់យកទៅដេកពេលណាក៏បានឱ្យតែលុយបន្តិចបន្តួច គឺបានហើយ ជាពិេសសមើលងាយកម្មការិនីនៅក្នុងរោងចក្រនោះតែម្តង ។
នៅក្នុងរយៈពេល២០ថ្ងៃដែលពួកគេធ្វើកូដកម្មនោះ ភាគច្រើនធ្វើតែនៅក្នុងរោងចក្រប៉ុណ្ណោះ ហើយការដើរហែក្បួនចេញក្រៅរោងចក្របែបនេះមានចំនួន៣ដងហើយទាំងលើកនេះ ក្នុងបំណងទៅកាន់ក្រសួងការងារ ប៉ុន្តែមិនបានទៅដល់ដូចបំណងឡើយ ដោយសារត្រូវសមត្ថកិច្ចរារាំងរហូត ។ក្រុមកម្មករបានបន្តទៀតថា ក្រោយពេលផ្ទុះកូដកម្មទ្រង់ទ្រាយធំបែបនេះក៏មានការជួបដោះស្រាយគ្នាជាបន្តបន្ទាប់រវាងថៅកែ និងតំណាងកម្មករ ដោយមានការចូលរួមពីសំណាក់គណៈកម្មការចម្រុះរួមមានអាជ្ញាធរ សមត្ថកិច្ចមូលដ្ឋាន និងមន្ត្រីមកពីស្ថាប័ននានាជាច្រើន ដោយពេលនោះកម្មករបានទាមទារនូវលក្ខខណ្ឌការងារ២ចំណុចបន្ថែមពីលើការទាមទារដកឈ្មោះហ្វារ៉ុកនោះទៀត ។
នៅក្នុងការដោះស្រាយនោះ ថៅកែបានយល់ព្រមតាមការទាមទាររបស់ពួកគេទាំងអស់ ហើយនៅថ្ងៃទី២៣ និង២៤ សីហា ពួកគេបានយល់ព្រមចូលធ្វើការវិញ ព្រោះឃើញថៅកែយល់ព្រមអស់ហើយ ។ លុះក្រោយមកទៀតការយល់ព្រមតាមលក្ខខណ្ឌដែលកម្មករទាមទារនោះគឺ ស្ថិតនៅតែលើបបូរមាត់ថៅកែប៉ុណ្ណោះ ផ្ទុយទៅវិញថៅកែនេះមិនបានចុះហត្ថលេខាលើកិច្ចព្រមព្រៀងឡើយ ដែលមានន័យស្មើទៅនឹងការមិនយល់ព្រមដែរ មិនតែប៉ុណ្ណោះថៅកែនេះបានដាក់ពាក្យប្តឹងទៅតុលាការដកតំណាងសហជីពចលនាកម្មករចំនួន៥នាក់ ចេញពីរោងចក្រទៀតផង ។
ក្រុមកម្មករបានបន្តថា លក្ខខណ្ឌការងារដែលពួកគេទាមទារបន្ថែមទៀតនោះ គឺទី១- សុំឱ្យថៅកែគិតដល់អត្ថប្រយោជន៍របស់កម្មករក្នុងការធ្វើកូដកម្មរយៈពេល២០ថ្ងៃកន្លងមកនេះ មិនត្រូវកាត់ប្រាក់ឈ្នួលឡើយ ទី២- សុំឱ្យថៅកែដកពាក្យបណ្តឹងដែលប្តឹងតំណាងសហជីពចលនាកម្មករចេញពីតុលាការ និងទទួលយកពួកគេចូលធ្វើការវិញ ។ ដោយឡែករឿងប្រធានផ្នែកសង្វាក់ផលិតកម្មឈ្មោះហ្វារ៉ុក គឺទុកឱកាសឱ្យសមត្ថកិច្ចចាត់ការតាមផ្លូវច្បាប់ ប្រសិនបើសមត្ថកិច្ចរកឃើញថាជននេះមានទោសកំហុសនោះ ហើយលក្ខខណ្ឌការងារខាងលើថៅកែបានយល់ព្រមតែមាត់ប៉ុណ្ណោះ តែមិនអនុវត្ត ដោយប្រាប់ថាចាំឆ្លងយោបល់ថៅកែធំសិន ។
ក្រុមកម្មករបន្តថា ជាងនេះទៀត ថៅកែបែរជាដាក់លក្ខខណ្ឌតបមកវិញថា បើចង់ឱ្យដកពាក្យប្តឹងតំណាងសហជីពនោះចេញទាល់តែឱ្យគាត់យកឈ្មោះហ្វារ៉ុកនោះចូលធ្វើការវិញដែរ ហើយដោយសារតែមូលហេតុបែបនេះ ទើបពួកគេលែងចូលធ្វើការវិញ រួចនាំគ្នាបន្តធ្វើកូដកម្មទៀត ។ ដោយឡែកកាលពីរសៀលថ្ងៃទី៣០ សីហា នោះ ខណៈពេលហែក្បួនទៅដល់មុខអាកាសយានដ្ឋានអន្តរជាតិភ្នំពេញ ស្ថិតនៅក្នុងភូមិតាងួន សង្កាត់កាកាប ក៏ត្រូវសមត្ថកិច្ចឃាត់និងប្រាប់ថាកុំបន្តដំណើរទៅមុខទៀតអីតុលាការយល់ព្រមហើយ ទើបពេលនោះពួកគេឈប់នៅត្រឹមនោះមិនបន្តដំណើរទៅមុខទៀត ៕
ចែករំលែកព័តមាននេះ