រាជធានីភ្នំពេញ ៖ យុវជន២នាក់បានរងរបួសជាទម្ងន់ ដោយសារត្រូវជនអន្ធពាលព្រួតវាយ និងកាប់ដោយកាំបិតប័ុងតោ ខណៈយុវជនរងគ្រោះរួមជាមួយមិត្តភក្តិសរុបចំនួន៧នាក់(ប្រុស៤នាក់ ស្រី៣នាក់)នាំគ្នាចូលទៅផឹកស៊ី និងរាំកម្សាន្តនៅក្លិបម៉ូណាកូ ដែលស្ថិតនៅតាមបណ្តោយផ្លូវលេខ១៩៨៦ ក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ កាលពីវេលាម៉ោង១២និង៤០នាទី រំលងអធ្រាត្រឈានចូលថ្ងៃទី៣០ សីហា ។ ចំពោះមូលហេតុដែលក្រុមជនអន្ធពាលព្រួតគ្នាដេញកាប់នេះត្រូវបានប្រាប់ថា មកពីរាំជាមួយស្រីសេ្នហ៍របស់ពួកគេ ។
ជនរងគ្រោះម្នាក់ឈ្មោះ សង់ ទី ភេទប្រុស អាយុ២៤ឆ្នាំ ជាអ្នករត់ម៉ូតូឌុប ស្នាក់នៅផ្ទះលេខ១១ ក្រុម១០ ផ្លូវលំ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ដែលកំពុងសម្រាកព្យាបាលនៅក្នុងមន្ទីរពេទ្យព្រះកុសុមៈឱ្យដឹងថា មុនពេលកើតហេតុនៅវេលាម៉ោង៩និង៣០នាទីយប់ រូបគេនិងមិត្តភក្តិចំនួន៦នាក់ទៀតបាននាំគ្នាចូលទៅផឹកស៊ី និងរាំកម្សាន្តនៅក្នុងក្លិបម៉ូណាកូ ដែលស្ថិតនៅមិនឆ្ងាយប៉ុន្មានពីផ្ទះ ។ នៅពេលរាំកម្សាន្ត និងផឹកស៊ីជាមួយមិត្តភក្តិនោះអស់ស្រាបៀរជាច្រើនថូ ពេលនោះមានស្ត្រីម្នាក់ដែលស្គាល់គ្នាជាមួយមិត្តភក្តិស្រីរបស់ខ្លួន បានមកចូលរួមផឹកស៊ីជាមួយគ្នា ។ ពេលនោះខ្លួនក៏សុំស្ត្រីដែលទើបនឹងស្គាល់ឡើងរាំស្លូវជាមួយ និងបង្ហាញភាពសិទ្ធស្នាលជាមួយគ្នា ដោយមិនដឹងថា ស្ត្រីនេះមានប្រុសកំណាន់ចិត្តនៅក្នុងក្លិបនេះទេ។
ជនរងគ្រោះរៀបរាប់ទៀតថា នៅវេលាម៉ោង១២និង២៥រំលងនាទីអធ្រាត្រ ខ្លួននិងមិត្តភក្តិម្នាក់ឈ្មោះ ប៉ែន សុខលីស ភេទប្រុស អាយុ២៤ឆ្នាំ មានទីលំនៅក្បែរគ្នា បានសុំមិត្តភក្តិដែលផឹកស៊ីជាមួយចេញពីក្លិបទៅផ្ទះមុន ។ ពេលដើរតាមផ្លូវជិតដល់ផ្ទះទៅហើយ ស្រាប់តែលេចមុខក្រុមជនអន្ធពាលចំនួន៤ទៅ៥នាក់ព្រួតគ្នាវាយនិងកាប់ពួកគេទាំង២នាក់ ដោយកាំបិតប៉័ងតោ និងកាប់ត្រូវរូបខ្លួនចំនួន៣កន្លែងគឺចំក្បាល ដៃនិងជើង បណ្តាលឱ្យដេកដួលក្នុងថ្លុកឈាមនៅលើដងផ្លូវ រីឯមិត្តភក្តិម្នាក់នោះក៏ត្រូវគេកាប់ដែរតែរងរបួសស្រាលហើយបានចេញពីមន្ទីរពេទ្យទៅផ្ទះហើយក្រោយពីពេទ្យលាងរបួសរួច ។
យុវជនរងគ្រោះបានបន្តថា ការដែលក្រុមក្មេងអន្ធពាលដេញកាប់នេះគឺមកពីខឹងខ្លួនរាំស្លូវជាមួយស្រីស្នេហ៍របស់ពួកគេ ហើយខ្លួនបានស្គាល់មុខជនដៃដល់នោះនិងកំពុងតែប្តឹងទៅសមត្ថកិច្ច ។ លោកម៉ក់ ហុង អធិការប៉ូលិសខណ្ឌសែនសុខបានឱ្យដឹងថា សមត្ថកិច្ចប៉ូលិសព្រហ្មទណ្ឌកំពុងតែចុះស្រាវជ្រាវពីក្រុមជនដៃដល់ខាងលើនេះហើយ ក្រោយពីពេលកើតហេតុ ៕
ចែករំលែកព័តមាននេះ