រាជធានីភ្នំពេញ ៖ ក្រោមកិច្ចសហការរវាងមូលនិធិសហព័ន្ធយានយន្តអន្តរជាតិ(FIA Foundation ) និងមូលនិធិការពាររងរបួសអាស៊ី(AIP Foundation ) នឹងមានការរៀបចំផលិតនូវភាពយន្តឯកសារមួយដែលសម្តែងដោយកញ្ញា Michelle Yeoh អគ្គរដ្ឋទូតសុច្ឆន្ទៈ ផ្នែកសុវត្ថិភាពចរាចរណ៍ពិភពលោក ដើម្បីចូលរួមផ្សព្វផ្សាយបង្កើនចំណេះដឹងផ្នែកសុវត្ថិភាពចរាចរណ៍នៅរាជធានីភ្នំពេញ នៅថ្ងៃទី២២ កុម្ភៈ ឆ្នាំ២០១១ខាងមុខនេះ ។ ភាពយន្តឯកសារនេះ នឹងបង្ហាញពីបន្ទុកដ៏ធ្ងន់ធ្ងរនៃអត្រាអ្នកស្លាប់ដោយគ្រោះថ្នាក់ចរាចរណ៍នៅកម្ពុជា ដែលគ្រោះថ្នាក់ចរាចរណ៍នេះបានក្លាយទៅជាបន្ទុកធំជាងគេនៅក្នុងគ្រោះមហន្តរាយនានានៃផ្នែកជំងឺមិនឆ្លងក្នុងឆ្នាំ២០១០ ។ ភាពយន្តឯកសារក៏បានបង្ហាញផងដែរនូវកិច្ចអន្តរាគមន៍ជាច្រើនប្រឆាំងទៅលើបញ្ហាសុខភាពសាធារណៈមួយនេះ ។
«ដំណើរទស្សនកិច្ចរបស់នាងខ្ញុំមកកាន់កម្ពុជានាពេលនេះ មានគោលបំណងមកបង្ហាញឱ្យឃើញថា ការស្លាប់និងរបួសដោយសារគ្រោះថ្នាក់ចរាចរណ៍ពិតជាអាចទប់ស្កាត់បាន។ ពួកគេអាចការពារបានដោយប្រើវិធីសាស្ត្រសាមញ្ញបំផុត ដោយពួកគេត្រូវពាក់មួកសុវត្ថិភាពនៅពេលធ្វើដំណើរ ។ ឆ្នាំនេះ យើងនឹងអនុវត្តនូវទសវត្សសុវត្ថិភាពចរាចរណ៍ផ្លូវគោករបស់អង្គការសហប្រជាជាតិ យើងត្រូវប្តេជ្ញាថែមទៀត ដើម្បីរក្សាការពារអ្នកទាំងអស់់គ្នា ជាពិសេស កូនៗរបស់យើងមានសុវត្ថិភាព» ។ នេះជាសម្តីរបស់កញ្ញា Michelle Yeoh ។
នៅក្នុងភាពយន្តឯកសារ កញ្ញា Michelle Yeoh នឹងជួបសម្ភាសន៍ជាមួយមន្ត្រីជាន់ខ្ពស់នៅក្នុងជួររាជរដ្ឋាភិបាលកម្ពុជា ចុះសួរសុខទុក្ខជនរងគ្រោះដោយគ្រោះថ្នាក់ចរាចរណ៍នៅតាមមន្ទីរពេទ្យ និងចូលរួមសកម្មភាពផ្សព្វផ្សាយពីសុវត្ថិភាពចរាចរណ៍នៅតាមសាលារៀន ។ កញ្ញា Michelle Yeoh នឹងជួបលោកស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកត្រាំ អុីវតឹក រដ្ឋមន្ត្រីក្រសួងសាធារណការ និងដឹកជញ្ជូន ដើម្បីជំរុញឱ្យមានការធ្វើវិសោធនកម្មច្បាប់ចរាចរណ៍ឱ្យបានឆាប់រហ័ស ដោយតម្រូវឱ្យអ្នករួមដំណើរត្រូវពាក់មួកសុវត្ថិភាពផងដែរ ។ បច្ចុប្បន្ន ច្បាប់បានតម្រូវឱ្យអ្នកបើកបរទោចក្រយានយន្ត ពាក់មួកសុវត្ថិភាពតែម្នាក់ប៉ុណ្ណោះ បើទោះបីជាយ៉ាងនេះក្តី ក៏វិធានការនេះបានកាត់បន្ថយអត្រាការស្លាប់ដោយគ្រោះថ្នាក់ចរាចរណ៍ បាន៤២% និងរបួសបាន៦៩% ។
«នៅក្នុងឆ្នាំ២០១០ កម្ពុជា បានបាត់បង់ជីវិតមនុស្សប្រមាណ១.៧០៩នាក់ ដោយសារគ្រោះថ្នាក់ចរាចរណ៍ ។ យើងពិតជាមិនអាចទទួលយកនូវកម្រិតសោកនាដកម្មនេះបានទេ» យោងតាមប្រសាសន៍របស់លោកស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនាពេលថ្មីនេះថា «គ្រោះថ្នាក់ចរាចរណ៍ មានផលប៉ះពាល់ធ្ងន់ធ្ងរទៅដល់ខឿនសេដ្ឋកិច្ចជាតិ បញ្ហាសុខភាពសាធារណៈ និងប្រព័ន្ធសុខុមាលភាពសង្គម និងបានបង្កភាពឈឺចាប់ខ្លោចផ្សារជាខ្លាំងទៅដល់ជនរងគ្រោះ និងគ្រួសាររបស់ពួកគេ» ។
កញ្ញា Michelle Yeoh នឹងទៅទស្សនកិច្ចនៅសាលាបឋមសិក្សាសំពៅមាស ដែលជាសាលារៀនគោលដៅសម្រាប់កម្មវិធីកម្ពុជាមួកសុវត្ថិភាពជាថ្នាំបង្ការជីវិត និងមួកសុវត្ថិភាពសម្រាប់កម្មវិធីកុមារ ដោយរួមបញ្ចូលជាមួយការផ្តល់អំណោយមួកសុវត្ថិភាព និងការអប់រំស្តីពីសុវត្ថិភាពចរាចរណ៍ផងដែរ ។ កញ្ញា Michelle Yeoh នឹងបង្រៀនសិស្ស និងលោកគ្រូ អ្នកគ្រូ អំពីការពាក់មួកសុវត្ថិភាពឱ្យបានត្រឹមត្រូវ និងឥរិយាបថប្រកបដោយសុវត្ថិភាពនៅពេលធ្វើដំណើរនៅតាមដងផ្លូវ ក៏ដូចជាការបង្ហាញមេរៀនច្បាប់ចរាចរណ៍ស្តីពីអនុវត្តន៍ជាក់ស្តែងនៅក្នុងសួនសុវត្ថិភាពចរាចរណ៍ ។
«ភាពយន្តឯកសារសម្រាប់ទសវត្សសុវត្ថិភាពចរាចរណ៍ផ្លូវគោកនេះ នឹងលើកយកចំណុចសំខាន់ៗជាច្រើន ដោយមិនត្រឹមតែបង្ហាញពីបន្ទុកនៃគ្រោះថ្នាក់ចរាចរណ៍ប៉ុណ្ណោះទេ ថែមទាំងបង្ហាញអំពីកិច្ចខិតខំប្រឹងប្រែងរបស់ស្ថាប័នពាក់ព័ន្ធទាំងអស់ដែលធ្វើកិច្ចការនេះ ដើម្បីធ្វើឱ្យផ្លូវមានសុវត្ថិភាព» ។ នេះជាសម្តីរបស់លោក Saul Billingsley អគ្គនាយករងរបស់មូលនិធិសហព័ន្ធយានយន្តអន្តរជាតិ ។
កម្ពុជា មួកសុវត្ថិភាពជាថ្នាំបង្ការជីវិត ក្រោមការសហការគ្នារវាងមូលនិធិការពាររងរបួសអាស៊ី ក្រសួងមហាផ្ទៃ គណៈកម្មាធិការជាតិសុវត្ថិភាពចរាចរណ៍ផ្លូវគោក ធនាគារ ANZ Royal Bank (Combodia ) Ltd និងក្រមហ៊ុនប្រេងឥន្ធនៈ Total Cambodge បានចាប់ផ្តើមអនុវត្តគម្រោងនេះនៅឆ្នាំ២០១០ នៅក្នុងរាជធានីភ្នំពេញ ។ ចាប់ពីពេលនោះមក អនុវត្តកម្មវិធីជាច្រើនដូចជា កម្មវិធីអប់រំតាមសាលារៀន យុទ្ធនាការផ្សព្វផ្សាយសាធារណៈ និងការសិក្សាស្រាវជ្រាវលើការប្រើប្រាស់មួកសុវត្ថិភាព ។ ទិន្នន័យដំបូងពីការអង្កេតប្រើប្រាស់មួកសុវត្ថិភាពចាប់ពីខែមករា ឆ្នាំ២០១១ បានឱ្យដឹងថា អ្នករួមដំណើរមានការប្រើប្រាស់មួកសុវត្ថិភាពតិចតួចណាស់ ក៏ព្រោះតែពួកគេមិនត្រូវបានច្បាប់កំណត់ឱ្យពាក់ទេ ។ នៅរាជធានីភ្នំពេញ អ្នករួមដំណើរពាក់មួកសុវត្ថិភាពមានកម្រិតតែ៨-១២%ប៉ុណ្ណោះនៅពេលថ្ងៃ ចំណែកនៅពេលយប់មានត្រឹមតែ៦-៨%ប៉ុណ្ណោះ។
«យើងយល់ឃើញថា មួកសុវត្ថិភាពគឺជា«ថ្នាំបង្ការ »ប្រឆាំងនឹងរបួសខួរក្បាល ដែលជាកត្តាកំណត់នូវការស្លាប់ ដោយសារគ្រោះថ្នាក់ទោចក្រយានយន្ត ។ យើងសង្ឃឹមថា ភាពយន្តឯកសារនេះ នឹងជំរុញឱ្យទស្សនិកជនមានទឹកចិត្តឱ្យក្រុមគ្រួសាររបស់គេ និងមនុស្សជាទីស្រឡាញ់របស់ពួកគេ ពាក់មួកសុវត្ថិភាពគ្រប់ៗគ្នានៅពេលធ្វើដំណើរ ដែលវានឹងបម្រើឱ្យមានការយល់ដឹងក្នុងការផ្លាស់ប្តូរបទដ្ឋានសង្គមផងដែរ» ។ នេះជាសម្តីរបស់កញ្ញា Mirjam Sidik នាយិកាប្រតិបត្តិមូលនិធិការពាររងរបួសអាស៊ី ។
អំពី AIP Foundation មូលនិធិកាត់បន្ថយរបួសនៅអាស៊ី (AIP Foundation) គឺបានចុះបញ្ជីសហរដ្ឋអាមេរិក (U.S registered 501(c)(3) ) ជាអង្គការមិនស្វែងរកប្រាក់ចំណេញ ដែលប្រើភាពជាដៃគូសាធារណៈ-ឯកជន កម្មវិធីអប់រំ និងកម្មវិធីមួកសុវត្ថិភាពតាមសាលារៀន ដើម្បីកាត់បន្ថយអត្រារងរបួស និងការបាត់បង់ជីវិត ដោយសារអត្រាគ្រោះថ្នាក់ចរាចរណ៍នៅក្នុងបណ្តាប្រទេសកំពុងអភិវឌ្ឍន៍ ។ នៅឆ្នាំ២០០៩ មូលនិធិកាត់បន្ថយរបួសអាស៊ី បានចាប់ផ្តើមអនុវត្តកម្មវិធី មួកសុវត្ថិភាពជាថ្នាំបង្ការសាកល(GHVI) ដោយសហការជាមួួយមូលនិធិសហព័ន្ធយានយន្តអន្តរជាតិ(FIAF) មជ្ឈមណ្ឌលបង្ក្រាបជំងឺ និងការពារ(CDC) ធនាគារពិភពលោក ផ្នែកសុវត្ថិភាពចរាចរណ៍សាកល (World Bank Global Road Safety Facility) និងធនាគារអភិវឌ្ឍន៍អន្តរ-អាមេរិកាំង (Inter-American Development Bank) ។ កម្មវិធីមួកសុវត្ថិភាពជាថ្នាំបង្ការសាកល គឺជាការរួមគ្នាជាលក្ខណៈអន្តរជាតិ ក្នុងគោលបំណង«ពាក់មួកសុវត្ថិភាពនៅលើក្បាលមនុស្សគ្រប់គ្នា នៅក្នុងទសវត្សសុវត្ថិភាពចរាចរណ៍» ។ កម្មវិធីមួកសុវត្ថិភាពជាថ្នាំបង្ការសាកលដំណើរការក្នុងបណ្តាប្រទេសកំពុងអភិវឌ្ឍន៍ មានទិសដៅ៥សំខាន់ៗគឺ ការផ្សព្វផ្សាយ អប់រំជាសាធារណៈ ជំនួយផ្នែកបច្ចេកទេស ការស្រាវជ្រាវសិក្សាកម្មវិធីសម្រាប់ក្រុមគោលដៅ និងការផ្តល់មួកសុវត្ថិភាព ។ កម្ពុជា គឺជាប្រទេសមួយក្នុងចំណោមប្រទេសគោលដៅទាំងអស់នៅក្នុងកម្មវិធី ការអនុវត្តមួកសុវត្ថិភាពជាថ្នាំបង្ការសាកលដែលនឹងត្រូវអនុវត្ត ។
អំពី FIA Foundation
FIA Foundation គឺបានចុះបញ្ជីជាស្ថាប័នឯករាជ្យនៅចក្រភពអង់គ្លេស ដែលជាស្ថាប័នមនុស្សធម៌ ធ្វើការងារសម្របសម្រួលគ្រប់គ្រង និងជួយឧបត្ថម្ភទៅលើកម្មវិធីសកម្មភាពអន្តរជាតិ ដើម្បីផ្សព្វផ្សាយសុវត្ថិភាពចរាចរណ៍ ការការពារបរិស្ថាន និងនិរន្តរភាព ចលភាព ព្រមទាំងផ្តល់ជំនួយជាពិសេសដល់ការស្រាវជ្រាវសុវត្ថិភាពកីឡាម៉ូតូ ។ មូលនិធិសហព័ន្ធយានយន្ត អន្តរជាតិ(FIA Foundation) កំពុងតែធ្វើការយ៉ាងជិតស្និទ្ធជាមួយអង្គការសុខភាពពិភពលោកក្នុងការគាំទ្រទៅដល់ការប្រកាសជាសាកលនូវទសវត្សសុវត្ថិភាពចរាចរណ៍ផ្លូវគោកនៅថ្ងៃទី១១ ខែឧសភា ឆ្នាំ២០១១ ។
កញ្ញា Michelle Yeoh គឺជាតារាសម្តែង និងតារាភាពយន្តអន្តរជាតិ ដ៏ល្បីឈ្មោះ និងបានសម្តែងភាពយន្តល្បីល្បាញជាច្រើនដូចជា Crouching Tiger, Hidden Dragon, Memoirs of a Geisha, Sunshine, andthe James Bond movie Tomorrow Never Dies ។ ចាប់តាំងពីឆ្នាំ២០០៧ នាងបានត្រូវប្រកាសតែងតាំងជាអគ្គរដ្ឋទូតសុច្ឆន្ទៈផ្នែកសុវត្ថិភាពចរាចរណ៍ពិភពលោក សម្រាប់យុទ្ធនាការផ្សព្វផ្សាយពីការធ្វើឱ្យផ្លូវមានសុវត្ថិភាព ។ នាងបានធ្វើទស្សនកិច្ចនៅជុំវិញពិភពលោក ក្នុងកិច្ចស្វែងយល់អំពីផលប៉ះពាល់រាលដាលនៃគ្រោះថ្នាក់ចរាចរណ៍ និងធ្វើការអំពាវនាវទៅដល់សហគមន៍អន្តរជាតិ ឱ្យទទួលស្គាល់ពីបញ្ហាដែលនាងបានឃើញ និងជំរុញឱ្យមានការចាត់វិធានការបន្ទាន់ដើម្បីកាត់បន្ថយនូវអត្រាស្លាប់ និងរបួស ដោយគ្រោះថ្នាក់ចរាចរណ៍នៅក្នុងប្រទេសកំពុងអភិវឌ្ឍន៍ ។
Michelle បានដឹកនាំយុទ្ធនាការមួយដែលមានឈ្មោះថា «ការអំពាវនាវសម្រាប់ទសវត្សសកម្មភាព » ដែលជាលទ្ធផលនៅក្នុងមហាសន្និបាតរបស់អង្គការសហប្រជាជាតិ បានប្រកាសដាក់ចេញនូវ «ទសវត្សសុវត្ថិភាពចរាចរណ៍ផ្លូវគោក២០១១-២០២០» នៅក្នុងខែមីនា ឆ្នាំ២០១០ ។ ភាពយន្តឯកសារចំនួន២រឿងមុនដែលបានបង្ហាញពីសកម្មភាពរបស់ Michelle ដើម្បីសុវត្ថិភាពចរាចរណ៍ ត្រូវបានផ្សព្វផ្សាយទូទាំងពិភពលោកតាមស្ថានីយព័ត៌មានអន្តរជាតិ BBC ។
«នៅក្នុងរយៈពេល២-៣ឆ្នាំកន្លងមកនេះ នាងខ្ញុំបានធ្វើដំណើរទៅកាន់ប្រទេសជាច្រើន និងបានឃើញនូវផលប៉ះពាល់ដ៏អាក្រក់ដែលបណ្តាលមកពីកង្វះខាតពីការយល់ដឹងជាមូលដ្ឋាននៃសុវត្ថិភាពចរាចរណ៍ ដែលធ្វើឱ្យមានផលប៉ះពាល់ដល់អាយុជីវិតមនុស្សជាច្រើន ។ មានក្មេងម្នាក់បានស្លាប់ ឬពិការនៅរៀងរាល់៣០វិនាទី នៅទូទាំងពិភពលោក ។ នេះជាសោកនាដកម្ម ដែលមិនគួរឱ្យកើតឡើងបានឡើយ ក៏ព្រោះតែយើងអាចមានលទ្ធភាពការពារវាបាន ។ នេះជាពេលវេលាដ៏ពិតប្រាកដ ដែលត្រូវធ្វើការបញ្ឈប់នូវសោកនាដកម្មនេះ និងធ្វើឱ្យផ្លូវមានសុវត្ថិភាព»។ នេះជាសម្តីរបស់ Michelle Yeoh អគ្គរដ្ឋទូតសុច្ឆន្ទៈផ្នែកសុវត្ថិភាពចរាចរណ៍ពិភពលោក ៕
ចែករំលែកព័តមាននេះ